Guanaja

Vun Wikipedia
Satellitenbild von Guanaja
Guanaja bi Savannah Bight

Guanaja is en üm un bi 70 km² groot Eiland von de Islas de la Bahía 45 km vör de Noordküst von Honduras in de Karibische See. Dat höört to dat Departamento Islas de la Bahía, is 18 km lang un 6 km breed. Guanaja liggt 20 km in’n Oosten von Barbareta un 27 km in’n Oosten von Roatán. Vör de Süüdküst von Guanaja liggt dat Cay Bonacca. Rund üm dat Eiland gifft dat ok en Reeg annere Cays, de sik ut Krallenriffs billt hebbt.

De Spraak von Guanaja is Bay Islands English, aver ok Spaansch is fakener to hören.

Geografie[ännern | Bornkood ännern]

Blangen Bonacca sünd de wichtigsten Ööörd Savannah Bight, Mangrove Bight, Sandy Bay, East End un Pelican Ridge.

De höögste Punkt von Guanaja is de Michael Rock Peak mit 412 m över de See.

Dat Eiland is in dree Afsneed deelt, de dör relativ siede Steden vonenanner trennt sünd. De Deel in’n Süüdwesten is dör en Mangrovenholt un en Kanaal trennt. Dor doot keen Öörd liggen, blots enkelte Hüüs (ünner annern Wilmont Bay, West End, Red Cliff). De middlere Deel is de gröttste un dor doot Pelican Ridge, Sandy Bay un Mangrove Bight liggen. Op’n drüdden in’n Noordoosten doot de Öörd Savannah Bight, East End un North East Bight liggen.

Historie[ännern | Bornkood ännern]

De eersten Europäers kemen an’n 30. Juli 1502 na Guanaja, as Christoph Kolumbus dor mit siene Expeditschoon lannt is. He hett ehr Isla de Pinos nöömt.

In’n Oktober 1998 hett Hurrikan Mitch Guanaja swoor drapen.

Weertschop un Infrastruktur[ännern | Bornkood ännern]

De Minschen leevt vör allen von Fischeree un Bueree. Aver ok de Tourismus speelt en Rull. Besünners Dukers un Snorklers warrt von de Riffs üm Guanajo ümto antagen.

Elektrischen Stroom warrt von de Bonnaca Electric Company (Belco) praatstellt.

Verkehr[ännern | Bornkood ännern]

Op dat Eiland gifft dat kuum Straten. De eenzige richtige Straat is twüschen Savannah Bight un Mangrove Bight. De Verkehr löppt vör allen per Boot, wat ok good geiht, denn de Öörd doot all an de Küst liggen. In dat Binnenland gifft dat keen Öörd. Guanaja hett aver mit’n Aeropuerto de Guanaja en egen Flegerplatz, över den dat Eiland an La Ceiba op’n fasten Wall anslaten is.

Weblenken[ännern | Bornkood ännern]

Guanaja. Mehr Biller, Videos oder Audiodateien to’t Thema gifft dat bi Wikimedia Commons.



Koordinaten:16° 28′ N, 85° 53′ W