Kriedsee
| Kriedsee | |
|---|---|
| Typ | künstlich |
| Land/Länner | Düütschland |
| Toströöm | keen |
| Afströöm | keen |
| Öörd bi’t Meer | Warstood |
| Geograafsche Laag | Koordinaten:53° 42′ N, 9° 8′ O53° 42′ N, 9° 8′ O |
| Fläch | 0,33 km² |
| Längd | 1 km |
| Breed | 0,3 km |
| Afströömrebeet | 0 km² |
| Maximal Deepd | 60 m |
| Eilannen in’t Meer | 0 |
 | |
De Kriedsee is en 33 Hektar groten See twischen Warstood un Hemmoor, Landkreis Cuxhoben. Dat is en Rest von dat ole Zementwark.
De Kriedschicht, de normalerwies in Noorddüütschland en poor hunnert Meter ünner de Eerd liggt, kummt in de Gegend von Hemmoor un Warstood bet knapp ünner de Eerd. De Portland Hemmoor AG hett von 1862 bet 1976 disse Kried afboot un dor tohoop mit Toon, de in de Ümgegend afboot worrn is, Zement von maakt. De Kriedkuhl hett toletzt 130 Meter dalreckt. Nadem dat Zementwark dichtmaakt harr, hebbt se de Kuhl mit’n Schutt deelwies wedder dichtföhrt, so dat de Kuhl man noch 60 Meter deep weer. Von 1976 af an hebbt se ehr mit Water vulllopen laten un 1982 weer se kumplett vull. Mit disse Deepd von 60 Meter is de See aver liekers noch een von de deepsten Seen in Noorddüütschland.
Vondaag is de See bi Dukers temlich populär. Blangen de Anlagen von dat ole Zementwark sünd för de Dukers ok en Reeg annere Saken in’n See versenkt worrn. Ünner annern Autos, en Segelboot, en LKW un en Fleger von’n Typ Piper PA-28. För all Dukers is dat vörschreven, dat se en tweten Lungenautomat dorbi hebben mööt. De depe un kole See is för Dukers temlich gefährlich, dat is al fakener vörkamen, dat Dukers dor in doodbleven sünd (von 1995 bet 2011 weren dat 14 Lüüd).
För Anglers sünd ünner annern Forellen, Lass un Saibling in’n See utsett worrn.
Weblenken
[ännern | Bornkood ännern]
- Websteed mit Infor för Dukers to’n Kriedsee (hoochdüütsch)