Horst Ludwig Störmer

Horst Ludwig Störmer (* 6. April 1949 in Frankfort an’n Main) is en düütsch Physiker. Hüm wurr 1998 de Nobelpries för Physik tospraken.

Leven

Horst Störmer wurr 1949 in Frankfort an’n Main boren un is Tosommen mit sien jüngere Bröer Heinz in Sprendlingen upwussen. Nah dat Abitur 1967 an de Goetheschool in Neu-Isenburg wull he en Architektuurstudium an de Technische Universität Darmstadt anfangen, schreev sück aber för Bauwesen in, wiel he den Anmellenstietruum verpasst harr. He hett aber gau faststellt, dat dat Studium nichts för hüm weer. He is denn an de Johann Wolfgang Goethe-Universität Frankfort wesselt, wiel he sück aber ok hier weer to laat för dat Fack Physik anmellen wull, fung he mit en Mathematikstudium an un is eerst 1968 to de Physik wesselt.

Nah dat Diplom 1974 an den Lehrstohl Werner Martienssen ünner Perfesser Eckhardt Hoenig (* 1942) – to glieker Tiet hett ok Gerd Binnig in de Arbeitsgrupp arbeit – wessel he an dat Hochfeldmagnetlabor in Grenoble in de Arbeitsgrupp um Perfesser Hans-Joachim Queisser. Nahdem he 1977 an de Universität Stuttgart sien Doktertitel maakt harr gung he an de Bell Laboratories in Murray Hill (New Jersey), New Jersey, wo he tonächst as Postdoc beschäftigt weer. 1978 wurr he fast anstellt un wurr 1983 to’n Baas vun de Afdeelen för elektrische un optische Eegenschapen vun Fastkörpern as ok 1992 to’n Direkter vun dat Physikalisch Forschungslabor vun de Bell Labs nömmt. Störmer is 1997 an de Columbia University in New York wesselt un wurr 1998 to’n Perfesser för anwennd Physik nömmt.

He is verheiraadt mit Dominique Parchet, de he in Grenoble kennenlehrt harr un de bi de Vereente Natschonen arbeit.

Wark

Horst Störmer hett in Murray Hill an tweedimensionalen Elektronengasen arbeit. Nahdem he all in de eerst Weeken de Idee vun de Modulatschoonsdotierung mit utarbeit harr, kreeg he all wenig Maand later en Fastanstellung bi den Bell Labs. In Tosommenarbeit mit Daniel Chee Tsui un Arthur Charles Gossard wull he an’n 6. Oktober 1981 en vun disse modulatschoonsdotierten Chips in dat Hochfeldlabor vun dat Massachusetts Institute of Technology in Cambridge up Anteeken vun dat hypothetische Elektronenkristall ünnersöken – opdeckt hemm se aber den brakentahligen Quanten-Hall-Effekt („fractional QHE“).

He wurr 1998 gemeensam mit Robert Betts Laughlin un Daniel Chee Tsui mit den Nobelpries för Physik „för hör Opdecken vun en nee Aart vun Quantenfleetigkeit mit fraktschonell laden Anregungen“ uttekent.

Utteknungen

1984 Buckley Award, Amerikaansch Physikalische Sellschopp
1985 Otto-Klung-Pries
1992 Liddmaat vun de American Academy of Arts and Sciences
1998 Benjamin-Franklin-Medaille
1998 Nobelpries för Physik
1999 Liddmaat vun de National Academy of Sciences
1999 Groot Bundsverdeenstkrüüz mit Steern
2006 Liddmaat vun de American Philosophical Society

Böker

Magnetolumineszenz von Elektron-Loch-Tropfen in Germanium. Dissertatschoon, Universität Stuttgart, 1977

Weblinks

Horst Ludwig Störmer. Mehr Biller, Videos oder Audiodateien to’t Thema gifft dat bi Wikimedia Commons.