Gert Fröbe

Vun Wikipedia
Gert Fröbe as de olle Dag in’n Film Und ewig singen die Wälder, Illustratschoon vun Helmuth Ellgaard, 1959.

Karl Gerhart „Gert“ Fröbe (* 25. Februar 1913 in Oberplanitz (vundaag Zwickau-Planitz); † 5. September 1988 in München) weer en düütschen Schauspeler. He gellt as een vun de bedüdensten Charakterdorstellers vun de düütsche Filmhistorie. Wiethen bekannt worrn is he mit sien Rullas Kinnermöörder in den Krimiklassiker Es geschah am hellichten Tag vun 1958 un ok as Titelfigur in den James-Bond-Film Goldfinger vun 1964.

Leven un Wark[ännern | Bornkood ännern]

Karikatur vun Gert Fröbe vun Hans Pfannmüller, 1976

Fröbe weer de Söhn vun den Reepmaker-Meester, Ledderhännler un Schoster Otto Johannes Fröbe un den sien Fro Alma. He harr den Drang na de Kunst un hett dorüm as Handlanger un Kulissenschuver in’t Stadttheater vun Zwickau anfungen. Blangeto hett he sik Geld as Stahgeiger in Zwickau un ümto verdeent. Wegen sien ro’en Hoorschimmer weer he in de Gegend as „Där rode Geicher von Zwigge“ bekannt. Dorbi hett he markt, dat he Anlagen för de Schauspeleree harr. Vun 1933 bit 1935 möök he denn en Utbilln as Theatermaler an de Sass’schen Staatsoper Dresden un nöhm dorna Schauspeelünnerricht. Dorophen kreeg he bald Statisten- un Nevenrullen. Sien sünnere Gaav för de Kummedie weer vun sien Schoolmeester Erich Ponto opdeckt.

Na en Engagement an’t Düütsche Volkstheater in Wien ünner Walter Bruno Iltz is he 1948 in de Rull vun den „Otto Normalverbruker“ in den Film Berliner Ballade bekannt worrn. As he mit de Tiet jümmer mehr an Gewicht tonehmen de, hett he in’n Verloop vun sien Warken faken dat Klischee vun den tyypschen Düütschen – ok in internatschonale Produkschonen – bedeent .

Fröbe künn en bannig groot Spektrum vun Rullen spelen, vun’n swoorgewichtigen Komiker bit to’n differenzeerten Charakterdorsteller. Ofschoonst he wat stämmiger weer, weer he lieker in de Laag dör Bewegung, Mimik un ok Liefpoos bannig ünnerscheedliche Charakterstudien uttoarbeiten. Butendem weer he en rutragen Rezitater, de op sien Rezitatschoons-Tourneen de Warken vun to’n Bispeel Christian Morgenstern, Joachim Ringelnatz oder Erich Kästner nich blots stimmlich man ok mimisch un gestisch inszeneert hett.

Na meist veertig düütsprakige Filmen, weer he 1958 in Es geschah am hellichten Tag as de Kinnermöörder „Schrott“ to sehn. De Film baseer op en Vörlaag Friedrich Dürrenmatt. Disse Rull hett em söss Johren later sien internatschonalen Dörbrook bröcht, as he de Titelrull in den James-Bond-Film Goldfinger kregen hett. Dorbi müss he aver hennehmen, dat he in de engelschen Originalversion wegen sien starken düütschen Akzent vun den engelschen Schauspeler Michael Collins synchroniseert weer. Veel Spood harr ok sien nächsten engelschen Film Those Magnificient Men in Their Flying Machines, in den sien Originalstimm bibehollen worrn is. En wieteren bedüdenen Film ut de Tiet weer Via Mala vun 1961, na den glieknöömten Roman vun John Knittel.

