Jean Michel Jarre

Vun Wikipedia
Jean-Michel Jarre, 2016

Jean Michel Jarre (* 24. August 1948 in Lyon) is en franzööschen Musiker, Komponist un Musikproduzent. Vun’n Anfang vun de 1970er Johren hett he ünner den Influss vun Pierre Schaeffer Warken för den Synthesizer komponeert, de as’n Milensteen för de elektroonsche Musik ansehn warrt. In’n Verloop vun sien Wirken hett Jarre weltwiet mehr as 80 Millionen Toondrägers verköfft. Al fakener hett he sien Musik in bannig grode Kunzerten ok optisch mit allerhand Lichtspektakel ümsett.

Biografie[ännern | Bornkood ännern]

1948 bit 1970[ännern | Bornkood ännern]

Jean-Michel Jarre is de Söhn vun den Komponisten Maurice Jarre un de fröhere Résistance-Aktivistin Francette Pejot. Sien Öllern hebbt sik aver scheden laten, as Jarre fief Johr oolt weer. Korte Tiet later güng dat bi sien Vadder mit de Karriere as Komponist vun Filmmusiken in Hollywood los. To de Tiet hett he ok anfungen Klavier spelen to lehren, man so recht Lust harr he to noch nich. Dat musikaalsch Intresse keem eerst later, as sien Mudder em to sien teihnten Geboortsdag in den Pariser Jazz-Club Le Chat Qui Pêche mitnahmen hett. Dor hett em ünner annern de Jazz-Trumpeter Chet Baker en lütt Leed speelt.

Jarre hett in de 1960er Johren twee Gruppen grünnt. Dat een weer Mystère IV un dat annere The Dustbins. De tweete dorvun hett Leder vun de Shadows un vun de Spotnicks naspeelt un weer in den Film Des Garçons Et Des Filles to sehn. To de Tiet hett Jarre elektrische Gitarr speelt.

In’t Johr 1969 is Jarre in de Groupe de Recherches Musicales ringahn, de sik ünner dat Regeer vun Pierre Schaeffer mit de so nöömten Musique concrète uteneensett hett. In dat een Johr, in dat Jarre in disse Grupp Liddmaat weer, hett he sien eerste egene Kompositschoon ünner den Titel Happiness Is A Sad Song opnahmen.

1971 bit 1975[ännern | Bornkood ännern]

Al 1971 is Jarre en sünnere Ehr tokamen: He hett sien Elektro-Ballett Aor in de Oper vun Paris opföhren dröfft un weer somit de jüngste Komponist, vun den wat in disse Hallen speelt worrn is.

In dat glieke Johr hett Jarre över dat Schallplatenlabel „Disques Motors“ vun Francis Dreyfus sien eerste Single mit den Titel „La Cage“ op’n Markt bröcht. 1972 folg de Langspeelplaat „Deserted Palace“. In de Johren dorna hett he lüttere Kompositschonen för’t Radio und för’t Feernsehn maakt, ünner annern för Warf. 1973 keem dorto de Filmmusik to den Jean-Chapot-Film Les Granges Brûlées (dt.: Die Löwin und ihr Jäger). Bito schreev un produzeer he Stücken un hele Alben för de franzööschen Musikers Christophe, de bi’t glieke Platenlabel ünner Verdrag weer, Françoise Hardy (Warner), Patrick Juvet (Barclay) un Gérard Lenorman (CBS).

1976 bit 1985[ännern | Bornkood ännern]

Sien groden Dörbrook harr Jarre 1976 mit sien Album „Oxygène“, dat af 1977 över PolyGram weltwiet verköfft worrn is un en överraschenden Spood worrn is. Bit in’t Johr 2003 sünd vun dat Album weltwiet 12 Millionen Stück verköfft worrn.

In dat sülve Johr is Jarre de Schauspelersche Charlotte Rampling över’n Weg lopen, de he 1978 heiraadt hett. He harr al en Dochter ut sien eerste Eh un hett mit Rampling twee Söhn.

