Hogwarts School för Töveree un Hexeree

Vun Wikipedia
Wesseln na: Navigatschoon, Söök
Hogwarts School för Hexeree un Töveree
Wapen vun Hogwarts
Hogwarts coat of arms color.svg
Wahlspröök:

Draco dormiens nunquam titillandus (Latiensch) („En slapen Draak mutt nie nich kettelt warrn“)

Daaten
Rebeet Harry Potter
Oort School
Eerst Opkamen Harry Potter un de Wunnersteen
Johr vun Bo 9. - 10. Johrhunnert
Oort Enerwegens in Schottland, nah bi Dufftown[1]
Direktersche un Direkters Albus Dubledore, Minerva McGonagall, Dolores Umbridge, Severus Snape

Hogwarts School för Hexeree un Töveree, snackt: Hogwarts (> en. Swienswaart), is en fiktionaal School för Hexen un Töverer twischen ölben un achteihn Johr enerwegens in Grootbritannien un is de Hööftszene in de söss eersten Harry-Potter-Böker vun Joanne K. Rowling. Dat dücht, as wenn de veer mächtigsten Hexen un Töverer, Godric Gryffinfor, Helga Hufflepuff, Rowena Ravenkrall un Salazar Slytherin, de School jichtenswann twischen dat negente un dat teihnte Johrhunnert gründt hebben. Hogwarts sien Wahlspröök is: «Draco dormiens nunquam titillandus», wat op Nedderdüütsch so veel heet wo: „En slapen Draak mutt nie nich kettelt warrn.“ De Direkters vun Hogwarts in de Böker sünd: Albus Dumbledore, Minerva McGonagall, Dolores Umbridge un Severus Snape.

Veroorten vun de School un Informataschonen[ännern | Bornkood ännern]

Hogwarts is en koëducativ, wiederföhren Internat, dat Schölerschen un Schölers twischen ölben un achteihn Johren opnahmen deit [2]. Toeerst segg Rowling, dat geev üm un bi dusend Schölerschen un Schölers op de School [3]. Da disse Tall to groot weer, seggt se later üm un bi sösshunnert; as wiederhen Lüüd de Tall för to groot hoolt, verkloort se, dat dat dordör kumm, dat se blots veertig Schölerschen un Schölers in Harry sien Johrgang schapen harr. Utbillen op Hogwarts is nich verplichten. Dat sövente Book beschrifft disse Praxis.

Porträt[ännern | Bornkood ännern]

Slott Hogwarts in de Universal Studios in Orlando

Rowling seggt, Hogwarts schull wesen:[4]

En gresig groot, wietlöpig, grulig kieken Slott mit’n Barg vun Toorns un Höörn op de Muern. As dat Vosslock, neem de Weasleys leevt, so is Hogwarts nich en Bo, dat Muggel opstellen hebben kunnt, wiel dat dör Magie tosamen hollen warrt.

In den Romanen is Hogwarts enerwegens in Schottland; de Film Prisoner of Azkaban seggt, dat Dufftown nah weer. Man porträteert de School, as wenn se mit ’n Barg vun Bannen un Tövern beleggt weer, sodat se Muggels nich sehn köönt; de seht blots Ruinen mit Wohrschau!-Tafeln [5]. Dat geevt butendem ok en Bann, de dat Appareeren un Disappareenen, dat Opdükern un Verswinnen, op de Grund vun de School bemöt, dormit se nich so eenfach angriepen warrn kann; un blots de Direkter kunn den lösen. Dat Rebeet üm dat Slott besteiht ut Flootwischen, Blomenbeten, Gemüüsfelden, en Loch, nöömt „Swatt See“, enen groten Woold, nöömt „Verbaden Woold“, mehr Drievhüüs un anner Bo, as en Uuleree, un en Quidditsch-Feld. In den Swatt See leevt Ünnerwaterminschen, Grindylows un en abasig groot Kraken. Man de Krake griept keen Minschen an, sünnern verhoolt sik as Helper. Mennig Kameren un Treppen beweegt sik [6].

