Hans Küppers

Vun Wikipedia

Hans Küppers (* 24. Dezember 1938 in Essen; † 15. Dezember 2021) weer en düütsch Footballspeler, de mit Schwarz-Weiß Essen 1959 den DFB-Pokal un mit den TSV 1860 München 1966 de düütsch Meesterschap wunn.

Karriere[ännern | Bornkood ännern]

Vereens[ännern | Bornkood ännern]

De Loopbahn vun den blonden Middelfeldspeler (Halfstörmer) fung in de Runn 1957/58 in de 2. Liga West bi ETB SW Essen an. In sien tweet Saison an‘ Uhlenkrug gelung de Upstieg in de Böverliga West. In de Böverliga keem Küppers to 28 Spelen un söss Doren för den ETB Schwarz-Weiß. Een Johr later (1959/60) kunn de unverwacht DFB-Pokalsieger vun dat Johr 1959 aber de Klass nich hollen un speel 1960/61 weer in de 2. Liga West. Sportlich Hööchtpunkt van sien Tiet bi SWE weer de Erfolg in‘ DFB-Pokal 1959. In dat Halffinale kunnen Küppers un sien Kameraden den favoriseerten Hamburger SV in dat Volksparkstadion ut den Pokalwettbewarf schmieten. Dat Endspeel an‘ 27. Dezember 1959 in Kassel gegen Borussia Neunkirchen weer en glatt Angelegenheit för de Essener, se wunnen mit 5:2 Doren. Max Merkel harr as Trainer van Borussia Dortmund de Speelkunst van den Jungen Halfstörmer sehn un hett 1961 den Wessel to 1860 München inleidt.

De „Löwen“ hemm in dat Afslussjohr van de Böverliga Süüd 1962/63 de Meesterschap un dormit de Upnahm in de nee schafft Bundsliga reckt. In de Endrunn 1963 sünd se an Borussia Dortmund scheitert, dat denn ok de düütsch Meesterschap wunn. Küppers hett in de twee Runnen in‘ Süden 57 Spelen bestreeden un dorbi 16 Doren schaaten. Mit Peter Grosser harr he en wiederen Techniker an sien Siet, de ok dat Kombinatschonsspeel beherrschen dee un gemeensam mit Küppers dat Speel van de „Löwen“ in de Offensive prääg. An‘ 13. Juni 1964 wurr Küppers to’n tweeten Mal Pokalsieger. 1860 München wunn dat Endspeel in Stuttgart gegen Eintracht Frankfurt mit 2:0. In‘ Europapokal der Pokalsieger 1964/65 hett sück 1860 över Union Sportive Luxemburg, FC Porto, Legia Warschau un nah dree dramatisch Spelen in dat Halffinale gegen den AC Turin dörsett. Dormit trucken Küppers un sien Kollegen in dat Finale gegen West Ham United an‘ 19. Mai 1965 in dat Wembley-Stadion in. Nah en begeistert Speel vör 98.000 Tokiekers hett sück denn aber de Mannschap um Kapitän Bobby Moore mit 2:0 dörsett.

Natschonal gelung Max Merkel mit sien „Löwen“ in de Saison 1965/66 de hööchste Triumph mit den Gewinn vun de düütsch Meesterschap in de Bundsliga. Neben Hans Küppers stunnen noch anner Klassespieler as Alfred Heiß, Friedhelm Konietzka, Rudolf Brunnenmeier, Peter Grosser un Hans Rebele för de Offensive to Verfügung. Wiel in de Defensive aber ok mit Petar Radenković, Bernd Patzke, Otto Luttrop, Hans Reich un Zeljko Perusic herutragen Könner an’t Wark weern, kunn vua en överraschend Meesterschap nich de Reed ween. Van 1963 bit 1968 leep Küppers in 120 Bundsligaspelen för 1860 up un hett dorbi 47 Doren schaaten. In‘ Sömmer 1968 wessel he to den Düütschen Meester van dat Johr, den 1. FC Nürnberg. Küppers speel woll 33 mal för den Titelverteediger, aber nich etwa um de Meesterschap: völmehr is de Club sportlich abstörrt un is an dat Enn‘ vun de Saison sogor afsteegen.

Dornah hett Küppers de Bundsliga verlaaten un wessel nah Öösterriek to’n SV Wattens in de Natschonalliga. In Tirol wurr he to’n Toptorjäger van sien nee Klub, hett he sien eersten Saison 10, een Johr later all 15 Doren schaaten un hett in beid Johren nich een Meesterschapsspeel verpasst. De Mannschap rund um Friedl Koncilia, Walter Skocik, Roland Hattenberger, Helmut Siber un Helmut Redl erreeg ok groot Upsehn bi den Lokalkonkurrenten FC Wacker Innsbruck. So wurr ut wertschaplich Grünnen de nee SSW Innsbruck 1971 as Tosommensluss vun de beid Tiroler Erstligisten präsenteert. Hans Küppers leep in de Saison 1971/72 blots noch in Harvst för de nee SSW Innsbruck uo, ween an den Gewinn vun de öösterrieksch Meesterschap bedeeligt un is in‘ Winter to’n Swiezer Klub FC Lugano wesselt, wo he nah en half Johr sien Loopbahn afslooten hett.

Natschonalmannschap[ännern | Bornkood ännern]

An‘ 23. Dezember 1962 geev Hans Küppers sien Debüt in de düütsch Natschonalmannschap un hett bi dat Lännerspeel gegen de Swiez glieks en Door schaaten. Düütschland wunn 5:1. Eerst 1965 keem he to wiederen Insätzen, wurr aber nich in den Kader för de Weltmeesterschap 1966 beropen. Nah de WM keem he noch dreemal to’n Insatz wurr aber nah 7 Lännerspelen nich mehr beropen.

Nah sien Karriere[ännern | Bornkood ännern]

Küppers, de technisch Teekner lehrt harr, is later weer in sien Heimatstadt Essen torüchkehrt.