Krankenhuus Stood

Dat Krankenhuus von Wiepenkathen ut keken

Dat Krankenhuus Stood is dat Krankenhuus in de Stadt Stood. Dat steiht op’n Swarten Barg in’n Westen von de Stadt an de Bremervörer Straat nich wied weg von de Krüzung von de Bundsstraten B 74 un B 73.

Bedreven warrt dat von de Elbe Kliniken Stade-Buxtehude. Dat Krankenhuus Stood is 2001 mit dat Krankenhuus Buxthu tohoopslaten worrn. Dat höört siet 2002 ok to’n Elv-Heid-Krankenhuusverbund.

Historie

Den Plaan för en Krankenhuus in Stood hett dat toeerst 1832 geven. De Vaderlandsche Vereen hett dor binnen teihn Johr 9000 Rieksdaler för sammelt un 1842 is de Vörgänger von dat hüdige Krankenhuus an de Harsfelder Straat boot worrn. Toeerst mit man twölv Bedden. 1843 is dat Naverhuus toköfft worrn un de Tall Bedden hett sik verdubbelt. Dat Krankenhuus is 1871 wieder utboot worrn. 1927 hett de Stadt Stood en Weddstried utropen för en nee Krankenhuus. 1929 hebbt se anfungen to boen un 1931 is dat ne’e Huus an de Diekstraat mit 70 Bedden trechworrn.

In de Tied in’n un na’n Tweten Weltkrieg hett dat ok noch en Butensteed op dat Gelänn von’n Flegerhorst Stood geven. Düt Krankenhuus Süüd hett dat noch bet 1957 geven. Ok annerwegens in Stood hett dat noch veer Gebüüd geven, de in de Tied von’n Krieg as Hülpskrankenhuus bruukt worrn sünd.

Mit dat Boen von dat ne’e Krankenhuus op’n Swarten Barg hebbt se 1961 anfungen un 1967 weer dat trech. 1960 harrn se mit Kösten von 19 Milljonen D-Mark rekent, aver toletzt hebbt se bet 1967 rund 50 Milljonen Mark utgeven.

In de Tied von 1967 bet 2008 sünd in dat Krankenhuus Stood 68.500 Kinner op de Welt kamen. Dat Krankenhuus hett 520 Bedden. Elk Johr warrt dor so üm un bi 8300 Operatschonen stationär un 2000 ambulant dörföhrt. Arbeiden doot dor so bi 1200 Lüüd.