Kopenkamp
De Kopenkamp is en Stadtdeel von de Stadt Stood.
Historie
[ännern | Bornkood ännern]De Naam lett sik von dat 17. Johrhunnert af an nawiesen un kummt von de Kopenföhrers, de mit jemehr Kopen Water för de Stadt ranhaalt hebbt, to’n Bispeel ok bi Bränn. De Kopenföhrers hebbt Peer vör jemehr Wagens hatt, de op’n Kopenkamp weidt hebbt.
1858 is de Kopenkamp in Parzellen opdeelt un verpacht worrn. 1919 is dat Land denn to Boland maakt worrn. De Bogenossenschaft Kopenkamp hett an de Goebenstraat fiev Dubbelhüüs för teihn Siedlerfamilien anleggt. Dor is 1922 de Gemeinnützigen Bau- und Siedlungsgenossenschaft „Eigenheim“ von worrn, de acht Dubbelhüüs boot hett. 1925 hett de Genossenschaft dat Gelänn op’n Kopenkamp von de Stadt in Arvpacht övernahmen. In de Friedrich-Ebert-Straat sünd denn noch wedder fiev Dubbelhüüs boot worrn.
Bet 1931 sünd 204 Wahnungen op’n Kopenkamp boot worrn. Dat weren vörallen Dubbelhüüs. Ans is 1926/1927 in de Friedrich-Ebert-Straat en 15-Familien-Huus boot worrn un 1928 dat Konsumhuss in de Thuner Straat 78. 1931 sünd an’n Goetheplatz en Reeg lüttjere Wahnungen boot worrn.
En twete Bophaas hett dat denn in de Johren 1950 geven, nadem veel ne’en Wahnruum för de Verdrevenen bruukt worrn is.
De Kopenkamp lett sik groff afgrenzen dör de Swing/de Daalstraat in’n Noordwesten, de Frommhold- un Wilhelm-Sietas-Straat in’n Noordoosten un de Thuner Straat in’n Süüdoosten. In’n Süüdwesten is de ole Ümgehungsstraat de Grenz, de 1955 bet 1957 boot worrn is un wat nu de Bundsstraat 73 is.
In’n Noorden liggt de Hogendoorsvörstadt un na Süden to Lütt Thun un Barg.
Religion
[ännern | Bornkood ännern]För de evangeelsch-luthersche Kark höört de Kopenkamp to de Gemeen von de Johannis-Kark.
Koordinaten:53° 35′ N, 9° 28′ O