1978 keem dat Album „Equinoxe“ as Nafolger vun „Oxygène“ op’n Markt, wat vun’t Kunzept her gliek opboet weer. Dat Album hett sik 8 Millionen mol verköfft.

An’n 14. Juli 1979 geev Jean Michel Jarre sien eerst Konzert op den Place de la Concorde in Paris. Dat hett dormols qal düütlich wiest, woneem Jarres tokamen Konzerten hengahn schülln: Lichteffekten, Projekschonen, Füerwark un een gresig groot Publikum hebbt Jarre en Indrag in’t Guinness-Book vun de Rekorden för dat tokiekerstarkste Konzert vun all Tieten inbröcht – 1.000.000 Tokiekers harr he bi sien eersten Live-Optritt.

Op sien Album „Les chants magnétiques“ (Magnetic Fields) hett Jarre 1981 dat Sampling inföhrt, wenn ok toeerst blots to en lütten Andeel. Na de Pubikatschoon vun dat Album weer em noch en sünnere Ehr todeel: As de eerste Musiker ut’n Westen dröff he na den Dood vun Mao Zedong in de Volksrepubliek China en Konzert geven. De fief Konzerten 1981 in China – twee in Peking un dree in Shanghai – sünd 1982 in Form vun en Dubbel-Album, dat in’t Studio nabearbeit worrn is, ünner den Titel The Concerts In China publizeert worrn.

Dat roorste Album vun Jarre is 1983 tostannen kamen, dat den Titel „Music For Supermarkets“ harr. He hett dit Album as Reakschoon op de Geldsniederee in de Musikszeen opnahmen un dorvun nipp un nau een Album pressen laten. De hett he denn an’n 6. juli 1983 in’t Hotel Drouot in Paris för 10.000 GBP veraukschoneert. Dat hele Wark weer eenmol in’n franzööschsprakigen Radiosenner RTL speelt, dorna sünd de Mastertapes tonichten maakt worrn. Jarre hett dormols sien Fans to’n Mitsnieden vun de Överdrägen opropen („Pirate it!“), so dat sik vundaag MP3-Versionen dorvun in’t Internett finnen laat. Dree Stücken dorvun sünd aver later noch anners wieterbruukt worrn.

Op sien Album vun 1984 mit den Titel „Zoolook“ sünd Samples vun minschliche Stimmen ut verscheden Spraken dat bestimmen Element. To’n eersten mol weern dor ok Gastmusikers bi bedeeligt as to’n Bispeel de Performance-Künstlersche Laurie Anderson, de Bassist Marcus Miller un de King-Crimson-Gitarrspeler Adrian Belew.

1986 bit 1991[ännern | Bornkood ännern]

In dat Johr 1986 is Jean Michel Jarre vun’n US-amerikaanschen Bundsstaat Texas un vun de US-amerikaanschen Ruumfohrtbehörd NASA to en Konzert na Houston inlaadt worrn. Achtergrund weer dat 150-johrige Johrsdag vun Texas un de 25. vun de NASA. Sünners för dat Konzert hett Jarre dat Album „Rendez-vous“ opnahmen. De Astronaut Bruce McCandless hett em op den Infall bröcht, een vun de Stücken vun den Astronauten Ronald McNair mit en Saxophon inspelen to laten. McNair hett sülvst ok speelt, un schüll op de Misschoon STS-51-L an Boord vun de Challenger en Leed spelen, an dat he mitschreven harr. Dat Leed schüll dat eerste wesen, dat in’n Weltruum opnahmen warrt. Mann dorto keem dat nich, vun wegen dat de Challenger kort na’n Start verunglückt is. Jarre wull dat Konzert an dorna an sik afseggen, man Bruce McCandless un annere NASA-Astronauten hebbt em tosnackt, dat nich to doon. So hett dat Rendez-vous Houston – A City In Concert stattfunnen un weer vun Jarre de ümkamen Astronauten todacht. De Skyline vun Houston is dorbi in en Licht- un Lasershow inarbeit worrn. Dat Spektakel is vun tomindst 1.300.00 Tokiekers verfolgt worrn. Den Titel Last Rendez Vous / Dernier Rendez Vous „Ron’s Piece“ op dat Album McNair todacht.

