Simon Hermann Nonnen

Simon Hermann Nonnen (* 4. Februar 1777 in Bremen; † 23. Januar 1847 in Bremen) weer een Afkaat un Senator in Bremen un een vun de Bremer Börgermeesters.

He weer Söhn vun den Pastor Hermann Nonnen an de Gemeende vun Use lebe Froo un studeer in Göttingen up Afkaat. 1802 hett he dor sienen Doktor maakt. An'n 27.August 1803 al is he Senator in Bremen wurrn. He weer tostännig för de Akzise (den Toll) un hett as Assessor bi't Neddergericht un bi't Gastgericht bi seten. Denn weer he ok noch Morgenspraaksherr bi dat Pelzer-Amt un Direktor vun dat Armenhuus. Inspektor vun dat Armeninstitut un Schottherr is he ok noch wurrn. In de Franzosentiet weer he Maire Adjoint. Nah 1813 is he wedder in den Senat intreden un hett een Masse Ämter öbernahmen. Dorbi güng dat meist üm de Upsicht öber soziale Saken. An'n 23. Februar 1822 is he Börgermeester wurrn. 1825 hett he tohopen mit annere de Bremer Sparkass grünnt.