Hans-Cord Graf von Bothmer

Vun Wikipedia
Zur Navigation springen Zur Suche springen
Graf von Bothmer üm un bi 1990

Hans-Cord Graf von Bothmer (* 13. Dezember 1936 in Lauenbrüch) is en düütschen Politiker von de CDU.

Von Bothmer is 1936 in Lauenbrüch boren un weer dor ok op de Volksschool. För een Johr hett he en Internat in Champüry in de Swiez besöcht. Sien Abitur hett he in Holtsminne maakt un denn Bedrievsweertschopslehr in Hamborg studeert. 1964 hett he in Lauenbrüch de Bueree von sien Öllern övernahmen. 1972 is he in de CDU ringahn.

He weer Maat von’n Opsichtsraad von’n Elektrizitätsverband Stood un Maat von Opsichtsraad von dat Överlandwark Noord-Hannover. Later is he Präsident von’n Verband von de Campingplatzhalters in Neddersassen worrn un Viez-Vörsitter von’n Kreislandvolkverband. Von Bothmer weer Vörstandsmaat von’n Frömmenverkehrsverband Lümbörger Heid un Maat von’n Verwaltungsraad von de Spoorkass Scheeßel.

1968 is he Raadsherr von de Gemeen Lauenbrüch worrn. Von 1971 bet 2001 weer he Raadsherr un von 1974 bet 1996 Börgermeester von de Samtgemeen Fintel. 1972 is he Afornten in’n Kreisdag von’n Landkreis Rodenborg worrn un weer von 1973 bet 1977 Vörsitter von de CDU-Frakschoon. Von 1977 bet 1992 weer he Landraad von’n Landkreis Rodenborg un von 1992 af an Viez-Landraad.

Von Bothmer weer von’n 21. Juni 1990 bet 20. Juni 1994 (in de 12. Wahlperiood) as direkt wählt Afornten för den Wahlkreis Rodenborg Maat von’n Landdag von Neddersassen.