Leherheid
| Wapen/Flagg | Koort | |
|---|---|---|
 |
| |
| Basisdaten | ||
| ||
| Flach: | 6,46 km² | |
| Inwahners: | 16.027 (30. September 2014) | |
| Inwahnerdicht: | 2.481 Inwahners pro km² | |
| Hööchd: | 10 m över NN | |
| Postleettall: | 27578 | |
| Vörwahl: | 0471 | |
| Geograafsche Laag: | Koordinaten:53° 36′ N, 8° 37′ O53° 36′ N, 8° 37′ O | |
 | ||
|
| ||
Leherheid (hoochdüütsch Leherheide) is en Stadtdeel von Bremerhoben in dat Land Bremen.
De Stadtdeel is wieder indeelt in de dree Oortsdelen Fehrmoor (2927 Inwahners op 2,28 km²), Königsheid (5398 Inwahners op 2,30 km²) un Leherheid-West (7702 Inwahners op 1,88 km²).
Geografie
[ännern | Bornkood ännern]Leherheid liggt deelwies op de Geest (Süüdkant von de Hoge Lieth) un deelwies in’t Moor. De Höögd reckt von 3 bet 11 m över de See. De höögste Punkt liggt op 11,4 m över NHN bi de Eck Debster Weg/Bornstraat. Dat is toglieks de höögste Punkt von ganz Bremerhoben. Op de Geest weer de Landschop fröher to’n groten Deel Heid. Dat Water ut dat Rebeed flütt in’n Süüdoosten över Ems un Markfleet na de Geest hen af. Dat Water von’n Noordrand aver flütt över Gravens na de Grote Beek af.
De Naveröörd un -stadtdelen sünd Langen un Debst in’n Noorden, Wehden in’n Noordoosten, Spaden in’n Süüdoosten, Schierholt in’n Süden un Speckenbüttel in’n Westen.
En Deel von Fehrmoor is dör en smallen Striepen Land von’n Rest aftrennt un billt en Enklaav binnen Neddersassen.
Historie
[ännern | Bornkood ännern]De eersten Hüüs in Leherheid sünd von 1846 af an boot worrn. In disse Tied sünd veel Arbeiders ut Mekelborg na Bremerhoben un Geestmünn kamen, üm dor in’n Haven to arbeiden. To de eersten Siedlers op de Leher Heid hett Johann Krüger an’n hüdigen Fehrmoorweg höört. De Buurmeen is in Leh 1846 oplööst un an de Börgers opdeelt worrn.
In dat Johr 1901 hett Leh dat Waterwark op de Leher Heid boot.
Dull wussen is Leherheid denn vör allen in de Johren 1960 un 1970, as de Wahnungsbosellschop Neue Heimat, later GEWOBA, en Reeg Neeborebeden in Leherheid-West anleggt hett. Bet 1964 weren 3500 Wahnungen boot un in Leherheid hebbt 12.000 Lüüd leevt.
En egen Stadtdeel is Leherheid 1971 worrn.
Verwaltungsgeschicht
[ännern | Bornkood ännern]Leherheid hett von öllers en Deel von’n Flecken Leh billt. De Oort hett vör 1885 to dat Amt Leh tohöört. Na 1885 weer dat in’n Kreis Leh. 1920 hett Leh de Stadtrechten kregen un is kreisfre’e Stadt worrn. Aver al 1924 is de Stadt mit Geestmünn to de Stadt Wersermünn tohoopgahn. 1939 is denn ok Bremerhoben Deel von Wersermünn worrn un de Stadt hett 1947 denn den Naam Bremerhoben kregen.
Inwahnertall
[ännern | Bornkood ännern]| Johr | Inwahners |
|---|---|
| 1. Dezember 1885[1] | 147 Lüüd, 21 Hüüs |
| 1. Dezember 1905[2] | 415 Lüüd, 55 Hüüs |
| 2001 | 17.555 |
| 2005 | 16.756 |
| 2011 | 15.997 |
| 30. September 2014[3] | 16.027 |
Religion
[ännern | Bornkood ännern]Leherheid is evangeelsch-luthersch präägt. In Fehrmoor gifft dat de Markus-Kark un in Leherheid-West de Lukas-Kark. Ok de Speckenbütteler Johannes-Kark steiht binnen de Grenzen von’n Stadtdeel Leherheid. De Sülvstännige Evangeelsch-Luthersche Kark bedrifft in Leherheid de Andreas-Kark.
