Knubbel-Glanzgoos

Vun Wikipedia
Wesseln na: Navigatschoon, Söök
Knubbel-Glanzgoos; Knubbelglimmergoos;

Glanzaante; Glimmeraante

Seken vun de Nee-Welt-Knubbelglimmergoos
Systematik
Ünnerstamm: Warveldeerten (Vertebrata)
Klass: Vagels (Aves)
Ornen: Gösevagels (Anseriformes)
Familie: Aantenvagels (Anatidae)
Ünnerfamilie: Halfgöse (Tadorninae)
Tribus: Plectropterini
Geslecht: Knubbel-Glanzgöse (Sarkidiornis)
Oort: Knubbel-Glanzgoos
Wetenschoplich Naam
Sarkidiornis melanotos
(Pennant, 1769)

De Knubbel-Glanzgoos (Sarkidiornis melanotos), hen un wenn ok Glanzaante oder Glimmeraante nömmt, is de eenzigste Aart ut dat Geslecht vun de Knubbel-Glanzgöse. Se warrt to de Halfgöse mit torekent un höört dor to de Aantenvagels mit to. Bovendem warrt se, tohopen mit de Sporngoos, to den Tribus vun de Plectropterini tellt.

Utsehn[ännern | Bornkood ännern]

Knubbel-Glanzgöse hefft an’n Hals, an’n Kopp un an de Bost witte Feddern. An’n de annern Stäen glimmert de Vagel in blauswatte Feddern. An’n Kopp is he swatt-bunt. De Heken dreegt up’n Snavel en dannigen Knubbel. De warrt wedder torüch billt, wenn se nich bigaht un sik mit de Seken inlaat.

Unnerarden[ännern | Bornkood ännern]

Dat gifft twee Unnerarden:

  • De Ole-Welt-Knubbel-Glanzgoos (Sarkidiornis melanotos melanotos). Bi düsse Unneraard sünd de Ganner an’e Sieten hellgries
  • De Nee-Welt-Knubbel-Glanzgoos (Sarkidiornis melanotos sylvicola). Hier hefft de Ganner deep swatte Flanken.

De Seken seht bi beide Unnerarden overeen ut. Dör dat Holen vun düsse Goos as Ziervagel, sünd beide Unnerarden dör’nanner smeten wurrn.

Wo de Knubbel-Glanzgoos vörkummt un wo se leven deit[ännern | Bornkood ännern]

Hier kummt de Glanzgoos vor
Seken vun de Unneraart ut’e nee Welt
Seken vun de Knubbel-Glanzgoos

De Knubbel-Glanzgöse sünd nich in Gefohr, ut to starven. De Unneraart vun de Ole-Welt-Knubbel-Glanzgoos kummt in Afrika un in Süüdoostasien vör. Sunnerlich faken leevt se in dat Delta vun den Senegal- un den Nigerstroom. Buten de Brödeltied kann een dor bit hen to 40.000 vun düsse Vagels finnen. In Afrika leevt se in dat Siedland an Ströme un Bröke un in Gemarken, de overswemmt wurrn sünd. Faken is se to sehn tohopen mit Sporngöse, Piepgöse un Nilgöse. In Asien hollt se sik butendem faken up Riesfeller up.

Wat roorer is de Nee-Welt-Knubbel-Glanzgoos. Se is tohuse in Süüdamerika. In enkelte Gegenden in Venezuela un Argentinien sünd Jägers annig achter ehr ran. Vundeswegen loppt de Bestand achterut.

Na de Rode List vun den IUCN gifft dat up de ganze Welt bi 190.000-730.000 Deerter. Dor gellt de Aart mit as „nich in Gefohr“.

Wat se freten deit[ännern | Bornkood ännern]

Knubel-Glanzgöse freet tomeist Sump- un Waterplanten. In Riesfeller könnt se de Buern duchtig schaden. Vundeswegen weert se faken jaagt.

Wie se sik vermehren deit[ännern | Bornkood ännern]

De Knubbel-Glanzgöse höört to de Aantenvagels mit to, de polygam leven doot. Normolerwiese höört dree bit veer Göse to en Ganner to. Bi de Balz maakt ok de Seken oorntlich mit: Se loopt dor faken in Krink bi um den Ganner to un he antert normolerwiese mit deep Bögen vun Kopp un Hals. De Nester weert nich wiet af vun dat Water in Büsch oder Sumpplanten anleggt. Ok Buumhöhlen weert bruukt. Bit hen to dree Seken leggt Eier in en Nest. En enkelten Vagel kann dor bit hen to 8 bit 12 Eier leggen. röden doot bloß man de Seken. Na 30 Dage kruupt de Küken ut.

Knubbel-Glanzgöse in Europa[ännern | Bornkood ännern]

Düsse Aart warrt nich faken in Zoos wiest oder vun Privotlüde as Ziervagels holen. Dat liggt dor an, datt se koold Weer nich afkönnt. Tücht wurrn is de Vagel to’n eersten Mol 1931 in England. De süüdamerikaansche Unneraard is in Frankriek ok al in de 1930er Johre holen wurrn.

Literatur[ännern | Bornkood ännern]

Belege[ännern | Bornkood ännern]


Weblenken[ännern | Bornkood ännern]

Commons-logo.svg Gnubbel-Glanzgoos. Mehr Biller, Videos oder Audiodateien to’t Thema gifft dat bi Wikimedia Commons.