As Fröbe 1965 bi en Interview mit de Daily Mail apentlich togeven harr, dat he Liddmaat vun de NSDAP wesen is, weern sien Filmen in Israel op’n Index sett. Dat Verbott is aver acht Weken later wedder fallen laten worrn, as klünnig worrn is, dat Fröbe in de Tiet vun’n Natschonalsozialismus en jöödsche Familie ünnerbröcht un mit Levensmiddels ünnerstütt harr.[1]

Sien letzte Feernsehrull harr Fröbe in de ZDF-Feernsehreeg Die Schwarzwaldklinik. De Episood „Hochzeit mit Hindernissen“, in de he en Gastrull speelt hett, is eerst na sien Dood utstrahlt worrn. He harr johrelang Lasten mit en Mundhöhlenkarzinom hatt. Dat seeg ut, as wenn he wedder över’n Barg weer, as Fröbe unvermodens na en Rezitatschoonsavend an’n Naklapp vun en Hartinfarkt doodbleev, den he morgens vör sien letzten optritt hatt hett. Gert Förbe is op’n Wooldkarkhoff in Icking bisett worrn.[2]

Fröbe weer fiefmol verheiraat. Ut sien eerste Eh mit Clara Peter is sien Söhn Utz boren worrn. Vun 1953 bit 1959 weer he mit de Filmkritikersche Hannelore Görtz verheiraat. In drüdde Eh weer he mit de Schauspelersche un Singersche Tatjana Iwanow tohopen, de en Söhn (Andreas Seyferth) mit in de Eh bröcht hett, de vun Fröbe adopteert worrn is. Mit de Rundfunkjournalistin Beate Bach weer he vun 1962 an verheiraat. Se is 1968 doodbleven. 1970 hett he denn Karin Pistorius heiraat, de ehr Dochter Beate he ok wedder adopteert hett.

Filmografie[ännern | Bornkood ännern]

Johr Titel
1948 Berliner Ballade
1949 Nach Regen scheint Sonne
1953 Hochzeit auf Reisen
1954 Die kleine Stadt will schlafen gehen
1954 Das zweite Leben
1955 Les héros sont fatigués
dt.: Die Helden sind müde
1956 Ein Herz schlägt für Erika
1957 Typhon sur Nagasaki
1957 Celui qui doit mourir
dt.: Der Mann, der sterben muss
1957 Das Herz von St. Pauli
1958 Nasser Asphalt
1958 Es geschah am helligten Tag
1958 Das Mädchen Rosemarie
1958 Der Pauker
1959 Douze heures d’horloge
dt.: …auch Tote zahlen den vollen Preis
1959 Und ewig singen die Wälder
1959 Am Tag, als der Regen kam
1959 Der Schatz vom Toplitzsee
1960 Le bois des amants
dt.: Die Nacht der Liebenden
1960 Die 1000 Augen des Dr. Mabuse
1960 Bis daß das Geld euch scheidet
1961 Via Mala
1961 Im Stahlnetz des Dr. Mabuse
1961 Der grüne Bogenschütze
1962 Das Testament des Dr. Mabuse
1963 Le meurtrier
dt.: Der Mörder
1964 Goldfinger
1965 Those Magnificent Men in Their Flying Machines
dt.: Die tollkühnen Männer in ihren fliegenden Kisten
1965 A High Wind in Jamaica
dt.: Sturm über Jamaika
1966 Du rififi à Paname
dt.: Rififi in Paris
1966 Ganovenehre
1967 J’ai tué Raspoutine
dt.: Donner über St. Petersburg
1968 Chitty Chitty Bang Bang
dt.: Tschitti Tschitti Bäng Bäng
1974 Der Räuber Hotzenplotz
1974 Ein Unbekannter rechnet ab
1975 Docteur Justice
dt.: Die Öl-Piraten
1976 Les magiciens
dt.: Die Schuldigen mit den sauberen Händen
1977 The Serpent’s Egg
dt.: Das Schlangenei
1978 Der Schimmelreiter
1978 Der Tiefstapler
1981 Banovic Strahinja
dt.: Der Falke
1984 August der Starke, Feernsehn

Utteken[ännern | Bornkood ännern]

Anners wat[ännern | Bornkood ännern]

Gert Fröbe hett sik för dat Team vun de Augsborger Benefiz-Footballmannschop Datschiburger Kickers stark maakt, de sik för’t Fundraising för go’e Saken insetten deit.

Dokumentarfilm[ännern | Bornkood ännern]

Weblenken[ännern | Bornkood ännern]

Borns[ännern | Bornkood ännern]

  1. „Fröbe-Boykott. Böse zugespitzt“ in Der Spiegel vun’n 21. Februar 1966; afropen an’n 25. November 2012
  2. knerger.de: Dat Graff vun Gert Fröbe
  3. Bekanntgaav vun Vergaven vun’n Verdeenstorden vun de Bundsrepubliek Düütschland. In: Bundesanzeiger. Jg. 25, Nr. 111, 16. Juni 1973.]