Johann Gildemeister

Johann Gildemeister (* 11. September 1753 in Bremen; † 9. Februar 1837 in Bremen) weer en Maat vun de bekannte Bremer Familie Gildemeister un Senator in Bremen.

Sien Vader weer Koopmann un nah de Scholen hett he ok Koopmann lehrt. Vun 1771 af an weer he toeerst in Holland un later in England. As sien Vader an’n 14. Februar 1776 sturben is, öbernehm he dat Geschäft mit den Dookhannel. Interesseren dö he sik aber för Technik un Astronomie. Tosamen mit den Öllermann Nikolaus Kulenkamp hett he dat Modell vun en Dampmaschien un en Ballon boot. He is en goden Bekannten vun Heinrich Wilhelm Matthias Olbers ween un hett sik dormit ut’neen sett, wat Olbers in de Astronomie utfunnen harr. 1788 is he to’n Senator wählt wurrn. In düt Amt hett he sik vör allen mit den Dieken, den Waterbo, de Füürwehr un de Geschicht vun de Münten befaat. Tosamen mit den Bremer Börgermeester Christian Abraham Heineken hett he vun 1790 bet 1798 een Kaart rutbröcht, wo Bremen to’n eersten Mal nah de nee Wetenschup vun de Trigonometrie up vermeten weer.