Lehrerseminar Beers

Dat königlich prüüßsche Lehrerseminar Beers hett von 1876 bet 1925 bestahn. Dor sünd Schoolmeesters för de Volksschool utbillt worrn. Dat Seminar hett an’t Bornholt in Beers legen.

Historie

Nadem dat Amt Beers 1859 oplööst worrn is, sünd veel Beamte ut Beers wegtagen. As Utgliek schull Beers en Seminar kriegen. Dat hett aver en ganze Tied duurt, bet dat würklich kamen is.

De Grundsteen för dat Seminar is an’n 9. Juli 1874 leggt worrn. Dat Gebüüd is 1876 trech worrn un an’n 16. Oktober 1876 hett dat Seminar sien Arbeid opnahmen. De eerste Direkter weer Hermann Reinecke, de later Stadtschoolinspekter in Berlin weer. Dat Gebüüd is ut Backsteen un hett en Middeltrakt mit dree Etaaschen. De twee Flögels an de Sieden hebbt twee Etaaschen. 1898 hett de Präparandenanstalt ok noch en egen Gebüüd kregen, dat vondaag to de Grundschool Beers höört.

De Schoolmeesters sünd dree Johr lang an dat Seminar utbillt worrn, nadem se vörher ok al dree Johr op de Präparandenanstalt weren. Dat Seminar harr Platz för üm un bi 100 Seminaristen.

Nadem Prüßen beslaten hett, dat de Schoolmeesters in Tokumst an Pädagoogsche Akademien utbillt warrn schöölt, hett dat Seminar 1925 dichtmaakt. In dat Gebüüd is denn de Düütsche Oberschool intagen, de ok vondaag noch as Neddersassisch Internatsgymnasium besteiht.

Lüüd

• 1881–1884: Friedrich Plettke
• Friedrich Seebode
• 1888–1891: Gustav Lepler
• 1894–1897: Fritz Husmann
• Johann Jacob Cordes
• –1908: Georg Brinke
• 1906–1912: Heinrich Hünecke
• 1906–1912: Walter Zimmermann
• Adolf Lentze
• –1925: Karl Gustav Freese

Literatur

• Ernst Beplate: Das Bederkesaer Seminar - vom Lehrerseminar zur Pädagogischen Hochschule. Beers 1991