Gustav Bernhard von Heyer

Vun Wikipedia
Zur Navigation springen Zur Suche springen

Gustav Bernhard von Heyer (* 12. August 1839 in Goschin; † 27. August 1923 in Breslau) weer en düütschen Verwaltungsbeamten un Politiker.

Heyer is 1839 as Söhn von Karoline Minna, borene Foß (1. Oktober 1806-23. Juni 1881), un August Benjamin Heyer (14. Dezember 1797-3. Dezember 1855) in Goschin boren. De Familie weer jöödsch. He hett an de Universität Göttingen Juristeree studeert un weer dor in dat Corps Bremensia. He hett 1863 in Breslau sien Dokter maakt. 1868 is he Regierungsassesser worrn un weer 1868/1869 bi de Polizeidirekschoon Hannover. 1869 is he as Nafolger von Friedrich von Negelein kommissarsch Landraad von’n Kreis Labiau worrn un hett dit Amt denn 1870 ganz övernahmen. He is bet 1879 Landraad bleven, denn hett Arthur von Knobloch dat Amt övernahmen.

Von 1879 bet 1887 weer Heyer bi’t Binnenministerium von Prüßen. He is dor 1881 Gehemen Regerungsraad worrn, 1882 Vörtragender Raad un 1885 Gehemen Böverregerungsraad.

1876 weer Heyer Kannedaat bi de Wahl to dat Prüüßsche Aforntenhuus, kunn de Wahl aver nich winnen. Nadem Hermann von Knobloch sien Mandaat in’n Düütschen Rieksdag an’n 24. April 1879 afgeven harr, is Heyer in en Nawahl an’n 3. Juli 1879 mit 62,62 % von de Stimmen in’n Wahlkreis Königsbarg 2 (Loabjau-Wehlau) wählt worrn. He is bet Oktober 1881 Afornten bleven un weer in de Düütschkunservative Partei. Bi de Wahl 1881 kunn he sik in sien Wahlkreis denn aver nich dörsetten gegen Kurt von Saucken-Tarputschen.

An’n 5. Mai 1888 is Heyer tohoop mit sien Broder Gottlieb Ferdinand Julius von König Friedrich III. in Charlottenburg in’n Adelsstand hoven worrn un hett denn von Heyer heten.

He weer as Nafolger von Ludwig Eberhardt Franzius von 1888 bet 1895 Regerungspräsident von’n Regerungsbezirk Stood. Na em hett Edgar Himly dat Amt övernahmen. Na de Tied in Stood hett he as Nafolger von Nicolaus von Handjery von 1895 bet 1902 dat sülve Amt in’n Regerungsbezirk Liegnitz övernahmen. Nadem he 1902 in Rohstand gahn is, is Günther von Seherr-Thoß Regerungspräsident in Liegnitz worrn. Heyer is toletzt 1913 Würklichen Gehemen Raad worrn.

Von Heyer hett an’n 10. Oktober 1870 in Breslau Gabriele Louise Julie Wendt (1. Januar 1848-8. Juni 1936) freet.