För de Evangeelsch-Reformeerten is de Lütte Kark tostännig. Tosätzlich gifft dat noch en neeapostoolsche Gemeen.
För de Kathoolschen is de St.-Ansgar-Kark tostännig, de siet 1. November 2014 to de Hillig-Hart-Jesu-Kark in Leh tohöört.
Kultur
[ännern | Bornkood ännern]In Leherheid liggt de Park Thiele sien Goorn.
Verenen
[ännern | Bornkood ännern]1909 is en Afdeel von de Leher Turnerschaft (LTS) in Leherheid grünnt worrn. Dor is later de TSV Leherheid un de Vereen Sport-Freetied-Leherheid (SFL) von worrn.
Weertschop un Infrastruktur
[ännern | Bornkood ännern]De Beroopsfüürwehr Bremerhoben is för den Stadtdeel tostännig. 1909 is för Leherheid en Afdeel von de freewillige Füürwehr Leh grünnt worrn, dat sien Sprüttenhuus an de Fritz-Husmann-School harr. Na’n Tweten Weltkrieg is de Wehr nich mehr wedder aktiv worrn. De Reedschoppen sünd an de Beroopsfüürwehr gahn. An’n 15. April 1953 is de Beroopsfüürwehr in de Füürwach intagen. Dat Gebüüd weer denn de Füürwach IV in Bremerhoben. De Füürwach IV hett 1980 dichtmaakt. Sietdem is de zentrale Füürwach von Bremerhoben för ganz Bremerhoben tostännig.
Verkehr
[ännern | Bornkood ännern]De wichtigsten Straten för Leherheid sünd de Cherbourger Straat un de Langener Landstraat. De Cherbourger Straat geiht in’n Westen na Speckenbüttel un Weddewarden un in’n Oosten na Spaden un Wehden. An de Grenz na Neddersassen warrt se to de Kreisstraat 63. De Langener Landstraat löppt in’n Süden dör Leh na dat Zentrum von Bremerhoben un in’n Noorden as Landsstraat 135 na Langen un von dor wieder na Sievern un Millm. Na Noorden un Oosten to gifft dat keen gröttere Straten, de ut den Stadtdeel rutföhrt.
De nächste Autobahn is de Autobahn 27 (Afsnidd Bremerhoben–Cuxhoben). De Opfohrt 6 Bremerhoben-Överseehavens liggt an’n Süüdoostrand von Leherheid an de Cherbourger Straat.
De nächste Bahnhoff is de Bahnhoff Leh an de Bahnlien Bremerhoben–Cuxhoben, de von de Stadtdeelgrenz rekent so bi 2,5 Kilometer wied in’n Süden liggt.
Von 1919 bet 1982 hett dat ok en Lien von de Stratenbahn Bremerhoben geven, de dör Leherheid föhrt hett.
Scholen
[ännern | Bornkood ännern]As Grundscholen gifft dat in Leherheid de Friedrich-Ebert-School, de Fritz-Husmann-School un de Karl-Marx-School. Tosätzlich gifft dat twee Gesamtscholen mit Gymnasium. Dat sünd de Heinrich-Heine-School un de Johann-Gutenberg-School.
De eerste School in Leherheid hett dat 1894 an Mekelbörger Weg geven. 1909 keem dor de Leherheider School an’n Debster Weg to.
Literatur
[ännern | Bornkood ännern]- Wolfgang Schmidt: Kurze Geschichte des Stadtteils Leherheide. 2000
Footnoten
[ännern | Bornkood ännern]- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 159
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 97
- ↑ Statistischer Kurzbericht November 2014 von de Stadt Bremerhoben
Weblenken
[ännern | Bornkood ännern]- Websteed von’n Stadtdeel (hoochdüütsch)
Weddewarden | Leherheid | Leh | Midd | Geestmünn | Schippdörperdamm | Suurheid | Wulsdörp | Fischereehaven