De veer Hüüs[ännern | Bornkood ännern]

De veer Begründers vun Hogwarts delen na jümehr Naams de School in veer Hüüs: (Godric) Gryffindor, (Helga) Hufflepuff, (Rowena) Ravenkrall un (Salazar) Slytherin. Dat Wapen vun Hogwarts wiest elk Huuswapen un in de Mitt en H: Baven rechts de Lööw vun Gryffindor op scharlachrot un gold, baven links de Slang vun Slytherin op gröön un silver, ünnen rechts de Dass vun Hufflepuff op geel un swatt un de Aadler vun Ravenkrall op blau un bronze. In den Anfangen vun Hogwarts hebben de veer Hexen un Töverer de Schölerschen un Schölers egens utwählt. Se sünneren aver later doröver, keen dat maken schull, wanner se doot sien schullen. Gryffindor harr en Idee: He nehm sien Hoot, un de veer geven en Deel vun jümehr Knööv dorin, dormit düsse nege Verdeler-Hoot elkeen Schölersch un Schöler in’t beste Huus steken kunn. Dat lett, as wenn de Schölerschen un Schöler an de Meen vun den Verdeler-Hoot wat maken könen, da Harry sülvst, achter dat de Hoot seggt hett, dat he em na Slytherin steken wull, den bedt dat nich to doon un em lever Gryffindor totoornen, wat de Hoot denn ok deit. De Hüüs treedt över dat Schooljohr gegen enanner an un mööt Punkten sammeln. Dat doot de Schölerschen un Schölers, indem se, to’n Bispill, korrekt op Fragen antwoorden. Elkeen Huus hett ok sien egen Quidditsch-Mannschopp, dat ok Punkten sammelt. De Lohn is toletzt de Huus-Pokal. Elk Huus hett butendem en Baas: Minerva McGonagall för Gryffindor, Pomona Sprout för Hufflepuff, Filius Flitwick för Ravenkrall un Severus Snape för Slytherin (as he Direkter warrt, övernimmt Horace Slughorn dat Baantje). Disse Schoolmeestersche un Schoolmeester sünd wat as de Schölerschen un Schölers jümehr Vertroenspersonen. Se sünd butendem tostännig för swore Strafen. Vele Översettenslüüd harrn Malesch dormit, dat Huus-Konzept to översetten. In Länner, neem dat dit System nich geven deit, fehlt en Woort, dat Identifikatschoon, Troo, un Stolt beschrifft [7].

Gryffindorcolours.svg

Gryffindor[ännern | Bornkood ännern]

Gryffindor sien Weerten sünd Kraasch, Moot un Ridderdom. Sien Maskottje is de Lööw un sien Klören sünd scharlachrot un gold. De Huusbaas is Minerva McGonagall, de Verwanneln-Schoolmeester un Konrektersch, betdat se Direkter warrt. De Huus-Geist is Sir Nicholas de Mimsy-Porpington, nöömt De Nick mit den meist affen Kopp. De Gryffindorer Gemeenschop-Ruum is in en vun de hööchsten Toorns op de sövente Etaasch in den Oost-Flünk. Dat Porträt vun de Dicken Fro wacht vör den Ingang un geevt den Weg dör dat Lock blots free, wenn en dat korrekte Passwoort seggen deit; för Neville Longbottom, de jümmers sien Last mit dat Marken vun Saken hett, is dat faken vigeliensch[8].

Hufflepuff colours.svg

Hufflepuff[ännern | Bornkood ännern]

Hufflepuff ehr Weerten sünd hart Arbeit, Duld, Gerechtigkeit un Troo. Dat Huus sien Maskottje is de Dass un sien Klören sünd geel un swatt. De Baas vun’t Huus is de Krüterkunn-Schoolmeestersch Pomona Sprout; de Huus-Geist is de Fette Mönk. De Ingang to de Hufflepuff-Slaapkameren un Gemeenschop-Ruum is versteekt in’n Barg vun Fäät in enen Winkel op den Köökengang. Üm rintokamen, mutt en den Rhythmus „Helga Hufflepuff“ op dat twete Fatt vun ünnen ut de middeln Reeg kloppen. In’n Ünnerscheed to den anner Hüüs geevt dat hier en Vörrichten, dat över de kloppen Person Etig utgeet, wenn de verkehrt Fatt oder Rhythmus kloppt warrt[9].

Ravenclawcolours.svg

Ravenkrall[ännern | Bornkood ännern]

Ravenkrall (eng. Ravenclaw) ehr Weerten sünd Klookheit, Kreativität, Stevigkeit un Plie. Dat Huus sien Maskottje is de Aadler, de Huus-Klöören sünd blau un bronze. De Baas is de Töverkünstenschoolmeester Filius Flitwick un de Huus-Geist is de Grey Lady (nds. Graue Daam). De Slaapkameren sünd in den Ravenkrall-Torn in de Weestsiet vun Hogwarts. De Gemeenschop-Ruum warrt eerst in de letzt de söven Böker (Harry Potter and the Deathly Hollows) beschrifft: He is utkleed mit de Huusklören un hett en Statue vun Rowena Ravenkrall, de ehr Diadem dreegt. Ehrdat en ringahn kann, mutt en Radel lööst warrn.

