Neddergericht

Vun Wikipedia
Zur Navigation springen Zur Suche springen

Dat Neddergericht in Bremen is up Verlööf vun Kaiser Karl V. an'n 26. September 1543 inricht' wurrn. Tostännig weer dat för Striet bit to 200 Guldgullen. Vörsitter (Richter) weer een Liddmaat vun den Rat, Bisitter weeren twee Assessors. Dorto keemen een Sekretär un allerhand Prokuratoren un Deeners. Just so weer ok dat Gastgericht tohopensett, man dat weer tostännig för annere Saken. 1751 geev dat een nee Ordnung för dat Gericht. De lä fast, för wat dat Neddergericht tostännig weer. Dormals weeren dat all Strietsaken ünner 300 Rieksdaler. Ok nah de Franzosentiet bestünn dat Neddergericht fudder. Dat weer för all de Saken tostännig, de nich för dat Hochgericht kamen döen.

Vun 1849 af an geev dat een Kollegium vun de Richters. Dor hören twölf Liddmaten to. De wurrn vun den Senat un vun de Börgerschup wählt. Vun düsse 12 Richters weeren dree an dat Neddergericht togange. Een Direktor keem dor noch as Vörsitter hento un ok eenen Sekretär un eenen Deener geev dat. Dat Neddergricht bestünn in Bremen bit 1879, denn is dat uplööst wurrn.