Hansebrügg

Luftbild von de Brügg mit de Ooldstadt in’n Achtergrund (2012)

De Brügg von dat Parkhuus an’n Bahnhoff ut keken

De Hansebrügg is en Brügg in Stood, de de Ooldstadt von Stood över den Borggraven un de Gleise von de Nedderelvbahn weg mit de Vörstadt in’n Süden verbinnen deit. De Brügg geiht över den Bahnhoff Stood weg.

Bevör de Brügg boot worrn is, güng de Verkehr dör de Bahnhoffstraat, denn mit en Bahnövergang över de Iesenbahn un an de Harsfeller Straat/Horbörger Straat ran. Besünners de Bahnövergang weer en Hinnernis för den Autoverkehr, de jümmer mehr tonehmen dee. Dorüm is in dat Johr 1980 de Hansebrügg boot worrn, so dat de Verkehr dörgahns lopen kann. De Opfohrt op de Brügg liggt in’n Oosten von de Bahnhoffstraat. De Brügg güng denn över den Borggraven na’n Westrand von’n Adolf-Ravelin, över de Straat An’n Bahnhoff un de Gleise weg un denn an de Horbörger Straat ran. De Brügg hett veer Fohrsporen un op beide Sieden en Weg för Radfohrers un Footgängers.

De ole Bahnövergang in de Bahnhoffstraat is trüggboot worrn. Autos kaamt dor nich mehr dör, för Footgängers gifft dat en Ünnerföhrung.

Ünner de Brügg is vondaag en Skaterpark anleggt.

Weblenken

Hansebrügg. Mehr Biller, Videos oder Audiodateien to’t Thema gifft dat bi Wikimedia Commons.