Slytherin colours.svg

Slytherin[ännern | Bornkood ännern]

Slytherin sien Weerten sünd Spood, Plietschkeit, Baasheit un ansläägsch Geist. Dat Maskottje is de Slang, sien Klören sünd gröön un silver. De Huusbaas is Severus Snape, betdat he in’t sövent Book Direkter warrt un Horace Slughorn dat Baantje övernehmt. De Huus-Geist is de Blödige Baron. De Ingang to den Slytherin-Gemeenschop-Ruum is bi den Kerkern. De Ruum sülvst is ünner den Swatten See, wat dat Licht swach gröön farvt. De Verdeler-Hoot vertellt, dat Bloot wichtig in Slytherin weer. Dat geevt liekers keen Grund to glöven, dat keen „Drecks-Bloot“ dorhen indeelt warrt; beropen Bispills för Halv-Bloots in Slytherin sünd Snape un Voldemort sülvst.

Hogwarts in anner Översetten[ännern | Bornkood ännern]

Meist hett Hogwarts sien Naam in de Översetten behollen; mennig Spraak mutt dat an ehr Alphabet anglieken, to’n Bispill Araabsch „هوغوورتس“ = Hūghwūrts, Russ’sch „Хогвартс“ = Khogvarts, Japaansch „ホグワーツ“ = Hoguwātsu, Bengali „হগওয়ার্টস“ = Hogowarts, Greeksch „Χόγκουαρτς“ = Hóguarts, vereenfacht Chineesch „霍格沃茨“ = Huògéwòcí). Man ’n poor översett oder passt an: Franzöösch „Poudlard “ (lard egens nds.: Speck), Lettsch „Cūkkārpas“ vun „cūka“ (nds. "Swien") un „kārpas“ (nds. Waart), Nedderlannsch „Zweinstein“ vun „zwijnsteen“ (nds. Swiensteen) un liektiedig Betog op Albert Einstein, Norweegsch Bokmål „Galtvort“ (Nynorsk behoolt Hogwarts), Finnsch „Tylypahka“ (pahka nds. Waart), Ungaarsch „Roxfort“ (Betog to Oxford), Sloweensch „Bradavičarka“ (bradaviče nds. Waart)), Tschechsch „Bradavice“ heet eenfach "Waart". De oolgreeksch Översetten is „Ὑογοήτου Παιδευτήριον τὸ τῆς Γοητείας καὶ Μαγεία“, wat free översett so veel heet wo Hogtövers School vun Töveree un Magie, „Ὑογοήτου“ för Hogwarts, afledden vun de oolgreeksch Wöör „ὑo-“ (nds. Swien) un „γοητής“ (nds. Töverer).

Enkelt Nahwiesen[ännern | Bornkood ännern]

  1. Fraser, L.: An interview with J. K. Rowling: Hogwarts [...] dat mutt man echt an en Ooort dwars af opstellen, un gau achteran maak ik Schottland fast in mien Bregen. Mammoth. London. 2000. ISBN 0-7497-4394-8. S. 20-21. (engelsch)
  2. Steve Wohlberg (2005): Hour of the Witch. Harry Potter, Wicca, Witchcraft and the Bible. Destiny Image Publishers. S. 31 ff. 978-0-7684-2279-5. (engelsch)
  3. accio-quote.org (2000): de Böker: Schrift vun J. K. Rowling ehr Live-Interview op scholastic.com. (engelsch)
  4. Scholastic Press (via Accio Quote): Online chat transcript. 3. Februar 2000 (engelsch)
  5. Harry Potter and the Goblet of Fire: Kapitel 11
  6. web.archive.org vun jkrowling.com: Wo besinnst du di op allens ut de Böker, wenn du jümmers noch de Harry-Potter-Reeg an’t Schreven büst?. 5. Februar 2012. (engelsch)
  7. Judith Inggs (2003): Vun Harry to Garri. Strategien för’t Överdregen vun Kultur un Ideologien in russ’schen Översetten vun twee engelsch Fanatsy-Geschichten. in Meta: 48, 1-2. S. 285-297. (engelsch)
  8. Rowling, J. K. (2002): Harry Potter un de Wunnersteen. Kap. 9, S. 156.
  9. Rowling, J. K.: Hufflepuff-Gemeenschop-Ruum. op Pottermore. (engelsch)