Kunsten at græde i kor

Vun Wikipedia
Zur Navigation springen Zur Suche springen
Filmdaten
Originaltitel: Kunsten at græde i kor
Produkschoonsland: Däänmark
Johr vun’t Rutkamen: 2006
Läng: 106 Minuten
Originalspraak: Süüdjüütsch
Filmkru
Speelbaas: Peter Schønau Fog
Dreihbook: Bo Hansen
Produkschoon: Thomas Stenderup
Musik: Karsten Fundal
Kamera: Harald Gunnar Paalgaard
Dorstellers

Kunsten at græde i kor (översett bedüüdt de Titel De Kunst vun dat in’n Choor Wenen) is en däänschen Roman ut dat Johr 2002, den Erling Jepsen schreven hett. Dat Book is 2006 ünner’n sülven Titel as Film rutkamen. De Speelbaas Peter Schønau Fog hett em na en Dreihbook vun Bo Hansen maakt. De Film is op Süüdjüütsch dreiht un warrt dorvun ok in Däänmark buten Süüdjüütland mit Ünnertitels wiest.

De Film speelt in de Johren 1970 in Süüdjüütland un vertellt ut de Sicht vun’n ölven Johr olen Allan de tragische Geschicht vun ene Familie, in de dat gnarscht. De Vader is’n Bruuskopp, de jümmer dorvun snackt, dat he sik wat andeit. De Moder hett dat opgeven, gegen em antogahn un lett sik siene Anfäll gefallen. Allan sien Broder is uttagen un siene Süster kann ok nich mehr. Allan mutt wat doon, dat de Familie tohoopblifft, denn he hett sien Vader un sien ganze Familie liekers geern. För’n Vader is dat jümmer en besünnere Freid, wenn he op Gräffnissen woortgewaltige Dodenreden hollen kann, dat de Truurgemeen de hellen Tranen de Backen dalrullt. Allan deit nu allens, dat sien Vader en beten Freid in’t Leven behöllt.

De Film is al 2006 op welk Festivals wiest worrn un keem an’n 27. April 2007 denn ok in de Kinos. De Film hett en ganze Reeg Priesen wunnen. Ünner annern den Nawuss-Pries bi dat Internatschonale Filmfestival vun San Sebastián, den Filmpries vun’n Nordischen Raat 2007 un den Jury-Pries 2006 op dat AFI-Festival. De Film is 2008 för teihn Roberts op dat Robert-Festival nomineert.

Weblenken[ännern | Bornkood ännern]