Min Jehann

Vun Wikipedia
Zur Navigation springen Zur Suche springen

Min Jehann is een Gedicht vun Klaus Groth ut sien Book Quickborn: Volksleben in Plattdeutschen Gedichten ditmarscher Mundart[1] in Dithmarscher Platt.

Text vun Min Jehann[ännern | Bornkood ännern]

Ik wull, wi weern noch kleen, Jehann,
Do weer de Welt so grot!
Wi seten op den Steen, Jehann,
Weest noch? bi Nawers Sot.[2]
An Heben seil de stille Maan,
Wi segen, wa he leep,
Un snacken, wa de Himmel hoch
Un wa de Sot wul deep.
Weest noch, wa still dat weer, Jehann?
Dar röhr keen Blatt an Bom.
So is dat nu ni mehr, Jehann,
As höchstens noch in Drom.
Och ne, wenn do de Scheper sung
Alleen, int wide Feld:
Ni wahr, Jehann? dat weer en Ton!
De eenzige op de Welt.
Mitünner inne Schummerntid
Denn ward mi so to Mod.
Denn löppt mi’t langs den Rügg so hitt,
As domals bi den Sot.
Denn dreih ik mi so hasti um,
As weer ik nich alleen:
Doch allens, wat ik finn, Jehann,
Dat is – ik sta un ween.

Anmerken: Dat is de Text in de Originaalschrievwies vun Klaus Groth, 1856; in en normaliseerten Schrievwies gifft dat den Text hier.

Leeder[ännern | Bornkood ännern]

Vertoont is dat Gedicht veelfach worrn; ünner anner vun Klaus Groth sülv, vun Fritz Becker (1891), Julius Otto Grimm (1894), Ernst Licht, Leon Jessel, Carl Reinecke, Hannes Wader (1974)[3]. För de Ina Müller-Verschoon gifft dat een Arrangement vun Olaf Casimir un Hardy Kayser.[4] Bekannt is hüüttodaags vör allen de Hannes Wader-Verschoon ut sien Album Plattdeutsche Lieder. Bi de Truerfier för Helmut Schmidt am 23. November 2016 in de Hamborger Sankt Michaelis-Kark sang Jochen Wiegandt dat Leed in de Hannes Wader-Verschoon.[5] Den hoochdüütschen Titel Mein Johann vertoonten Friedrich Ernst Arnold Werner Nolopp (1887) un Eduard Seuffert (1892).

Interpreten sünd un weern ünner anner: Hannes Wader, Ina Müller, Lale Andersen, Jochen Wiegandt, Otto Groote Ensemble, Ernst Busch (1932[6]).

Alternativtitel[ännern | Bornkood ännern]

Ik wull, wi weern noch kleen, Jehann; Ick wull, wi wör noch kleen; Ick wull, wi wör noch kleen, Jehann; Ick wull, wi wärn noch kleen, Jehann; Ick wull wie weern noch kleen Jehann un anner;[7] Mien Jehann (Jochen Wiegandt); Mien Johann (Lale Andersen).

Footnoten[ännern | Bornkood ännern]

  1. The LiederNet Archive-Siet (över dat Qickborn-Book)
  2. Sot = Bronn, Born, Hoochdüütsch = Brunnen, Quelle
  3. tosammenstellt na www.Deutsches Lied.com-Siet un The LiederNet Archive-Siet (mit platt- un hoochdüütschen Text)
  4. Ina Müller-Songtext
  5. Musiktransfair-Sied
  6. Siet: Erinnerungsort
  7. bit hier na www.Deutsches Lied.com-Siet