Krankenhuus Buxthu

Vun Wikipedia
Zur Navigation springen Zur Suche springen

Dat Krankenhuus Buxthu is dat Krankenhuus in de Stadt Buxthu. Dat steiht op’n Bullenbarg an’n Ottenser Weg in’n Süüdwesten von de Stadt. De Bundsstraat 73 löppt so bi 400 Meter in’n Noordoosten langs.

Bedreven warrt dat von de Elbe Kliniken Stade-Buxtehude. Dat Krankenhuus Buxthu is 2001 mit dat Krankenhuus Stood tohoopslaten worrn. Dat höört siet 2002 ok to’n Elv-Heid-Krankenhuusverbund.

Historie[ännern | Bornkood ännern]

Dat eerste Krankenhuus in Buxthu is in’n Oktober 1885 inricht worrn. Dat weer in dat Armenhuus in de Moordoorstraat un harr 20 Bedden. 1903 hett sik en Krankenhuusbovereen grünnt, de Geller för en grötter Krankenhuus sammelt hett. Eerst in de Johren 1920 hebbt se denn anfungen, en neet Krankenhuus op dat Lüder’sche Grundstück in de Bahnhoffstraat to boon. Dat is 1929 trech worrn. Dat hett later en Anbo kregen un de Tall Bedden is von 25 op 75 stegen. Buxthu is aver wieder wussen un bald al müssen se Noodbedden in’t Krankenhuus opstellen un in de ole Harbarg Zur Heimat an’n Bollweg is en Hülpskrankenhuus mit 56 Bedden inricht worrn.

1953 hett de Stadt Buxthu denn beslaten en neet Krankenhuus to boon. Dat schull nu op dat hüdige Grundtück op’n Bullenbarg stahn, dat de Stadt Buxthu köfft hett. Mit dat Boon sünd se an’n 30. Januar 1959 anfungen un an’n 13. April 1962 kunn dat inwieht warrn. Aver al kort vörher, bi de Stormflood in’n Februar 1962 weer dat Krankenhuus in Inatz. Üm un bi 25 Johr later is denn noch en ne’en Trakt tokamen un 1994 hett de Dermatologie en egen Gebüüd blangenan kregen. An dat Enn von de Johren 1990 ist dat Krankenhuus för alltohoop 80 Millionen Mark renoveert worrn.

Dat Krankenhuus hett 253 Bedden. Elk Johr warrt dor so üm un bi 5300 Operatschonen dörföhrt. Arbeiden doot dor so bi 600 Lüüd.

Dat Gebüüd von 1929 is 2006 afreten worrn.


Koordinaten:53° 28′ N, 9° 41′ O