Kid Ory

Vun Wikipedia

Edward „Kid“ Ory (* 25. Dezember 1886 in LaPlace, Louisiana; † 23. Januar 1973 up Hawaii, bisett in New Orleans) weer en US-amerikaansch Jazz-Musiker.

Nah sien Instieg in de Musik as Banjospeler un Versöök up dat Kornett wurr he stilbildend Basuunist vun de New Orleans Jazz. Eerst Profiuptreden harr he all mit knapp teihn Johren. He speel de typisch „Tailgate Trombone“, bi de de Toogbasuun de Melodielinien vun de Trompet mit kört Phrasen rhythmisch kontrasteert un begleit; typisch sünd hier de uptaktigen Glissandi.

Van 1912 bit 1919 weer he Baas vun de populärste Band in ganz New Orleans. Völ Musiker vun den „Hot Jazz“ hebbt in disse Tiet mit Ory speelt, dorünner King Oliver, de jung Louis Armstrong, de Oliver ersett hett, Johnny Dodds, Punch Miller, Sidney Bechet un Jimmie Noone.

1919 truck Ory up Anraden vun sien Dokter in dat warmere Kalifornien. Tosommen mit anner New Orleans-Musikern speel he denn ünner de Naam „Kid Ory’s Creole Orchestra“ an de Westküst. 1922 weer se de eerst swaart Band, de en Schallplatt upnommen hett (allerdings ünner dat Pseudonym „Spike’s Seven Pods of Pepper Orchestra“), ünner annern mit de Kompositschonen' „Ory’s Creole Trombone“ un de „Society Blues“.

1925 truck Ory wieder nah Chicago un speel dor regelmatig mit King Oliver, Louis ArmstrongsHot Five“ un „Hot Seven“, Jelly Roll Morton un eenig anner Bands ut de Ümgegend, as bi Boyd Atkins. Während de Depression truck sück Ory wietgahnd vun de Musikszene torüch un bedreev mit sien Bröer en Höhnerfarm. In’ Tosommenhang mit de Dixieland-Revival vun de 1940er hett he 1943 sien „Creole Orchestra“ weer upleven laaten (ünner annern mit Jimmie Noone) un weer aktiv as Livemusiker un bi Plattenupnahmen bit to sien endgültigen Rücktoog ut de Musik in dat Johr 1966.

Wichtig Kompositschonen[ännern | Bornkood ännern]

  • Muskrat Ramble
  • Ory’s Creole Trombone

Ehrungen[ännern | Bornkood ännern]

Weblenken[ännern | Bornkood ännern]