Impeachment

Dat „Impeachment-Verfahren“ (up Platt: „Anklaag vunwegen Vergahn in’t Amt“) is en Verfahren, wat in de Verfaten vun de USA vörsehn is, wenn de Präsident oder sunst en hogen Beamten oder Liddmaat vun de Regeern rutsmeten weern schall. Dat passeert, wenn he oder se „dat Land verraden hett, sik smeren laten hett oder anners wat verbraken hett oder sik schullig maakt hett“. So en Verfahren gifft dat in den enkelten Bundsstaten un ok in den Bund. Dat Problem is man bloß, dat de Verfaten nich eendüdig seggt, wat dat denn heten schall, dat he „anners wat verbraken hett oder sik schullig maakt hett“ (other high crimes and misdemeanors). De Oppositschoon kann dor denn gau bi ansetten un mit Hölpe vun düsse Saak den Präsidenten angriepen.

Dat Repräsentantenhuus kann so en Verfahren in Gang setten. Dor mutt denn en eenfache Mehrheit vun de Afordenten tostimmen. Wenn dat Repräsentantenhuus seggt hett, nu schall dat losgahn, denn geiht de Senat bi un ünnersöcht de Sake. Wenn de Präsident oder de Viezpräsident anklaagt is, denn is de Böverste Richter Vörsitter, anners is dat jummers de Viezpräsident. Jede Siet draff Tügen vernehmen un Krüüzverhören dörföhren. Achterher warrt achter slaten Dören doröver snackt. Wenn en Anklagten bi en Impeachment-Verfahren verordeelt weern schall, denn mütt twee Drüddel vun de Afordenten tostimmen. Dör dat Ordeel verlüst de Anklaagte sien Amt, bavenhen kann he vun’n Senat ok vun all annere Ämter utslaten weern. Annere Strafen kann de Senat nich utspreken, man dat kann ja achterher noch en Straafverfahren vör en normal Gericht geven.

Bitherto geev dat eerst 16 Anklagen vunwegen Vergahn in’t Amt. Dree dorvun güngen gegen en Präsidenten:

1868 gegen Andrew Johnson vunwegen dat he de Rechten vun den Kongress nicht acht’ harr. Em is vörsmeten wurrn, he harr sik nich um den Tenure Office Act scheert, as he Lorenzo Thomas to’n Kriegsminister maakt harr. Dor sünd avers nich de nödigen Stimmen bi tohopen kamen un de Präsident is free spraken wurrn.

1974 gegen Richard Nixon vunwegen de Watergate-Saak. Nixon hett avers süms Bott geven, ehr se em rutsmeten hefft. Dat hett he maakt, as dat al to sehn weer, dat in’t Repräsentantenhuus de nödige Mehrheit för en Anklaag tostenne kamen dö un in’n Senat denn ok noch twee Drüddel tostimmen wollen, em vun’n Hoff to jagen.

1998 gegen Bill Clinton vunwegen Meeneed un weil he de Justiz Steen in’n Weg smieten dö, as dat üm de Lewinsky-Saak güng. As em Meeneed vörsmeten wurrn is, hefft de Afordenten mit 55:45 Stimmen gegen en Anklaag stimmt. Vunwegen Stehen in’n Weg smieten, dat de Justiz nich anstännig arbeiden konn, güng de Saak 50:50 ut. Dor hefft de Afordenten vun de Demokraten in beide Saken bi för Clinton afstimmt.

Grootbritannien

Ok in Grootbritannien gifft dat en Verfahren, wenn en hohen Beamten vun’n Staat rutsmeten weern schall. Den Andrag stellt denn dat Ünnerhuus. Verhannelt warrt de Anklaag denn vör dat Böverhuus. So en Verfahren ins vörsehn, wenn en hogen Beamten vun den Staat sik üm siene Plichten nich scheert hett, as bi Hoochverrat. De Möglichkeit vun so en Anklaag gifft dat vun dat 14. Johrhunnert af an. To’n eersten Mol sünd in dat Johr 1376 hoge Beamten vun dat Ünnerhuus anklaagt wurrn.

Litauen

In Litauen is gegen den Präsidenten Rolandas Paksas 2004 en Verfahren in Gang bröcht wurrn, dat he sien Amt upgeven scholl. He is as eersten Baas vun’n Staat in Europa ut sien Amt rutsmeten wurrn.

Weblinks

Jan Frel, An Abuse of Power (AlterNet, 3. Januar 2006)