Murmansk

Vun Wikipedia
Lenin-Prospekt, de wichtigste Straat in Murmansk
Haven von Murmansk
Wapen von Murmansk

Murmansk (russ’sch Му́рманск) is en Stadt in’n Oblast Murmansk, Kreis Noordwestrussland, Russland. Se hett 307.664 Inwahners (Stand 14. Oktober 2010) op en Rebeed von 154,4 km². Murmansk liggt op de Halvinsel Kola an dat rechte Över von de Kola-Bucht, wat en Bucht von de Barentssee (Nöördliche Iessee) is.

Historie[ännern | Bornkood ännern]

In’n Eersten Weltkrieg weer för Russland de Togang to de See na Westen hen dör dat Düütsche un dat Osmaansche Riek sperrt. Russland harr keen sekern Togang to Hülp von de Allieerten Briten un Franzosen. Dorüm hebbt se 1915 anfungen, de Murmanbahn na de Barentssee to boon.

Dat Rebeed bi Murmansk is dör de Utlöpers von’n Golfstroom, de warm Water mitbringt, dat ganze Johr över iesfree. Över dissen Haven un de Bahnlien schull dat zentrale Russland versorgt warrn.

Murmansk is 1916 grünnt worrn un hett an’n 21. September 1916 Stadtstatus kregen. De Stadt hett eerst Romanow an’n Murman heten (Романов-на-Мурмане; na de Zarenfamilie Romanow un de Laag an de Noordküst von Kola, de Murmanküst nöömt warrt), hett aver al kort na de Februarrevolution an’n 3. April 1917 den ne’en Naam Murmansk kregen.

Von 1918 bet 1920 weer de Stadt von allieerte Truppen von de Noordrussland-Expedition besett, de in’n Russ’schen Börgerkrieg de Witten ünnerstütten deen.

An’n 1. August 1927 is Murmansk de Höövdstadt von’n nee billten Okrug Murmansk worrn, vörher weer dat Deel von’t Guverneurat Murmansk un von’t Ujesd Alexandrowski.

In’n Tweten Weltkrieg hett dat Düütsche Riek von Juni bet November 1941 in de Operation Silberfuchs versöcht, Murmansk intonehmen un dormit Murmansk as Haven för de Arktischen Konvois to blockeren. Dat hebbt se aver nich henkregen. Liekers hebbt de Düütschen en Barg Bummen op Murmansk afsmeten un de Stadt temlich tweibummt. De Stadt harr in disse Tied ok en Kriegsfungenenlager mit de Nummer 363 för Kriegsfungene ut dat Düütsche Riek.

An’n 40. Johrsdag von’n Sieg över Düütschland an’n 6. Mai 1985 hett de Stadt för ehren Wedderstand gegen de Düütschen den Ehrentitel Heldenstadt kregen.

In de Tied von de Sowjetunion weer Murmansk ok en wichtigen Haven, över den Noordsibirien in’n Sommer över See un över de groten Strööm mit Woren versorgt worrn is.

De Stadt is en wichtigen Stüttpunkt von de russ’sche Noordflott un weer bet 1991 kumplett sperrt.

Inwahnertall[ännern | Bornkood ännern]

Johr Inwahners
1989-00-001989[1] 468.039
2002-00-002002[2] 336.137
2010-00-002010[3] 307.664

Wapen[ännern | Bornkood ännern]

Dat Wapen wiest baven op blauen Grund en gollen Iesbreker un dor över - dorstellt as gollen Streken - dat Noordlicht un ünnen op gollen Grund en blauen Fisch.

Ünnerafdelen[ännern | Bornkood ännern]

De Stadt is in de dree Rajons Leninski (93.473 Inwahners), Oktjabrski (98.938 Inwahners) un Perwomaiski (128.551 Inwahners) opdeelt.

Kultur[ännern | Bornkood ännern]

Elk Johr an’n letzten Sünndag in’n Januar gifft dat in de Stadt en Fest, mit dat dat Enn von de Polarnacht fiert warrt.

Bowarken[ännern | Bornkood ännern]

Dat Hotel Arktika is 1984 boot worrn un mit siene Höögd von 72 m dat gröttste Gebüüd över’n Polarkrink.

1974 hebbt se de 35,5 Meter hoge Statue Aljoscha opstellt, de de Soldaten von’n Tweten Weltkrieg ehren schall.

Stadtpartnerschoppen[ännern | Bornkood ännern]

  • Akureyri (Iesland) - von’n 14. Oktober 1994 af an
  • Grunneng (Nedderland) - von’n 20. Juni 1989 af an
  • Jacksonville (USA) - von’n 14. Juli 1975 af an
  • Luleå (Sweden) - von’n 26. März 1972 af an
  • Rovaniemi (Finnland) - von’n 23. April 1962 af an
  • Stettin (Polen) - von’n 8. April 1993 af an
  • Tromsø (Noorwegen) - von’n 10. Juli 1972 af an
  • Vadsø (Noorwegen) - von’n 30. April 1973 af an

Weertschop un Infrastruktur[ännern | Bornkood ännern]

Dat Ünnernehmen Arktikmorneftegasraswedka hett sien Sitt in Murmansk.

Verkehr[ännern | Bornkood ännern]

Murmansk is över de Murmanbahn mit Sankt Petersborg un Moskau verbunnen. De wichtigste Straat för Murmansk is de M 18/Europastraat 105, de na Sankt Petersborg geiht.

De Flegerhaven Murmansk is so 24 km von dat Stadtzentrum af.

Scholen[ännern | Bornkood ännern]

De wichtigste Universität is de Staatliche Technische Universität Murmansk, de 1950 grünnt worrn is.

Medien[ännern | Bornkood ännern]

In Murmansk kummt dat Daagbladd Wetscherni Murmansk rut (1991 grünnt).

Sport[ännern | Bornkood ännern]

De Footballvereen FC Sewer Murmansk is 1961 grünnt worrn un speelt in de Saison 2011/2011 in de twete Liga. De Bandyvereen Murman speelt in de eerste Bandy-Liga.

Lüüd ut Murmansk[ännern | Bornkood ännern]

Footnoten[ännern | Bornkood ännern]

  1. Zensus 1989
  2. Zensus 2002
  3. Zensus 2010

Weblenken[ännern | Bornkood ännern]

Murmansk. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:68° 58′ N, 33° 5′ O