Ludwig Jürgens (Politiker)

Vun Wikipedia
Zur Navigation springen Zur Suche springen

Ludwig Jürgens (* 29. November 1889 in Stood; † 19. November 1964 ok dor) weer en düütschen Politiker.

Jürgens is 1889 as Söhn von’n Timmermann Carl Jürgens in Stood boren. 1901 hett he bi de Timmermannmeesters Schomaker un Bösch in Stood Timmermann lehrt un is dör Noord- un Westdüütschland wannert. 1909 is he trüggkamen un hett denn bi’n Timmermann Bösch arbeidt. 1913 hett he en Huus in de Oollanner Straat 36 köfft un Dora Hollanner freet. As de Eerste Weltkrieg 1914 anfüng, is he intagen worrn un is in Holsteen utbillt worrn. He keem denn an de Westfront un is bi Cambrai swoor verwunnt worrn. Na’n Krieg keem he trügg na Stood un hett de Steed von sien Vader bi dat Boamt von de Stadt övernahmen.

Al 1904 is he in de Gewerkschaft gahn, weer 1907 in de SPD ringahn un weer von 1920 af an Parteivörsitter in Stood. 1930 is he as Senater in’n Magistrat von de Stadt wählt worrn. Nadem de NSDAP 1933 an de Macht kamen weer, hett he sien Ämter verloren un an’n 26. April 1933 ok sien Arbeid bi de Stadt. He weer denn länger arbeidsloos un hett sik von 1935 af an mit en sülvstännig Gewarv dörslahn. He is en poor Maal in polietsche Haft kamen. 1944 is he wedder in Haft kamen. He keem in dat Lager Farge. He is aver wedder freekamen, as de Kummandör von dat Bezirkskummando em to de Landsschützen in Veern schickt hett. Vonwegen, dat he krank weer, is he denn aver as Waakmann in dat Lager Sandbossel kamen. Dor hebbt em de Briten an’n 29. April 1945 fastnahmen un in en Lager in Belgien bröcht. An’n 15. August 1945 keem he ut de Fungenschop trügg na Stood. An’n 21. August hett he al en Andrag bi de Militärverwaltung stellt, dat de SPD in’n Landkreis Stood wedder tolaten warrt. Noch in’n August hebbt em de Briten in’n Hauptutschuss un in’n Biraad sett. Bi de eerste Wahl in’n September 1946 hebbt em denn de Wählers in dit Amt bestätigt. An’n 15. November 1946 hebbt em de Stadtvertreders as Börgermeester von Stood wählt. Dat Amt harr he bet Dezember 1952.

Von September 1946 bet April 1959 weer he in’n Kreisdag un Kreisutschuss von’n Landkreis Stood.

1961 is Jürgens Ehrenbörger von Stood worrn. In Stood is ok de Ludwig-Jürgens-Weg na em nöömt.