James Cameron

Vun Wikipedia
James Cameron (2008)

James Francis Cameron (* 16. August 1954 in Kapuskasing, Ontario, Kanada) is en kanaadschen Speelbaas, Dreihbookschriever un Filmproduzent, de in de USA leevt.

Biografie[ännern | Bornkood ännern]

Fröhe Tiet[ännern | Bornkood ännern]

Cameron is in’t kanaadsche Niagara Falls, dicht an de Grenz vun de USA, opwassen. Sien Vadder weer en Elektroingenieur un sien Mudder en Malersche.

As he in’t Öller vun föffteihn Johren den Film 2001: A Space Odyssey vun Stanley Kubrick in’t Kino sehn hett, hett de em so in sien Bann slahn, dat he sülvst ok in’t Filmgewarf arbeiten wull. Ut Böker het the sik allens anegent, wat he över Filmhistorie un de Entwickeln vun Special Effects Enn vun de 1960er Johren bit Anfang vun de 1970er Johren finnen künn. Op de annern Siet weer he bannig daalslahn över den Ümstand, dat he eenige Dusend Mielen wiet weg vun Hollywood leven de.

Dat hett sik 1971 ännert, as sien Vadder en Anbott för en Arbeit in Orange County in Kalifornien kreeg. James Cameron hett disse ne’e Situatschoon düchtig gefallen, vun wegen, dat he nu veel dichter an Hollywood wahnen de. Man, na’n Oortwessel müss he teemlich gau faststellen, dat dat nich so eenfach weer, en Loopbahn in Hollywood antofangen. Dorto keem, dat sien Familie nich nooch Geld harr, üm em en Utbilln an en Filmschool to betahlen. Cameron hett dorüm eerst en Physik-Studium an’t Fullerton College anfungen un wessel later denn op engelsche Literatur, vun wegen dat he mit de Mathematik nich mehr klor keem.

As he vun’t College afgahn is, hett he Sharon Williams heiraadt un nehm en Arbeiit as Lastwagenfohrer an. 1977 hett he mit Star Wars denn wedder en Film ankeken, de sien Liedenschop för de Filmkunst wedder dörkamen leet. Daalslahn, vun wegen dat dat de Film weer, den he jümmer maken wullt harr, hett he sik nu vullstännig dorop kunzentreert, allns wies to warrn, wat een över dat Schrieven vun Dreihböker und dat Maken vun Filmen weten müss un hett sik bito bibröcht, woans man mit en Filmutstatten ümgeiht. Disse Belasten hett aver ok dat Enn vun sien Eh as Naklapp hatt.

Sien eersten Film weer 1979 de 35-mm-Kortfilm Xenogenesis, den he tosamen mit sien Fründ William Wisher dreiht hett. Dat Geld dorför hett he vun en Konsortium vun Tähndokters kregen. Cameron weer bi dissen Film gliektietig Speelbaas, Schriever, Produzent, Kameramann, Filmeditor, Modellboer un de Verantwoortliche för de Trickeffekten – allns in een Person. To de Tiet, as de Film produzeert weer, hett he sien Arbeit as Lastwagenfohrer opgeven. Liekers is de Film nienich op een Lienwand to sehn wesen. Cameron hett nu aver beslaten, sien hele Tiet in dat Filmgewarf to steken un hett sik den bi „New World Pictures“, de Produkschoonsfirma vun Roger Corman bewarven. Toeerst hett he bi’n poor Filmen achter de Kulissen arbeit un weer vun wegen sien Ehrgiez bi de Filmkru bald ünnerdörch. Man, 1981 kreeg he sien eersten Opdrag, as Speelbaas en Kinofilm to maken.

As Utstatter hett he sik dormit befaat hat, woans he Maden stüern kunn un is dormit italieensche Filmproduzenten opfallen. Sien eersten Film Piranha Part Two: The Spawning weer en groten Rinfall för Cameron, aver ok en wichtige Insicht för em as Speelbaas. De italieensche Produzent hett sik bi de Dreiharbeiten jümmer wedder inmischt, wat opletzt dorto föhren de, dat Cameron nachts in dat Snittwark vun den Produzenten in Rom inbroken is, üm den Film so torecht to maken, as he sülvst sik dat vörstellen de – wat de Produzent aver na sien egen Ansichten wedder torüchrullt hett. So is sien eerst Filmwark vun finanzielle as ok vun küsntlerische Siet en Katastrooph worrn.

Dörbrook[ännern | Bornkood ännern]

AS he 1982 wedder torüch in de USA weer, schreev he dat Dreihbook to den Film, de em opletzt to’n Star makeen de, neemlich The Terminator. Dat Dreihbook baseert op en gresigen Droom vun Cameron. He verköff dat Book för een Dollar an de Produzentin Gale Anne Hurd gegen dat Verspreken, dat he bi den Film Speelbaas wesen künn. In de Kinos keem de Film aver eerst 1984, vun wegen dat sik dat hintogen hett, bis dat Geld för den Film tosamenbröcht weer. In de Tiet bit to de Dreiharbeiten vun Terminator hett Cameron twee wietere Dreihböker schreven, dat een för Aliens, dat annere för Rambo: First Blood Part II.

