Klaus Töpfer
Klaus Töpfer (* 29. Juli 1938 in Waldenburg, Slesien; † 8. Juni 2024 in München) weer en düütschen Politiker vun de CDU un ehmoligen Exekutivdirekter vun’t Ümweltprogramm vun de Vereenten Natschonen (UNEP).
Utbillen
[ännern | Bornkood ännern]Töpfer sien Familie is 1945 ut Slesien verdreven worrn. Na School güng he in Höxter, woneem he an’t König-Wilhelm-Gymnasium 1959 sien Abitur maakt hett. Bit 1960 hett he denn sien Wehrdeenst afleist un weer as Leutnant vun de Reserve entlaten.
In Mainz, Frankfort an’n Main un Mönster hett Töpfer denn Volkweertschopslehr studeert. In’t Johr 1964 hett he as Diplom-Volksweert sien Studium afslaten. Vun 1965 bit 1971 hett he as wetenschopplich Assistent an’t Zentralinstitut för Ruumforschen un Landsplanen an de Universität Mönster arbeit. In’t Johr 1968 hett he dor promoveert un ör sien Dokterarbeit Regionalpolitik und Standortentscheidung den Dokter rer. pol. maakt.
Beroop
[ännern | Bornkood ännern]Vun 1971 bit 1978 weer Töpfer Bass vun’t Afdeel flr Planen un Informatschoon in de Staatskanzlee vun’t Saarland. Butendem weer he Lehrbeopdraagt an de Hoochschool för Verwaltenswetenschoppen in Speyer un weer as entwicklungspolitischen Gootachter in Ägypten, Malawi, Brasilien un Jordanien tostännig. Vun 1978 bit 1979 weer he ordigen Professer un Direkter vun’t Institut för Ruumforschen un Landsplanen an de Universität Hannober. In de glieken Tiet weer he ok Liddmaat in’n Raat vun de Saakverstännigen för Ümweltfragen as ok Liddmaat in’n Verwaltensraat vun de Kreditanstalt för Wedderopbo.
Vun 1985 bit 1986 weer he as Honorarprofesser an de Johannes Gutenberg-Universität Mainz. In’n November 2005 weer he vun de Weertschopswetenschopplichen Fakultät vun de Eberhard Karls Universität Tübingen nochmol to’n Honorarprofesser beropen. Siet den 2. Mai 2007 is he ok Professer för Ümwelt un nahollig Entwickeln an de Tongji-Universität in Shanghai[1].
Politik
[ännern | Bornkood ännern]Klaus Töpfer is siet 1972 Liddmaat vun de CDU. Vun 1977 bit 1979 weer he Kreisvörsitter vun de CDU Saarbrücken. Bito weer he Liddmaat in’n Landsvörstand vun de CDU Saar.
Vun 1978 bit 1985 hett he as Staatssekretär in’t Ministerium för Sozialsaken, Gesundheit un Ümwelt vun’t Land Rhienland-Palz arbeit un weer an’n 23. Mai 1985 Minister för Ümwelt un Gesundheit vun Rhienland-Palz in de Landsregeeren ünner Bernhard Vogel.
An’n 7. Mai 1987 is he mit dat Amt vun’n Bundsümweltminister bekleedt worrn in de Bundsregeeren ünner Helmut Kohl. Na de Bundsdagswahl 1994 is he an’n 17. November 1994 in’t Ministeramt för Ruumorden, Bowesen un Städerbo wesselt. Vun 1990 bit 1998 weer Töpfer Liddmaat vun’n Düütschen Bundsdag. Toletzt (1994) weer he över de Landslist vun’t Saarland in’n Bundsdag intogen.
Vun 1987 bit 1989 weer he Kreisvörsitter vun de CDU Rhien-Hunsrück. Vun 1989 bit 1998 höör he to’n Bundsvörstand vun de CDU un seet vun 1992 bit 1998 ok in’t Partei-Präsidium. Vun 1990 bit 1995 weer he blangento ok Landsvörsitter vun de CDU in’t Saarland. In de Johren 1990 un 1994 güng he as Spitzenkandidat för de saarlännschen CDU in de Wahl, hett aver beide molen gegen Oskar Lafontaine verloren. Bi de Berlinwahl 2006 weer he as Rutfodderer vun Klaus Wowereit diskuteert, man in den Interview för en Dagblatt hett he de Kandidatur aflehnt.
