Jens Böhrnsen

Vun Wikipedia
Zur Navigation springen Zur Suche springen
Jens Böhrnsen (2008)

Jens Böhrnsen (* 12. Juni 1949 in Bremen) weer Präsident vun den Senat un Börgermeester vun de free Hansestadt Bremen. He höört to de SPD to. An'n 31. Mai 2010, nadem Bundspräsident Horst Köhler Bott geven hett, hett he, för'n Övergang, de Amtsgeschäfte vun den Bundspräsidenten in de Bundsrepubliek Düütschland övernahmen.[1] Nadem de SPD bi de Wahlen to de Bremer Börgerschup an'n 10. Mai 2015 oorntlich verlaren hett, harr Böhrnsen an'n Dag na de Wahl verklaart, he woll Bott geven as Baas vun de Regeerung. Bott geven hett he denn an'n 15. Juli 2015, as Carsten Sieling to sien Nafolger wählt wurrn is.

Leven[ännern | Bornkood ännern]

Jens Böhrnsen is in den Bremer Stadtdeel Gröpeln boren. Sien Abitur hett he 1968 an dat Ring-Gymnasium in den Stadtdeel Walle maakt. Bi de Fier vun dat Abitur hett he süms de Reed vun de Schölers holen. Darnah hett he vun 1968 bit 1973 an de Universität Kiel Juristeree studeert. 1973 hett he dat eerst Staatsexamen in Sleswig-Holsteen afleggt. Nah den Zivildeenst vun 1974 bit 1975 hett he 1977 sien tweet Staatsexamen in Hamborg maakt. Dornah is he Assessor in de Verwaltung vun Bremen wurrn. 1978 is he denn Richter wurrn. He hett vun 1980 af an as Richter an dat Gericht vun de Verwaltung un vun 1991 bit 1995 as Vörsitten Richter an dat Gericht vun de Verwaltung arbeit. Vun den 8. Juni 1995 af an sitt he för de SPD in de Bremer Börgerschup. 1999 is he Vörsitter vun de Fraktion vun de SPD wurrn.

An’n 15. Oktober 2005 hefft de Maten vun de Bremer SPD doröber afstimmt, wer Henning Scherf as Börgermeester vun Bremen nafolgen scholl. De Maten hefft sik dorbi mehrstendeels för Jens Böhrnsen utspraken. (72 % för Jens Böhrnsen; 27 % för Willy Lemke).

An’n 8. November 2005 is Jens Böhrnsen vun de Bremer Börgerschup mit 62 Stimmen to’n Präsidenten vun den Senat un to’n Börgermeester vun Bremen wählt wurrn. De Grote Koalitschoon hett dormols 69 Stimmen in de Börgerschup harrt. Alltohopen gifft dat dor 100 Setels. An'n 13. Mai 2007 hett Jens Böhrnsen as Toppkandidat vun de SPD de Wahl to de Börgerschup wunnen. Man de SPD hett bi düsse Wahl mit 35,7 % vun de Stimmen dat tweetslechtst Resultaat nah den Krieg infohren. Böhrnsen is Börgermeester bleven, man he hett nich mit de grote Koalitschoon wiedermaakt un is nu Baas vun en Koalitschoon mit de Grönen.

Böhrnsen is vun 1967 af an Maat vun de SPD. He höört ok to ver.di, to de Arbeiterwohlfahrt un to de Düütsch-Israelisch Sellschupp mit to. Jens Böhrnsen hett twee Kinner ut eerste Eh. Sien tweete Fro Luise Morgenthal is an’n 8. März 2007 vunwegen en Bregenblöden sturben. Siet Dezember 2011 is Böhrnsen verheiraat mit de Schoolleitersche Birgit Rüst.[2]

Kiek ok bi[ännern | Bornkood ännern]

Belege[ännern | Bornkood ännern]

  1. http://www.tagesschau.de/inland/koehlerruecktritt100.html
  2. Weser-Kurier: „Böhrnsens heimliche Hochzeit.“ Afropen an'n 7. Januar 2012