Honnigdau

Vun Wikipedia
Zur Navigation springen Zur Suche springen
Boomlüse ut dat Geslecht Cinara up mehrjöhrig Holt vun de Slichte Fichte.

Honnigdau is en zuckerhaftigen Utschott vun allerhand Snavelinsekten (Hemiptera), sunnerlich vun Blattlüse (Aphidina), Schildlüse (Coccina), Blattflöh (Psyllina) un Mottenschildlüse (Aleyrodina) un ok vun allerhand Zikaden (Auchenorrhyncha). Düsse Insekten suugt Ssapp ut de Sichterröhren vun allerhand Planten. Vunwegen den hogen Druck in düsse Röhren nehmt de Deerter veel Fleetstoff to sik un geevt den in Form vun Honnigdau wedder af.

Freten for Insekten[ännern | Bornkood ännern]

En Iemecke nümmt en Druppen Honnigdau bi en Boomluus up

En ganze Reeg vun Insekten freet geern Honnigdau. Se nehrt sik vun den söten Ssapp oder bruukt em as Tokost. Bekannt is, datt Iemecken Blattlüse begrabbelt un dor um Honnigdau mit beden doot. Iemecken (Formicidae) hoolt sik Blattlüse as Melkkeih un gaht ok gegen Rövers gegenan, de jem freten wüllt. De meisten annern Insekten, dormank allerhand Tweeflunken (Diptera) un Huudflunken (Hymenoptra) lickt den Honnigdau up vun Blöder un Nadeln. Dor kann he as en dicke, backige Lage overhen liggen. Wenn sik Insekten den Honnigdau nich hoolt, sett sik dor slank Sottswämme up un de Plante warrt swatt as Sott. Dor gaht se nich direktemang kaputt vun, man mit de Photosynthese löppt dat nich mehr so. Ok up Fahrtüge, de unner Böme staht, wo allerhand Blattlüse in leven doot, backt dat na en poor Stunnen vunwegen den Honnigdau, de dor runnerfullen is.

Wat in den Honnigdau in sitten deit[ännern | Bornkood ännern]

Wenn he frisch is, is Honnigdau klaar. Dor sitt veel Zuckers in, sunnerlich Frucht-, Druven- un normolen Zucker (Saccharose), man ok en beten Maltose, Fructomaltose, Melezitose un annere Oligosaccharide kaamt dorin vör. Butenhen besteiht Honnigdau noch ut Fermente, orgaansche Süren, Vitamine un Adenosinphosphate.

Weblenken[ännern | Bornkood ännern]

Commons-logo.svg Honnigdau. Mehr Biller, Videos oder Audiodateien to’t Thema gifft dat bi Wikimedia Commons.