Johann Eberhard Pavenstedt

Johann Eberhard Pavenstedt (* 1. November 1777 in Bremen; † 6. Dezember 1860 ok dor) weer en düütschen Jurist un breemschen Senater.

Pavenstedt is 1777 in Bremen as Söhn von’n Beerbroer un Öllermann Johann Eberhard Pavenstedt (1747–1823) un siene Fro Sarah, borene Gildemeister, Dochter von Senater Johann Gildemeister, boren. De Familie hett siet dat 17. Johrhunnert in Bremen as Beerbroers leevt. Pavenstedt weer twee Maal verheiraadt, 1804 hett he de Koopmannsdochter Catharina Retberg (1783–1821) freet un 1826 de Koopmannsdochter Henriette Gabain (1792–1853). Ut de beiden Ehn stammt söss Kinner, ünner annern Johann Eberhard Ludewig Pavenstedt. Pavenstedt hett in sien Huus An’n Wall 104/206 un in en Landgood an de Vahrer Straat leevt.

Pavenstedt weer von 1794 af an op dat Gymnasium Illustre in Bremen. Na dat Abitur hett he von 1796 af an Juristeree an de Universität Göttingen studeert un dor 1800 sien Dokter maakt. He hett denn en poor Studienreisen ünner annern na Paris un Wien maakt. 1804 hett he as Avkaat in Bremen anfungen.

1811 is he in de Bremer Franzosentied Präfekturraad un 1812 Ünnerpräfekt von’n Distrikt Ollnborg in dat Departement von de Wersermünnen worrn. Nadem de Präfekt Karl Philipp Alexander von Arberg‎ an’n 17. Oktober 1813 flücht is, hett Pavenstedt dat Amt as Präfekt in dat Departement von de Wersermünnen övernahmen un hett dat bet 1814 behollen, as dat Departement na’n wunnen Krieg von de Allieerten över Napoleon oplööst worrn is.

1814 is he Liddmaat in’n Bremer Börgerkonvent worrn un an’n 30. März 1816 hebbt se em as Senater in Bremen wählt. In’n Bremer Senat harr he in disse Tied blangen Johann Smidt, Simon Hermann Nonnen un Johann Carl Friedrich Gildemeister en groten Influss. He weer besünners in de Kommissionen för butenwartsche Angelegenheiten un för de Schipperee aktiv.

An’n 5. März 1849 is he in Rohstand gahn un 1857 hett he sien Erinnerungen opschreven.