Hergé

Vun Wikipedia

Georges Prosper Remi (* 22. Mai 1907 in Etterbeek bi Brüssel; † 3. März 1983 in Woluwe-Saint-Lambert bi Brüssel), bekannt wurrn unner den Naam Hergé, weer en belgischen Comic-Schriever un -Tekner. Sien Pseudonym kummt vun de eersten beiden Bookstaven vun sien Vör- un Achternaam (G.R.). Wenn een de umdreihen (R.G.) un denn franzöösch utspreken deit, denn so kummt dor Hergé bi rut. Dat Wark, wo he sunnerlich bekannt mit wurrn is un wo he an'n meisten vun rutbrocht hett, sünd Les aventures de Tintin („De Aventüürs vun Tintin“). Dor hett he vun 1929 af an bit to sien Dood an schreven un tekent. Up Düütsch sünd düsse Geschichten unner den Naam „Tim und Struppi“ rutkamen. Up Platt is dor nix vun oversett wurrn. Annere Geschichten, de he schreven un tekent hett, sünd Les aventures de Jo, Zette et Jocko (up Düütsch „Jo, Jette und Jocko“), Quick et Flupke („Stups und Steppke“) un Paul et Virginie („Paul und Virginia“). Mit sien Wark hett he groden Infloot utöövt up de Comic-Kultur in Europa.