Höhenbach (Lech)
| Höhenbach | ||
|---|---|---|
| Laag | Tirol, Öösterriek | |
| ||
| Stroomsystem | Donau | |
| Läng | 4,4 km | |
| Afströömrebeed | 22,3 km² | |
| Born | Tohoopfleten von Rossgumpenbach un Schochenalpbach in de Allgäuer Alpen (op 1.325 m över de See) | |
| Koordinaten Born: | 47° 17′ N, 10° 20′ O | |
| Münn | bi Holzgau in’n Lech (op 1.083 m över de See) | |
| Koordinaten Münn: | Koordinaten:47° 15′ N, 10° 21′ O47° 15′ N, 10° 21′ O | |
| Waterkenntall | AT: 2-4-33 | |
 | ||
De Höhenbach is en 4,4 km langen Bargbeek in de Allgäuer Alpen in Tirol, Öösterriek, de von links in’n Lech münnt.
He billt sik an de Steed bi de Ünnere Roßgumpenalpe, an de Rossgumpenbach un Schochenalpbach tohoopfleten doot. De 2,9 km lange Rossgumpenbach warrt woll ok as Böverloop von’n Höhenbach ankeken[1]. He billt sik ut dree Bornbeken beneddern den Krottenkopf op 1.970 m över de See (47° 19′ N, 10° 21′ O) un löppt von dor na Süden. De Schochenalpbach hett sien Born op 2.067 m över de See in’n Schönanger (47° 17′ N, 10° 17′ O) beneddern dat Hohe Licht un flütt von dor na Noordoosten. De Höhenbach löppt liek na Süden, stört över’n Simms-Waterfall un flütt denn dör Holzgau, dat op sien Swemmkegel liggt. Toletzt münnt de Höhenbach in’n Süden von Holzgau in’n Lech.
Dat Afströömrebeed von’n Höhenbach is üm un bi 22 km² groot un reckt von 1.083 m över de See bi de Münn bet na’n 2.656 m över de See hogen Krottenkopf.[1]
De Bornbeken un de grötere Deel von’n Höhenbach sünd relativ naturbelaten. De ökoloogsche Tostand von’n Höhenbach warrt bet kort vör Holzgau as temlich good, in Holzgau as mäßig bet unbefredigend instuft. De Sahl von’n Beek is bet op en korten Afsnitt in dat Dörp Holzgau nich verboot, de Övers sünd böverhalv von Holzgau deelwies, von’n Oortsanfang bet na de Münn kumplett verboot.[1] Dree lüttjere Waterkraftanlagen bruukt dat Water von’n Höhenbach üm Energie to tügen.[2]
