Myriam Bédard

Myriam Bédard (* 22. Dezember 1969 in Neufchâtel, hüüd en Stadtdeel vun Québec) is en ehmalge kanaadsch Biathletin un tweefack Olympiasiegerin. Buterdem kunn kunn se mit hör Erfolgen bi de Biathlon-Weltmeesterschapen 1993 in Borowez as bither eenzig Fru Medaillen bi en Biathlon-Weltmeesterschap för Kanada haalen.

Leven

Myriam Bédard hett gemeensam mit den ehmalgen Biathleten Jean Paquet en Dochter. Nah de Scheeden vun hör eerst Mann hett Myriam Bédard den in' Iran boren Maler un Fotografen Nima Mazhari heiraadt.

Biathlonkarriere

Bédard hett in dat Öller vun 14 Johren dat Scheeten lehrt, as se Kadettin vun de kanaadsch Armee wurr. Mit 15 Johr hett se an hör eerst Biathlonwettkamp deelnommen. Mit 18 Johr wurr se kanaadsch Juniorenmeesterin. 1990 in Ruhpolding wunn Bédard as eerst Kanadierin överhoopt en Biathlon-Weltcuploop.

Bi de Olympisch Winterspelen 1992 in Albertville − as Fruen eerstmals an Biathlon-Wettkämpen deelnehmen drüffen − wunn se över de 15 Kilometer de Bronzemedaille achter Antje Miserky un Swetlana Wladimirowna Petschorskaja. In dat folgen Johr wunn se hör eerst wichtigen Titel, as se över 7,5 km Weltmeesterin vör Nadeschda Alexandrowna Talanowa un Jelena Pawlowna Belowa wurr; in dat Rennen över 15 km keem blots Petra Schaaf vör hör up dat Podest. Bi de Olympischen Winterspielen 1994 in Lillehammer wurr se sowohl över 7,5 as ok över 15 Kilometer Olympiasiegerin. In de Gesamtweltcupwertung hett se de Saison 1990/91 un ok 1992/93 as Tweet afslooten.

Se truck sück denn wegen de Gebort vun hör Dochter vörövergahnd vun den Leistungssport torüch. Hör Comeback verleep denn aber nich mehr spooddriek, wiel se dör Besehren behinnert wurr. 1998 is Bédard vun' Biathlonsport torüch. Later hett se ankünnigt, as Iesflinklöper sarten to wullen, hett dat Teel aber ok nich lang verfolgt. Hüüd hörrt Bédard den Exekutivraat vun de Internatschonalen Biathlon-Union an un amteert as Viezpräsidentin.

Affären

Kört nah den Rückträe vun Premierminister Jean Chrétien in' Dezember 2003 wurr Kanada vun en Wahlspendenaffäär erschüttert, in de de Liberale Partei vun Kanada un tallriek kanaadsch Grootünnernehmen verwickelt weer. An' 27. Februar 2004 geev Bédard apenlich bekannt, dat se 2002 hör Marketingjob bi de Iesenbahnsellschopp VIA Rail upgeven muss, nahdem se de undörsichtigen Geschäftsbeziehungen mit de Werbefirma GroupAction kritiseert harr. Disse Utseggen führ een Week later to'n Rückträe vun den Präsident un den Viezpräsident vun de Sellschopp. In de Verloop vun disse Affäär wurrn Verwicklungen vun GroupAction bit rup to engste Mitarbeiter vun den ehmalgen Premierminister bekannt.

Enn' März 2004 hett Bédard en wiedere eidesstattliche Utseggen maakt, de aber meest överall up Skepsis stööten dee. Se hett dorin seggt, dat hör mitddeelt wurr, dat GroupAction in' Drogenhannel tätig weer un dat hör Partner Premierminister Jean Chrétien persönlich dorvan övertüügt harr, kien kanaadsch Truppen in den Irak to schicken. Wieder geev se an, dat de Formel-1-Fohrer Jacques Villeneuve 12 Millionen Dollar kreegen harr, dormit he de kanaadsch Flagg up sien Rennantoog droog. Villeneuve hett dat strikt torüchwiest un disse Behauptung as „lächerlich“ betekent. En Ünnersökensbericht keem later to den Sluss, dat Bédard VIA Rail freewillig verlaaten harr.

Entführung vun hör Dochter

In en landswiet Fahndung wurr se 2006 wegen de mootmaatlich Entführung vun hör 11-johrig Dochter Maude söcht. Hör fröhere Ehemann harr de Polizei wegen dat Nichtinhollen vun Sörgerechtsuplaagen inschalt. Achtergrund weer, dat Bédard sück mit hör jetzigen Ehemann gegen Anschuldigungen to Wehr setten dee, de harr twintig Biller vun de kanaadsch Künstlerin Ghitta Caiserman-Roth klaut. Dat Paar harr sück doruphen in de USA afsett un vun dor ut in Breef an Institutschonen un bekannt Persönlichkeiten sük över en Hetzjagd vun de kanaadsch Behörden gegen sück beklagt. De „terrorisme bureaucratique des fonctionnaires canadiens“ (bürokraatsch Terrorismus vun kanaadsch Verwaltungen) würr hör un hör Mann bedrohen. Nah hör Verhaftung un Överstellung an de kanaadsch Behörden wurr se in' September 2007 de Kindsentführung för schuldig befunnen. Se wurr wegen Verletzung vun dat Sörgerecht to en tweejohrig Bewährensstraaf veroordeelt un kunn somit hör Upgaaven in den internatschonalen Biathlonsport nich mehr wohrnehmen.

De Affären un sück wedderspreeken Utseggen vun Bédard wurr in de breet Apenlichkeit platt paast un hemm hör to'n Gegenstand vun Parodien un Gespött, aber ok Mitleed maakt. Wiel se immer noch bannig populär is, wurrn ok Stimmen luut, nah de hör Ehemann Mazhari hör Guru is un se vullkommen ünner sien Infloot stahn dee, he is dornah en wirklichkeitsfrömd Verswörungstheoretiker un dee hör manipuleeren.

Utteknungen

• Sportler vun dat Johr 1994 in Kanada (Lou Marsh Trophy)
• Best Athletin 1994 vun Kanada (Bobbie Rosenfeld Award)
• Herutragen kanaadsch Sportlerin 1994 (Velma Springstead Trophy)
• Ehrenliddmaat vun dat Royal Military College of Canada

Weblenken

• Websteed un Blog vun Myriam Bédard
• Indrag bi de IBU (engelsch)
• Indrag bi Sports-Reference (engelsch)