Mott the Hoople
Mott the Hoople weer en britisch Rockband, de in de 1970er Johren spoodriek weer. 1974 stell sück de Band as Mott nee, 1976 as British Lions up. 1980 löös sück de Grupp up. 2009 un 2013 sünd de Grünner vun Mott the Hoople weer tosommen uptreeden.
Geschichte
[ännern | Bornkood ännern]Mick Ralphs (Gitarr), Dale „Buffin“ Griffin (Slagtüüch), Peter Overend Watts (Bass) un Verden Allen (Örgel) hemm eerst ünner de Naam Silence tosommen speelt. Mit den Singer Stan Tippins hemm se eenig Stücke upnommen, de eerst later herutbrocht wurrn. 1969 wurr Tippins dör Ian Hunter (Gesang, Klaveer, Gitarr) ersett. Tippins bleev as Road Manager un Background-Singer.
De Band wurr nah Mott the Hoople (nah en Book vun Willard Manus) umnöömt.
Mott the Hoople hemm veer relativ spoodlos Alben upnommen, harrn in England aber en groot Fan-Gemeend as Live-Band. 1972 wull sück de Band uplösen, wurr aber vun David Bowie överreed, wieder to maken. Bowie sien Ünnerstütten un dat vun hüm schreeven Leed All the Young Dudes as ok de glieknamig LP hemm denn eersten Verkoopsspood brocht. 1973 un 1974 folgten en Reeg vun Single-Hits un twee spoodriek LPs mit Naam Mott un The Hoople. Dormit hett sück de Band ok in den USA en Naam maakt. Hör USA-Tour 1974 wurr vun de later bannig spoodriek britisch Rockband Queen as Vörgrupp begleit,[1] nahdem se all in’n Harvst 1973 gemeensam dör Grotbritannien tourt weern.
Mit den Erfolg keem dat aber to Striedereen. Dat Image änner sück in Richt Glam Rock. Verden Allen un Mick Ralphs weern dormit woll nich inverstahn un hemm Mott the Hoople 1972 bzw. 1973 verlaaten. Ralphs hett mit Paul Rodgers (Ex-Free) Bad Company grünnd. Nee Gitarrist wurr Ariel Bender, de eegentlich Luther Grosvenor heeten dee un vörher bi Spooky Tooth speelt harr. Dat Pseudonym is en Anspelen up Mick Ralphs ut en Stück vun Lynsey de Paul.
För Verden Allen keem tonächst Mick Bolton, de en lütt Sett later dör Blue Weaver (Ex-The-Strawbs, dornah Bee Gees), ersett wurr. As Pianist keem Morgan Fisher (Ex-The-Love-Affair) dorto, woruphen Hunter in Konzerten hööftsächlich Gitarr speel. In disse Formatschoon weern se ok in den USA bi Live-uptreeden bannig spoodriek, trotzdem geev dat immer weer Probleme in de Grupp. 1974 muss Bender gahn, för hüm keem Ex-David-Bowie-Gitarrist Mick Ronson. Kört dorup hett Ian Hunter de Band verlaaten, um en Solo-Karriere antofangen, un hett Mick Ronson mitnommen.
Mit Nigel Benjamin (Gesang) un Ray Major (Gitarr) hett de Grupp mit wenig Spood ünner de Naam Mott wieder maakt.Nah twee Alben in disse Besetten un en wieder mit Steve Hyams wurr ut Mott 1977, nahdem Benjamin gahn weer, tosommen mit John Fiddler (Ex-Medicine-Head) de Rockband The British Lions.
Ian Hunter un Mick Ralphs hemm later gelegentlich tosommen speelt. 2009 un 2013 geev dat Reunionkonzerte meest in Originalbesetten. De an Alzheimer krank wurrn Dale Griffin kunn dorbi 2009 blots för Togaven up de Bühnen kommen. Dale Griffin is an’n 17. Januar 2016 storven.[2]
2018 hett Hunter bekannt geven, ünner de Naam Mott the Hoople '74 weer mit de Ex-Liddmaaten Ariel Bender (Gitarr) un Morgan Fisher (Keyboards) up Tour to gahn.[3] 2019 keem dat to wiedere Upträen vun de Band. En Tour Enn’n 2019 wurr wegen en Tinnitus-Erkrankung vun Ian Hunter afseggt. De Band wurr up de Tour faken eenfach ünner de Naam Mott The Hoople ankünnigt.[4][5]
Eng mit den Spood vun Mott the Hoople verbunnen is de Produzent Guy Stevens, de de Band siet 1969 betrüen dee un den Naam utfunnen hett.
Musikstil
[ännern | Bornkood ännern]Mott the Hoople weer en Hard-Rock-Formatschoon, de wiels hör spoodriek Tiet – nich toletzt wegen de Bühnenupträen, aber villeicht ok wegen den starken Keyboard-Insatz – to’n Glam Rock tellt wurr. To’n Anfang schreev Mick Ralphs de meesten Stücke, denn immer fakener Ian Hunter. Woll ok ünner sien Infloot entstunnen ok völ balladenhafte Stücke. Af 1974 wurr Peter Overends Watts to’n Hööftschriever vun de Stücke.[6] Tallriek Texte, besünners ok de vun de Hits, hemm stark Anspeelen up de Rock-’n’-Roll-Tiet vun de 1950er Johren enthollen.
Literatur
[ännern | Bornkood ännern]- Stambler, Irwin: The Encyclopedia Of Pop, Rock And Soul. 3. överarbeit Uplaag, New York City, New York: St. Martin’s Press, 1989, S. 479f – ISBN 0-312-02573-4.
Borns
[ännern | Bornkood ännern]- ↑ Mott The Hoople - Concert Dates. Afropen an’n 25. Mai 2017
- ↑ Mott the Hoople drummer Dale Griffin dies, aged 67 in: The Guardian, 18. Januar 2016, afropen an‘n 19. Januar 2016
- ↑ https://www.youtube.com/watch?v=Uwpe0fEsalg
- ↑ https://variety.com/2019/music/news/mott-the-hoople-cancels-fall-american-tour-1203353477/
- ↑ https://www.youtube.com/watch?v=Uwpe0fEsalg
- ↑ Adam Sweeting, Peter Overends Watts Obituary, in: The Guardian, 25. Januar 2017, afropen an’n 26. Januar 2017