Cameron weer teemlich verargert doröver, woans dat Dreihbook för Rambo ümsett worrn is. Dat Anit-Militäärsche weer meist vullstännig rutlaten worrn. He is dorna vun den düütschen Filmkritiker Milan Pavlovic fraagt worrn, wat he in dat Dreihbook sien egen Insichten in den Vietnamkrieg verarbeit harr, worop Cameron antern de, dat he as Kanadier mit den Vietnamkrieg rein gor nix to doon hatt harr.

As de Produzenten vun Aliens, Walter Hill, David Giler un Gordon Carroll, dat Dreihbook leest – jemehr eenzige Vörbedingen to den Inholt weer wesen, dat de Protagonistin ut den eersten Alien-Film, Ripley, un en Koppel vun Soldaten mitspelen müssen – un den Spood vun Terminator mitbeleevt hebbt, hebbt se Cameron ok de Regie för den tweeten Deel vun Alien anboden. De hett dat Anbott annahmen, aver de Bedingen stellt, dat Hurd den Film mitproduzeeren schüll. Dat Sequel to den eersten Alien-Film hett Cameron för blots 18 Millionen Dollar dreiht. Ünner Kinoanhangers warrt de Film as een vun de besten tweeten Delen ansehn, de jemols maakt worrn sünd.

Dorna hett he en Film dreiht, de op en Geschicht baseert, de he mit 17 Johren in en Biologie-Stünn in de SChool schreven harr. Later an de Universität is bi en Vörlesen en Mann vörföhrt worrn, de in een Dukerantog en mit Suerstoff sättigte Fletigkeit aten dee an Steed vun Luft, üm dat he dormit in grote Deep duken künn. The Abyss is 1989 in de Kinos kamen. Bi Produkschoonskosten vun 49 Millionen Dollar keem de Film blots knapp in de Winnzoon. Man, de Film höört to de Mielensteen vun de Filmhistorie, vun wegen dat he de Tricktechnik revolutschoneert hett. Vullstännig ne’e Techniken as dat Morphing, fotorealistische Reekneranimatschonen un Ünnerwater-Bluescreen sünd deelwies eegens för dissen Film utklamüstert worrn. Gliektietig gellt de Film vundaag aver ok as goot Bispeel för slecht Marketing, vun wegen dat in de Filmwarf över all dissen revolutschonären Effekten nich een Woort seggt worrn is. Üm dissen Fehler nich noch mol to maken, sünd de Trickeffekten bi den nächsten Film Terminator 2: Judgment Day övermatig betoont worrn. De Gööd vun den Film hett Cameron in ne’e Fangemeen inbröcht. The Abyss lööp noch johrelang in Programmkinos.

De nächste Film, Terminator 2: Judgment Day is 1991 een vun de bit to de Tiet düersten Filmen wesen. Dat Dreihbook för den 94 Millionen Dollar düern Film hett Cameron tosamen mit William Wisher schreven.

Anfang vun de 1990er Johren hett Cameron en Rahmen-Verdrag över twintig Filmen afslaten, de em en Gage vun tosamen 500 Millionen Dollar garanteert.

De Infall för den nächsten Film hett Arnold Schwarzenegger bröcht. Bi en gemeensome Motorrad-Utfohrt mit Cameron hett he em vun en franzööschen Kummedie mit den Titel „La Totale“ vertellt. Dat weer de Grundlaag för de eerste Action-Kummedie vun Cameron, de 1994 mit Schwarzenegger in de Hööftrull ünner den Titel True Lies in de Kinos keem.

Un an’n 19. Dezember 1997 is denn Titanic in de US-amerikaanschen Kinos kamen (an’n 8. Januar 1998 denn ok in Düütschland). Cameron meen, dat de Film knapp över 200 Millionen Dollar köst harr. Disse Film is de Hööchpunkt vun sien Karriere, vun wegen, dat de mit ölven Oscars uttekent worrn is.

De Tiet na Titanic[ännern | Bornkood ännern]

Na den groten Spood mit Titanic hett sik Cameron ut de Arbeit as Speelbaas to’n gröttsten Deel torüchtogen. Siet de Tiet arbeit he vör allen an’t Entwickeln vun ne’e Filmtechniken un Effekten. Dorbi is em sien Broder Mike jümmer to Help wesen.

2000 hett he ne’e Weeg inslahn un bröch sien eerste Feernsehreeg rut. Dark Angel is ok in Düütschland op den Senner Vox utstrahlt worrn. De Reeg harr aver keen groten Spood un is na twee Staffeln wedder instellt worrn. Tosamen mit Bill Paxton un sien Broder Mike hett Cameron 2001 en IMAX-3D-Film över de Titanic ümsett, de 2003 ünner den Titel „Ghosts of the Abyss“ in de Kinos keem.