En half Johr later, an’n 5. Oktober 1986, is Jarre in sien Heimatstadt Lyon optreden, as de Paapst Johannes Paul II. to Besöök weer. Dat Konzert füng an, as de Paapst sien Segen över de Stadt snackt harr. 800.000 Minschen hebbt dat Konzert besöcht. De beiden Konzerten sünd op dat Live-Album „In Concert Houston-Lyon“ un op de längere Utgaav „Cities In Concert Houston-Lyon“ to höörn.

Jarres nächst Album „Revolutions“ is an’n 8. un 9. Dezember 1988 in de Londoner Queen-Victoria-Docks ooropföhrt worrn. Dat Konzert „Destination Docklands“ is dorbi op en swemmen Bühn opföhrt worrn. Dat hett bannig regent den Dag, liekers sünd 80.000 Besökers kamen, de betahlt hebbt, as ok wieter 200.000 Tuungäst. Ok vun dit Konzert hett dat later en Live-Album geven, dat toeerst den Titel „Live“ harr un in de 1990er Johren ümnöömt worrn is to „Destination Docklands“. Sien Album „Waiting for Cousteau“ keem 1990 rut un harr ’n beten karibischen Stil. Dat Konzert dorto an’n 14. Juli 1990 weer den Seeforscher Jacques-Yves Cousteau todacht.

En wieteren Rekord hett Jarre 1990 broken mit sien Konzert to’n 200. Johrsdag vun de Franzööschen Revolutschoon. In’t Guinness-Book vun de Rekorden sünd 2 Millionen Tokiekers indragen worrn, eenige Lüüd schätzt, dat dat sogors 2,5 Millionen wesen hebben künnt.

1992 bit 1998[ännern | Bornkood ännern]

1992 hett Jarre Melodien för de Swiezer Klockenfirma Swatch komponeert, de för en nee Modell (MusiCall) vun Armbandklocken dacht weern, de to’n Produkschoonsjubiläum rutbröcht worrn is. In’n glieken Rahmen hett dat in Zermatt ok en Konzert geven, man mit den Ünnerscheed to vörher, dat de Musik nich live speelt worrn is.

In de 1990er ohren hett dat de eenzigen beiden Tourneen vun Jarre geven, de dweer dör Europa güngen. To dat Album „Chronologie“ geev dat 1993 de Europe in Concert-Tour, wo ok dat eerste Konzert in Düütschland (in Berlin) mit inslaten weer. En tweet Konzert, dat in Düsseldörp stattfinnen schüll, müss kortfristig afseggt warrn. An de Steed vun den plaanten Mitsnitt vun dat Konzert is denn dat Live-Album „Hong Kong“ rutkamen, woneem Jarre bi’t Inweihen vun dat grode Stadion speelt hett.

An’n 22. März 1997 weer Jarre Musikgast in de Feernsehshow Wetten dass..? in Wien. Speelt hett he vör’t Wiener Raathuus, neemlich dat Stück „Oxygène 8“. Dat Raathuus in’n Achtergrund deen dorbi as’n Lienwand för Projekschonen.

De tweete grode Tournee hett Jarre na de Publikatschoon vun sien Album „Oxygène 7–13“ in’t Johr 1997 maakt. Se föhr em wedder dör Europa, söven mol hett he in Düütschland speelt. In’t glieke Johr hett Jean Michel Jarre noch eenmol wedder sien egen Tokiekerrekord broken, as he de de 850-Johr-Fier vun de Stadt Moskau för de Staatlichen Universität dat Konzert Oxygène in Moscow geven hett, dat vun schätzte 3,5 Millionen Lüüd ankeken worrn is. „Oxygène 7–13“ weer ok dat eerste Album, wat Jarre ünner dat to Sony Music hören Label „Epic“ rutbröcht hett.

