Repräsentantenhuus (USA)

Vun Wikipedia
Wesseln na: Navigatschoon, Söök
Dat Kapitol siene Kuppel mit de Flagg vun de USA

Dat Repräsentantenhaus vun de Vereenigten Staten (United States House of Representatives, faken bloß House) is tohopen mit den US-Senat ene vun de beiden Kamern vun den Kongress vun de USA. Jeden US-Bundsstaat stüert Afordenten na den Kongress. Wieveel dat sünd, dat liggt dor an, wieveel Inwahners de Staat hett. De groten schickt mehr Afordenten, de lüttjen weniger. De US-Börgers wählt de Afordenten för twee Johre.

In de USA hett dat Huus oorntlich wat to seggen bi dat Upstellen vun Gesetten un kickt den Präsidenten ok up de Fingers (Checks and balances). Bloß dat Repräsentantenhuus draff Gesetten över Stüern un över den Huushollt in Gang bringen. Ok bloß düt Huus kann en Impeachment-Verfahren up'n Weg bringen.

Dat Repräsentantenhuus höört to de Twee-Kamer-Parlamenten ut de Traditschoon vun dat Parlament vun England. Sien Seet is de süüdliche Flögel vun dat Kapitol in Washington D.C.. De Liddmaten vun dat Huus weert Congressmen oder Representatives nömmt.

Vun 1911 af an sitt 435 Afordenten in dat Repräsentantenhuus. Jedeen sitt dor för den Wahlkreis, de em wählt hett. De Bezirk vun Washington D.C. un en Reeg vun anner Gemarken, de woll na de USA tohöört, man keen Bundsstaten sünd (as Guam un Puerto Rico stüert woll Afordenten in dat Huus, man de dröövt nich mit afstimmen. Bi de Wahlen to'n Kongress vun'n November 2006 hett de Demokraatsche Partei 233 Sitten kregen un de Republikaners bloß 202. Twee Sitten sünd in'n Momang leddig, dorvun een vun de Demokraten un een vun de Republikaners. De neegsten Wahlen sünd an'n 4. November 2008.

Historie[ännern | Bornkood ännern]

As in dat Johr 1787 de Verfaten vun de USA beslaten wurrn is, güng dat ok al üm en Repräsentantenhuus. Toeerst schollen dor 65 Afordenten in sitten. 1788 is de Verfaten denn in Gang bröcht (ratifizeert wurrn), weil negen US-Bundsstaten tostimmt hefft. In datsülbige Johr hett dat de eersten Wahlen to dat Repräsentantenhuus geven. De Verfaten is denn an’n 4. März 1789 güllig wurrn. Dormols weer de Hööftstadt vun de USA noch New York City. Weil veel Afordenten nich in de Stadt weern, konn dat eerste Repräsentantenhuus avers eerst an’n 1. April 1789 mit de Arbeit anfangen. De 65 Liddmaten vun’t Repräsentantenhuus weern ja nu en Deel vun den eersten US-Kongress. Düsse Kongress hett denn de Gesetten beslaten, de en Grundlaag dorför afgeven döen, dat dat ganze Volk tellt weern scholl. Un wat bi düt Tellen rutkamen dö, dat scholl nu wedder de Grundlaag ween för en nee Verdelen vun de Sitten in’t Huus. Midderwielen weer de Seet vun’n Kongress na Philadelphia leggt. Dor is dat Repräsentantenhuus in dat Johr 1790 nee wählt wurrn. De tweete Kongress sett sik jummers noch ut 65 Liddmaten tohopen. De weern unner de Bundsstaten verdeelt, just so, as dat in de Verfaten in Art.1, Afs. 2 vörlöpig vörsehn weer. Düsse tweete Kongress güng nu bi un verafscheedt en nee Gesett, wat de Sitten unner de Bundsstaten nee verdeel. Midderwielen weer ja kloor wurrn, wat bi dat Tellen vun dat Volk rutkamen weer. Dat scholl nu 120 Sitten geven un de schollen na dat Hare-Niemeyer-Verfahren verdeelt weern. Düt Verfahren harr Alexander Hamilton utfunnen. Man de US-Präsident George Washington woll düt Gesett nich gellen laten un lä dor dat eerste Veto in de Geschicht vun de USA gegen in. Dor hett de Kongress denn noch en Gesett beslaten. Düt Mol schollen dat 105 Sitten ween, un de schollen na dat D’Hondt-Verfahren verdeelt weern. Düt Verfahren harr Thomas Jefferson utfunnen. Düt Gesett hett de Präsident gellen laten un so is dat denn in Kraft treden un de Grundlaag ween för de Wahlen to’n drüdden Kongress (1792). Düsse Kongress is denn 1793 tohopentreden.[1]

In dat 19. Johrhunnert dachen de Afordenten vun dat Repräsentantenhuus faken ganz anners över allerhand Saken, as de Senators. Dat harr dor wat mit to doon, dat allerhand Fragen in de US-Bundsstaten na jem ehre Traditschoon anners ankeken wurrn sünd, as bi de Mehrheit vun de US-Inwahners. De Senat, de stünn nu för de Traditschonen in de verscheden Bundsstaten in, dat Repräsentantenhuus avers för de Mehrheit vun de US-Wählers alltohopen. So een Fraag, wo dat Striet üm geev, weer de Slaveree.


Borns[ännern | Bornkood ännern]

  1. Korte engelsche Historie vun de Verdelen vun de Sitten in dat Huus