Isobar (Karnphysik)

Vun Wikipedia

As Isobaren (ut dat Greeksche „gliek swoor“) warrt in de Karnphysik Atomkarns betekent, de de glieke Masse opwiesen doot. Dat heet, de Tall vun Neutronen un Protonen tosamen is bi disse Karns gliek groot.

De Bestännigkeit vun en Atomkarn hangt vun de Proportschoon twüschen de Protonen un de Neutronen af, so dat vun de Isobaren blots en poor bestännig sünd. Na de Mattauchschen Isobarenregel is jümmer een vun twee Isobaren radioaktiv, also nich bestännig, wenn de beiden Isobaren sik in jemehr Atomtall üm 1 ünnerscheden doot. En Sünnerfall vun Isobaren sünd de Spegelkarns. Dat sünd Poren vun twee Karns, bi de de Tallen vun Protonen un Neutronen vertuuscht sünd.