2002 hett he en Feernsehdokumentatschoon över dat düütsche Slacht schipp Bismarck produzeert, de op Discovery Channel sennt worrn is. In Düütschland is de Film 2006 vun RTL to’n eersten mol wiest worrn.

En wieteren 3D-Dokumentatschoonsfilm keen 2005 ünner den Titel „Aliens of the Deep“ in de IMAX-Kinos. Dorin hett Cameron tosamen mit Wetenschopplers vun de NASA Bargkeden op den Grund vun de See un Deepseeleevwesen ünnersöcht.

För sien aktuell Projekt, den 3D-Science-Fiction-Film Avatar, de in’n Dezember 2009 in de Kinos kamen schall, hett Cameron de dreedimensionale Digital- un stereoskoopsche Technologien wieterentwickelt. De Dreiharbeiten dorto weern vun April bit November 2007 in Niegseeland un Hollywood maakt. To’n Enn vun Januar 2010 hett Avatar al mehr Geld an de Kinokassen inspeelt as jede annere Film un is dormit de spoodriekste Film vun all Tieten worrn.

Privatleven[ännern | Bornkood ännern]

Cameron hett fiefmol heiraadt. Sien eerste Fro Sharon Williams harr he vun 1978 bit 1984. De Eh is scheedt worrn, as Cameron mit Gewalt allens doransetten de, in’t Filmgewarf to kamen. Vun 1985 bit 1989 weer he mit Gale Anne Hurd verheiraadt, de ü. a. den Film The Terminator produzeert harr. Vun 1989 bit 1991 weer he mit Kathryn Bigelow verheiraadt un vun 1997 bit 1999 mit Linda Hamilton, mit de he sien Dochter Josephine Archer (* 1993) hett. Siet den 4. Juni 2000 is he nu mit de Schauspelersche Suzy Amis verheiraadt, de he bi Dreiharbeiten to Titanic drapen hett. Mit ehr hett he dree Kinner: de Tweeschen Claire un Quinn (* 2001) un sien Dochter Elizabeth Rose, de in’n Dezember 2006 boren worrn is.

Filmografie (Utwahl)[ännern | Bornkood ännern]

Johr Titel Funkschoon
1978 Xenogenesis Speelbaas
Produzent
Dreihbook
1981 Piranha Part Two: The Spawning
dt.: Piranha 2 – Fliegende Killer
Speelbaas
1984 The Terminator
dt.: Terminator
Speelbaas
Dreihbook
1985 Rambo: First Blood Part II
dt.: Rambo II – Der Auftrag
Dreihbook
1986 Aliens
dt.: Aliens – Die Rückkehr
Speelbaas
Dreihbook
1989 The Abyss
dt.: Abyss – Abgrund des Todes
Speelbaas
Dreihbook
1991 Terminator 2: Jugdment Day
dt.: Terminator 2 – Tag der Abrechnung
Speelbaas
Dreihbook
Produzent
1991 Point Break
dt.: Gefährliche Brandung
Produzent
1994 True Lies Speelbaas
Dreihbook
Produzent
1995 Strange Days Dreihbook
Produzent
1997 Titanic Speelbaas
Dreihbook
Produzent
Filmeditor
2000-02 Dark Angel, Feernsehreeg Dreihbook
Produzent
2002 Solaris Produzent
2003 Ghosts of the Abyss
dt.: Geister der Titanic
Speelbaas
Produzent
2005 Aliens of the Deep
dt.: Aliens der Meere
Speelbaas
Produzent
2008-09 Terminator: The Sarah Connor Chronicles, Feernsehreeg Dreihbook
2009 Avatar
dt.: Avatar – Aufbruch nach Pandora
Speelbaas
Dreihbook
Produzent
Filmeditor

Filmpriesen (Utwahl)[ännern | Bornkood ännern]

Woveel Spood Cameron mit sien Filmarbeiten hatt hett, wiest sik in de lange List vun 38 Filmpriesen, de he bit hüüt wunnen hett. Dorto kamt wietere sössteihn Utteken, för de he vörslahn weer. Wunnen hett he ünner annern:

Literatur[ännern | Bornkood ännern]

  • Eckhard Pabst (Rgv.), Mythen – Mütter – Maschinen. Das Universum des James Cameron, Verlag Ludwig 2005, ISBN 3-933598-71-0
  • Christopher Heard: Gelebte Träume. James Cameron. Sein Leben, seine Filme, Verlag Burgschmiet, 2001, ISBN 3-932234-97-9

Weblenken[ännern | Bornkood ännern]

James Cameron. Mehr Biller, Videos oder Audiodateien to’t Thema gifft dat bi Wikimedia Commons.
Op Wikiquote gifft dat Zitaten to, över oder vun „James Cameron“ (hoochdüütsch).