Kurt Müller (Geistlichen)

Kurt Müller (* 3. März 1902 in Bremen; † 22. Dezember 1958) weer en düütschen Avkaat, Pastoor un Wedderständler.

Leven

Müller is 1902 in Bremen boren. He hett Juristeree studeert un is 1927 as Avkaat in de Kanzlie von Emmalene Bulling in Bremen intreden. He weer Maat von de SPD un hett as Avkaat Lüüd vertreden, de von de Natschonalsozialisten polietsch verfolgt worrn sünd. Dorför keem he in’n November 1935 dree Maand lang in de Oosterdoorwach in Schutzhaft.

Dormit weer sien Karjeer as Jurist toenn. Müller hett dorüm anfungen, Theologie to studeren. Dör en Stipendium von Philipp Reemtsma kunn he 1938 an de Universität Basel bi Karl Barth sien Studium opnehmen un is in’n Januar 1942 in de Swiez ordineert worrn. He is in dat Johr Pastoor von de reformeerte Gemeen in Degerloch worrn.

Över Karl Barth un de Bekennende Kirche keem Müller ok in Kuntakt mit Wedderständlers in Berlin-Dahlem, ünner annern Gertrud Staewen. In Degerloch weer dat Huus von de Müllers Deel von de Württembergische Pfarrhauskette, en Nettwark von Pastoorn, de in jemehr Hüüs NS-Verfolgte Ünnerkruup geven hebbt. Över een Dutz Personen sünd över de Tied in dat Huus von de Müllers ünnerkamen, ünner annern Cioma Schönhaus, Max un Ines Krakauer un Franz Mittelbach. Dorför, dat he sik ok för Joden insett hett, is he an’n 11. September 2012 tohoop mit Elisabeth Braun un Margarete Hoffer von Yad Vashem as Gerechten mank de Völker uttekent worrn.

Na dat Enn von’n Tweten Weltkrieg hebbt de US-Besatters Müller 1945 to’n Lizenzdreger von’n Kohlhammer Verlag in Stuttgart maakt.

1950 hett de Ministerpräsident von Neddersassen, Hinnerk Willem Kopp, Müller as Ministeriaalraad in dat Kultusministerium na Hannover haalt. In düt Amt harr he ünner annern Andeel an’n Lockener Verdrag.

Bi dat Thema, wat de Bundsrepublik Düütschland Atomwapen kriegen schall, hett he sik scharp gegen Atomwapen utspraken.

Blangenbi hett Müller as Pastoor ok Preddigten in de reformeerte Gemeen von Hannover hollen.

Müller is 1958 doodbleven. He weer verheiraadt mit Elisabeth, borene Rüther. He liggt op’n Karkhoff Heckthusen begraven. In Heckthusen op Good Övelgünn hett Elisabeth Müller ehre Süster, Gertrud von Marschalck, leevt.

Literatur

• Eberhard Busch: Kurt Müller - Anwalt der Verfolgten im Nationalsozialismus. Calwer Verlag, Stuttgart 2014, ISBN 978-3-7668-4316-6.