Mario Renato Capecchi

Vun Wikipedia
Mario Capecchi, 2013

Mario Renato Capecchi (* 6. Oktober 1937 in Verona) is en US-amerikaansch Genetiker vun italieensch Herkunft. He wurr 2007 gemeensam mit Martin John Evans un Oliver Smithies för de Forschung an de Knockout-Muus mit den Nobelpries för Physiologie oder Medizin uttekent.

Kindheit un Jöögd[ännern | Bornkood ännern]

Mario Capecchi sien Moder, Lucy Ramberg, weer Poetin, die hör Gedichte in düütsch schreev. Sien Vader, Luciano Capecchi, weer Offizier vun de Italieensch Luftwappen. De Öllern weern nich vereheiraadt. Sien Grootmoder, Lucy Dodd, weer en Amerikanerin ut Oregon, de in Florenz as Malerin leev un den düütschen Archäoloog Walter Ramberg heiraten dee, de in' Eersten Weltkrieg full. De Moder harr an de Sorbonne in Paris Literatur studeert. Later hett se sück an Grupp vun Dichtern anslooten, de apen in Oppositschoon to'n Faschismus un Natschonalsozialismus stunnen. 1937 keem sien Moder nah Tirol un leev in den Oort Wolfsgruben dicht bi Bozen. In' Fröhjohr 1941 wurr sien Moder vun düütsch Beamten fastnommen. Mario Capecchi hett annommen, dat se nah Dachau in dat KZ keem, wat aber dör nee Ünnersöken nich bestätigt wurrn kunn.

He leev toeerst in en Tiroler Buernfamilie. As dor sien Pleeggeld nich mehr recken dee, leev he deelwies as Straatenkind in Gangs un wurr an' 18. Juli 1942 vun sien Vader nah Reggio nell’Emilia afmeldt, 160 km südlich vun Bozen. He weer tietwies in en Waisenhuus un toletzt in en Hospital in Reggio nell’Emilia mit Typhus un Ünnerernährung. In' Fröhjahr 1945 keem sien Moder weer free un hett hör Söhn söcht, de se nipp un nau an de sien 9. Gebortsdag 1946 weer funnen hett. Kört dornah is de Jung mit sien Moder mit en Schipp in de USA utwannert, wat sien dor leven Unkel organiseert un betallt harr. Van dor af leev he bi sien Unkel un Tant, Edward un Sarah Ramberg, beid Quäker, de en Quäkerkommune in Pennsylvania anhörrn deen. Sien Unkel weer Physiker för Quantenmechanik un hett maatgeevend de Feernsehröhren mit entwickelt. Sofor nah sien Ankunft in de Quäkergemeend, wurr he in de darte Klass vun en School upnommen, ofschons he kien Engelsch snacken kunn. Later hett he de George School, ein Böverschool in Philadelphia besöcht. He dreev völ Sport, besünners Football, Baseball un Ringen.[1]

Wetenschaplich Karriere[ännern | Bornkood ännern]

Nah de Schoolafsluss studeer he an dat Antioch College in Ohio un kreeg 1961 en Bachelor-Afsluss (B.S.) in Chemie un Physik. Ansluutend gung he an de Harvard University un kreeg dor 1967 sien Doktertitel in Biophysik ünner Betrüen dör James D. Watson, den Opdecker vun de Düppelhelix-Struktur vun de Desoxyribonukleinsüer un Nobelpriesdräger van 1962. Bit 1969 weer he denn Junior Fellow vun de Society of Fellows vun de Harvard Universität. In dat sülvig Johr wurr he Assistenzperfesser an de Afdeelen för Biochemie vun de Medizinisch Fakultät vun de Universität. 1971 wurr he to'n außerordentlichen Professor nömmt. Twee Johr later gung he an de University of Utah.

Privates[ännern | Bornkood ännern]

He is verheiraadt mit Laurie Fraser un hett en Dochter (Misha).

Warken (Utwahl)[ännern | Bornkood ännern]

  • Molecular genetics of early Drosophila and mouse development, van 1989, Cold Spring Harbor Laboratory Press, ISBN 0-87969-339-8,[2]
  • The role of FGF4 and FGF8 in posterior development of the mouse embryo, mit Anne M. Boulet; Developmental biology, San Diego Academic Press, 2008
  • Evolution of the mammary gland from the innate immune system mit Claudia Vorbach un Josef M. Penninger, BioEssays

Utteknungen (Utwahl)[ännern | Bornkood ännern]

Weblenken[ännern | Bornkood ännern]

Mario Renato Capecchi. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. ChemBioChem - Wiley Online Library ; 2008 Wiley-VCH Verlag GmbH&Co.KGaA, Weinheim; ChemBioChem 2008, 9, 1530–1543
  2. Molecular genetics of early Drosophila and mouse development up openlibrary.org