Nathan Smith (Biathlet)

Vun Wikipedia
Zur Navigation springen Zur Suche springen

Nathan Smith (* 25. Dezember 1985 in Calgary, Alberta) is en kanaadsch Biathlet.

Nathan Smith leevt in Canmore un sein Vereen is de Foothills Nordic Ski Club. Sie Trainer sünd Richard Boruta un Matthias Ahrens. As Kind fung he mit den Skilangloop an, siet 1998 bedrifft he den Biathlonsport. Smith is veermal, 2002 in Ridnaun, 2003 in Kościelisko, 2005 in Kontiolahti un 2006 in Presque Isle, bi Junioren-Weltmeesterschapen antreeden. Meest lann he dorbi in't Middelfeld, blots bi en Eenzelrennen, dat Verfolgungsrennen 2006, keem he up Platz 19 un dormit knapp ünner de best 20. Den gröttsten Spood harr he aber mit de Staffel, as he gemeensam mit Jaime Robb, Patrick Côté un Jean-Philippe Leguellec achter de Staffeln ut Düütschland un Frankriek unverwacht de Bronzemedaille winnen kunn. Bi de Nordamerikaansch Juniorenmeesterschapen 2005 in Mt. Shark wunn he den Titel in de Gesamtwertung.

2006 wurr Smith in Valcartier kanaadsch Meester in de verfolgung, nahdem he in' Sprint blots up den 6. Platz kommen weer. In den Biathlon-Weltcup wurr he eerstmals 2007 in Oberhof in en Staffelrennen insett, in dat de kanaadsch Staffel up Platz 14 keem. Hööchtpunkt vun sien eerst richtigen Seniorensaison wurr de Deelnahm an de Biathlon-Weltmeesterschapen 2008 in Östersund, wo he in dree Rennen to'n Insatz keem un Platz 81 in' Eenzel, Platz 92 in' Sprint un Platz 21 mit de kanaadsch Staffel recken dee. Bi de kanaadsch Meesterschapen 2010 wurr he Meester in Verfolgung, Eenzel un mit de Mixed-Staffel. Nahdem he in de Saisonen tovör blots af un to to'n Insatz kommen weer, kemm Smith in de Saison 2010/11 regelmatig to'n Insatz un reck eerstmals Ränge ünner de best 50. Sien best Ergevnis wurr en 38. Platz bi en Verfolgungsrennen in Fort Kent, womit he sien eerst Weltcuppunkte recken dee. Dat düer aber noch bit to'n eersten Sprint vun de Saison 2013/14, dar sück Smith as 16. in Östersund markbor verbeetern kunn. Dat schaff he Annecy nochmals un verbeeter sück in dat ansluuten Verfolgungsrennen up Platz 8 un reck somit eerstmals en Top-Ten-Platzeeren.

Bi de Olympisch Spelen in Sotschi reck Smith good Ergevnisse. Sien schlechts weer dorbi Platz 25 in' Eenzel, in Sprint un Verfolgung keem he up Platz 13 bzw. 11. Dat Massenstartrennen hett he nich afslooten, mit de kanaadsch Staffel reck he Platz 7. Nah den Rückträe vun Jean-Philippe Leguellec weer Smith af de Saison 2014/15 de Nummer Een vun dat kanaadsch Mannlüüdteam. Meest immer keem he nu in de Punkteränge, mehrfack ok ünner de best Teihn. In Nové Město na Moravě keem he eerstmals in en Sprintrennen in' Weltcup up Platz 7 un in den ansluuten Verfolger sogor up Platz 5. Bi de Biathlon-Weltmeesterschapen 2015 in Kontiolahti kunn he mit Platz 2 in' Sprint över 10 km (achter Johannes Thingnes Bø aber vör Tarjei Bø) as eerst Mann en Medaille för Kanada bi en Biathlon-Weltmeesterschap haalen. Dat weer nah de Medaillen vun Myriam Bédard bi de Biathlon-Weltmeesterschapen 1993 in Borowetz de eerste Medaillengewinn vun en Kanadier bi en Biathlon-WM. Todem weer dat, nah den Sieg vun Jean-Philippe Leguellec bi en Sprint 2012 in Östersund, dat tweetbest kanaadsch Ergevnis bi en Weltcuprennen. To'n Enn' vun de Saison 2014/2015 kunn Smith disse Bilanz noch verbeetern un wunn dat Verfolgungsrennen in Chanty-Mansijsk, wat denn ok sien eerst Weltcupsieg weer. In den Gesamtweltcup keem he in disse Saison up Platz 16, in' Sprintweltcup up Platz 13 un in den Verfolgungsweltcup keem he sogor up Platz 10.

Bi de Biathlon-Weltmeesterschapen 2016 in Oslo weer he Liddmaat vun de kanaadsch Staffel, to de noch Christian Gow, Scott Gow un Brendan Green hörrn deen, de en Bronzemedaille wunn.

Weblenken[ännern | Bornkood ännern]