Vun de Alben „Chronologie“ un „Oxygène 7–13“ hett dat ok en Reeg vun ne’e Afmischen geven, so dat Jarre besloten harr, de Stilistiken un en poor vun de Afmischers to en Konzert tosamen to bringen. De eerste vun disse Electronis Nights fünn 1998 ünnern’n Eiffeltoorn statt, hett aver bi de ruchweg 500.000 Tokiekers nich so rech Anklang funnen. Liekers geev dat noch wietere Begeevnissen vun disse Oort.

To de Football-Weltmeetserschop 1998 in Frankriek hett Jarre gliek twee Bidrääg hatt. För Grootbritannien speel he tosamen mit Apollo 440 en ne’e Faten vun Fourth Rendez-vous ünner den Titel Rendez-vous ’98 in. In Tosamenarbeit mit Tetsuya Komuro is för Japan dat neVe Stück Together Now opnahmen worrn, dat vun Olivia Lufkin un Kinner sungen worrn is.

1999 bit 2002[ännern | Bornkood ännern]

To de vermeentlichen Johrdusendwenn 1999/2000 is Jarre gliek vun mehrere Städer inlaadt worrn. Speelt hett he an’n Enn vör de Pyramiden vun Gizeh. Dat egentliche tweedeelte Konzert vun em hett veer vun de twölf Stünnen duert, de de Twelve Dreams Of The Sun anduert hebbt. Dorbi hett he dat Album „Metamorphosis“ vörweg nahmen, dat Anfang 2000 op’n Markt kamen is. Ok een Johr later an’n 31. Dezember 2000 hett Jarre mit en Konzert fiert, as he tosamen mit Tetsuya Komuro as The Vizitors optreden is. Man, de Reakschonen vun de Tokiekers op dat Konzert weern ’n beten mau.

2001 is Jarre wedder to sien klassischen Konzertstil torüchkamen. Sien nächsten Konzerten harrn blots üm un bi 5.000 Tokieker un kregen dordör en intimere Atmosphäär as sien Grootkonzerten. Bi sien Konzert in’n April 2002 bi Le Printemps De Bourges weern blots 100 Tokiekers inlaadt, wobi aver blots veer ne’e Leder dorbi – een dorvun aver jümmerhen al dörtig Johr oolt. De Mitsnitt vun dat Konzert gifft dat blots digital to’n Rünnerladen. En wieter’t sünner’t Konzert weer dat glieke Johr in Däänmark.

2003 bit 2006[ännern | Bornkood ännern]

In de Twüschentiet weer de eh mit Charlotte Rampling scheedt. 2002 hett Jarre offiziell bekannt geven, dat he sik mit de franzööschen Schauspelerschen Isabelle Adjani verlööft. Dat weer aver 2004 wedder vörbi, wat sik teemlich in de franzööschen Klatschmedien daalslahn hett. Dorna hett he sik mit de Schauspelersche Anne Parillaud verlööft, de he 2005 denn heiraadt hett.

Musikaalsch hett sik Jarre na den Flop mit „Metamorphosis“ vun Epic Records scheedt un hett na ünnerscheedlichen Menen ok Disques Dreyfus den Rüch towennt. Wiel Jarre siet 2003 bi eastwest – en Label vun de Warner Music Group – ünner Verdrag is, hett Dreyfus noch jümmer de Rechten an Jarres fröhere Warken un Kunzerten. Dat letzte Album, dat bi Dreyfus publizeert worrn is, weer „Sessions 2000“, dat vun’n Stil her an elektronischen Jazz denken lett.