Apentliche Ämter af 1998
[ännern | Bornkood ännern]As he an’n 15. Januar 1998 ut de Bundsregeeren utscheedt weer, is he Exekutivdirekter vun’t Ümweltprogramm vun de Vereenten Natschonen (UNEP) in Nairobi worrn. Sien tweete Amtstiet güng formal an’n 31. März 2006 to Enn. För en drüdde Amtstiet wull he nich kandideeren. Sien Nafolger is Achim Steiner worrn. In de Tiet vun 1998 bit 2006 weer he butendem Ünner-Generalsekretär vun de Vereenten Natschonen un Generaldirekter vun’t Büro vun de Vereenten Natschonen in Nairobi. Wieter is Töpfer siet 2001 Liddmaat un opstunns Viezvörsitter in’n Raat för Nahollig Entwickeln.
An’n 2. Februar 2009 weer op de Grünnersversammeln vun’t Institut för Klimawannel, Eerdsystem un Naholligkeit (Institute for Advanced Sustainability Studies, IASS) in Potsdam künnig maakt, dat Töpfer Grünnensdirekter vun’t Institut warrt. Dat Institut schall Spitzenforschungan de Nahtsteed twüschen Klimawannel un nahollige Ökonomie leisten un Arbeitssteden för bit to föfftig Wetenschopplers hebben.
In’n Januar 2011 hett Töpfer de Schirmherrschop vun’n Karl Kübel Pries övernahmen, de an’n 5. September in Frankfort an’n Main verleht warrt.
Privatleven
[ännern | Bornkood ännern]Klaus Töpfer is siet 1968 verheiraat un hett dree Kinner. Siet he wedder in Düütschland is, leevt he in Höxter.
Ehrungen un Utteken
[ännern | Bornkood ännern]
- 1986 Bundesverdeenstkrüüz an’t Band
- 1989 Eselorden vun de Stadt Wesel
- 1990 Groot Bundsverdeenstkrüüz
- Ehrenliddmaat vun’t KStV Ketteler Mainz in’n KV
- 1997 Ehrenprofessur vun de Tongji-Universität Shanghai
- 1998 Ehrendokter vun de Brandenborgschen Technischen Universität Cottbus
- 2002 Düütsch Ümweltpries vun de Düütschen Bundsstiftung Ümwelt (DBU)
- 2002 Ehrendokter vun de Fre’en Universität Berlin
- 2002 Ehrendokter vun de Universität Duisburg-Essen
- 2003 Ehrendokter vun de Gottfried Wilhelm Leibniz Universität Hannober
- 2003 Grote Binding-Pries för Natur- un Ümweltschuul vun de liechtensteenschen Binding-Stiftung
- 2005 Ehrendokter vun de Eedgenöss’schen Technischen Hochschool Lausanne (EPFL)
- 2005 Theodor-Heuss-Pries
- 2005 Dag-Hammarskjöld-Ehrenmedaille vun de Düütschen Sellschop för de Vereenten Natschonen, DGVN
- 2005 Golden Loot, Ehrung vun’n Verband vun de Düütschen Vermetenssingenieuren
- 2007 Ehrendokter vun de TU Bergakademie Freiberg
- 2008 Hermann-Ehlers-Pries vun de Hermann Ehlers Stiftung in Kiel
- 2008 Düütsch Naholligeitspries
- 2009 „Dialogpries för gode Daten“, Sünnerpries, Bisdom Mönster un Bisdomsblatt Kirche+Leben
- 2009 „Fohrradfründlichste Person“, Düütsch Fohrradpries best for bike[2]
- 2009 Groot Sülvern Ehrenteken mit Steern för Verdeensten üm de Republiek Öösterriek[3]
- 2009 Toleranzpries vun de Europääschen Akademie vun de Wetnschoppen un Künst
- 2011 Ehrendokter vun de Technischen Universität Kaiserslautern
Literatur
[ännern | Bornkood ännern]- Felix Butzlaff: Katastrophen brauchen Fachleute? Ökologie und Umweltpolitik mit Klaus Töpfer und Matthias Platzeck als politischen Seiteneinsteigern. Marburg 2009, ISBN 9783828899049.
Warken
[ännern | Bornkood ännern]- Arche in Aufruhr: was wir tun können, um die Erde zu retten. Frankfort an’n Main: S. Fischer 2007. ISBN 978-3-10-003702-2
Borns
[ännern | Bornkood ännern]- ↑ UNEP-Tongji Institute of Environment for Sustainable Development
- ↑ best for bike 2009 vun’n 6. März 2009, afropen an’n 23. August 2010
- ↑ Wiener Zeitung: Amtliches vun de Wiener Zeitung, 18. März 2009, afropen an’n 18. März 2009
