Modifikatschoon (Geologie)

Vun Wikipedia

Modifikatschoon oder Polymorphie is en Begreep ut de Mineralogie un ut de Warkstoffwetenschoppen. Ünnersocht weer dat Phänomen vun den düütschen Mineralogen Eilhard Mitscherlich.

Dormit warrt de Egenoort vun cheemsch Verbinnen betekend op twee oder mehr verscheedliche Oorten kristalliseeren to künnen. Disse so nöömten Modifikatschonen sünd vun de cheemsch Tohopensetten afsluut gliek, ünnerscheed sik aver in jemehr Gidderstrukturen. Tostannen kommt disse verschedenen Modifikatschonen bi ünnerscheedliche Proprotschonen vun Druck und/oder Temperatur. En Bispell is dat Calciumcarbonat CaCO3, dat as dat orthorhmobische Aragonit oder as de trigonale Kalkspat vörkommen kann.

Wenn en Stoff twee Modifikatschonen hett, denn snackt man ok vun Dimorphie, oder vun Trimorphie, wenn dat dree Modifikatschonen gifft. En Modifikatschoon, de sik as Spegelbild wiest, warrt ok as Enantiomorphie betekend. Kummt Polymorphie bi Element vör, so as dat bi Kohlenstoff mit sien Modifikatschonen Graphit un Demant, denn snackt man vun Allotropie.

Anwennen[ännern | Bornkood ännern]

De Egenoort, Modifikatschonen to billn, hett en Bedüden in de Warkstoffkunnen. Se warrt dorför nütt, Warkstoffen mit sünnere Egenschoppen to maken. Piezokristallen ut Bariumtitanat un Bliezirkonattitanat sünd en Bispeel ut de praktisch Anwennen: Dör Druck verännert sik de Gidderstruktur, wat en Spannung tüügt. Anners rüm gifft dat ok Materialien, de jemehr Gidderstruktur ännert, wenn vun buten en Spannung anleggt warrt. Solke Piezokristalle warrt t. B. as Funkengever in Füertüüch oder as Ultraschallwannler in elektronsch oder medizinsche Redschoppen.

Intressant sünd Modifikatschonen aver ok in de Eerdwetenschoppen, un sünners in de Mineralogie, wiel se ok in dat Innere vun de Eer vörkommt bi de Mineralen, worut de Eer sülvst tohoensett is. Wenn disse Mineralen dör de stiegenden Drück un Temperaturen in de Deep vun en Modifikatschoon in en anneren övergaht, nöömt man dat Phaastransformatschoon. Disse Phaaswesseln sünd tomeist mit en Ännern vun de elastischen Egenschoppen verbunnen, wat sik t. B. op dat Utbreden vun Eerdbevenbülgen utwarkt un mit Methoden vun de Seismologie ünnersocht warrn kann. Doröver is veel över den Opbo un de Mineralogie vun de Eer rutfunnen worrn.