Dat Jarre sik vun sien fröheren Produzenten splitt hett, hett to de sünneren Situatschoon föhrt, dat 2004 twee Best-of-Alben vun den Künstler vörsehn weer. Dat een weer vun Francis Dreyfus tosamenstellt un harr den Titel „The Essential“, harr aver nix mit dat glieknöömte Album ut de 1980er Johren to doon. Dat tweete weer „Aero“, wat en Dubbelpack ut DVD un CD weer. Blangen veer ne’e Stücken weern dor en poor Klassiker vun Jarre op, de kumplett nee inspeelt worrn sünd un nu to’n eerstenmol in’n 5.1-Surround-Klang vörleegt. Dat Video op de DVD wiest de Ogen vun Anne Parillaud.

Ungefäähr 23 Johr na sien Concerts In China hett Jarre an’n 10. Oktober 2004 as eerste westliche Musiker överhaupt en Konzert in de Verbodenen Stadt in Peking geven. Dat keem dorvun, dat dat „Franzöösch Johr“ in China anfangen de.

Af 2007[ännern | Bornkood ännern]

An’n 30. März 2007 is in Düütschland dat Alvum „Téo & Téa“ rutkamen. Dormit hett den Gedanken wieter ümsett, Studioalben glieks op 5.1-Surround to kunzipeeren. Weetschopplichen Spood harr dat Album aver nich so.

In’n September 2007 hett Jarre den dörtigsten Johrsdag vun sien eerst kommerziell Album mit en Kunzert in Antwerpen in Belgien fiert. Dorto weern blots VIPs inlaadt. Speelt worrn sünd dor de Stücken Oxygène 1 bit 6 op de Original-Instrumenten vun 1976.

In’t Fröhjohr 2008 hett Jarre in’n Rahmen vun de Oxygene Europe Tour 2008 Konzerten Düütschland, Luxemborg un de Swiez speelt. Op de Tour hett he ünner annern op en Theremin speelt.

Diskografie[ännern | Bornkood ännern]

  • 1976: Oxygène
  • 1978: Equinoxe
  • 1981: Magnetic Fields/Les Chants Magnétiques
  • 1982: The Concerts In China/Les Concerts En Chine
  • 1984: Zoolook
  • 1986: Rendez-vous
  • 1987: In Concert Houston-Lyon/En Concert Houston-Lyon/Cities In Concert Houston-Lyon
  • 1988: Revolutions
  • 1989: Live/Destination Docklands
  • 1990: Waiting For Cousteau/En Attendant Cousteau
  • 1991: Images – The Best Of Jean-Michel Jarre
  • 1993: Chronologie
  • 1994: Hong Kong
  • 1997: Oxygène 7 – 13
  • 1998: Odyssey Through O2
  • 2000: Métamorphoses
  • 2004: Aero
  • 2007: Téo & Téa
  • 2007: Oxygene (30th Anniversary)
  • 2015: Electronica 1: The Time Machine
  • 2016: Electronica 2: The Heart of Noise
  • 2016: Oxygene 3
  • 2018: Equinoxe Infinity
  • 2021: Amazônia
  • 2022: Oxymore

Disse Optellen gifft blots de offiziellen Alebn wedder. Butendem gifft dat en grode Tall vun wietere Publikatschonen, as Singles, Kompilatschonen, Videos un roor Oplagen. Jarre hett ok veel för annere Musikers komponeert.

Anners wat[ännern | Bornkood ännern]

Na Jean Michel Jarre un sien Vadder Maurice Jarre is de Asteroid (4422) Jarre nöömt worrn.

Dat Stück Oxygène II is för vele Trainingsszenen in den Jackie-Chan-Film Se ying diu sau (dt.: Die Schlange im Schatten des Adlers) bruukt worrn, so to’n Bispeel as he de „Tigerpranken“-Technik utklamüstert. Dat glieke Stück is ok in de tweeten Staffel vun düütschen Faten vun de Science-Fiction-Reeg Space: 1999 (dt.: Mondbasis Alpha 1) as Titelleed bruukt worrn. Musik ut Jean Michel Jarres Fröhwark weer ok as Filmmusik in den düütschen Speelfilm Die Hamburger Krankheit bruukt.

Literatur[ännern | Bornkood ännern]

Weblenken[ännern | Bornkood ännern]