Matthias Zurbriggen
Matthias Zurbriggen (* 15. Mai 1856 in Saas-Fee; † 21. Juni 1917 in Genf) weer en Swiezer Bargstieger.
Matthias Zurbriggen wurr in Saas-Fee boren, is aber mit sien Familie as Kind nah Macugnaga in Italien utwannert. Dat wurrd seggt, dat Matthias Zurbriggen dormals noch so lütt weer, dat he in en Draag an de Rügg vun sien Moder över den Monte-Moro-Pass dragen wurr. Fortan leev de Familie in dat italieensch Walserdörp Macugnaga. In dat Öller vun 13 Johren hett he Macugnaga verlaaten un weer as Hülpsarbeiter in verscheeden Länner tätig, bevör he in sien Walserheimat torüchkehr. Bi den Bau vun de Marinelli-Hütt in de Ostwand vun den Monte Rosa kreeg he sien Bargstiegerqualitäten. Dor weer he denn ok länger as Bargführer aktiv, bit he vun 1892 vun William Martin Conway opdeckt wurr.
Tosommen hemm se wiels en ganz Johr Gletscher un Tippen in dat Karakorum utforscht un hemm an en Nebentipp vun den Baltoro Kangri mit 6890 Meter den dormaligen Hööchtrekord upstellt. Dornah weer Zurbriggen alleen in Indien un Australien ünnerwegens. An‘ 14. Januar 1897 gelung hüm de Eerstbestiegen vun den 6958 m hooch Aconcagua in den Anden in Argentinien in‘ Alleengang. Kört Tiet dornah stunn he mit Stuart Vines an‘ Tupungato.
Later is Zurbriggen in den Tianshan reist un hett 1902 en wiedere Himalayaexpeditschoon maakt. 1906 weer he weer an den Monte Rosa ünnerwegens. Dornah weern sien Tätigkeiten as Bargstieger vörbi. He is sozial afstött un wurr to’n Landstrieker, an‘ 21. Juni 1917 wurr he uphangen in Genf funnen.
Literatur[ännern | Bornkood ännern]
- Matthias Zurbriggen: Von den Alpen zu den Anden. Lebenserinnerungen eines Bergführers, 1937 (erstmals als From the Alps to the Andes. Being the Autobiography of a Mountain Guide ut en italieensch Manuskript van 1899 översett)