Georg Weidenhöfer (1882–1956)

Vun Wikipedia
Zur Navigation springen Zur Suche springen

Georg Weidenhöfer (* 13. Januar 1882 in Zeven; † 15. Dezember 1956 in Achem) weer en düütschen Politiker.

Weidenhöfer is 1882 in Zeven boren. Na de Volksschool in Zeven, de Middelschool in Achem un de Bueree-School in Rodenborg weer Weidenhöfer landweertschoplichen Verwalter un Inspekter op Göder in Döringen, Pommern un Oostprüßen. Von 1907 bet 1915 hett he den Buurnhoff von de Familie bi Achem bewirtschaft. Na disse Tied weer he bet 1933 Kloostergoodspächter in Borgzittens.

Weidenhöfer hett sik in de Agrarpolitik insett. He weer Maat von de Landweertschopskamer un von 1925 bet 1932 Afornten in’n Provinziallanddag Hannover, Maat in’n Vörstand von’n Hannöverschen Landbund, Vörsitter von’n Landbund in’n Kreis Zeven, Maat von’n Zevener Kreisdag un Kreisdeputeerten. Na de Rieksdagswahl an’n 4. Mai 1924 is Weidenhöfer in’n Wahlkreis Süüdhannover-Bruunswiek för de Natschonalsozialistische Freeheitspartei (later Völkische Arbeidsgemeenschop) in’n Rieksdag intagen. Bi de Rieksdagswahl an’n 7. Dezember 1924 is he ok noch maal wedder wählt worrn un bet Mai 1928 in’n Rieksdag bleven.

Na en persönliche Rücksprache mit Adolf Hitler[1] is Weidenhöfer an’n 1. April 1929 in de NSDAP (Maten-Nr. 121.760) intreden. As landweertschoplichen Fachberader von de NSDAP hett Weidenhöfer en grote Rull speelt, dat sik de Partei in’n Regerungsbezirk Stood utbreden kunn.[1] Von April 1930 bet September 1933 weer he Viez-NSDAP-Goleiter för den Go Oost-Hannover. Von 1931 af an hett he to’n Gesamtvörstand von’n Hannöverschen Landbund höört un hett dat vöran dreven, dat de Landbund sik för NSDAP-Maten apen wiest.[1] Bi de Wahl an’n 24. April 1932 is he för de NSDAP in’n prüüßschen Landdag intagen, hett dat Mandaat aver kort later wedder afgeven, nadem he bi de Rieksdagswahl an’n 31. Juli 1932 in’n Wahlkreis Oosthannover wählt worrn is. Ok bi de Rieksdagswahl an’n 6. November 1932 un an’n 5. März 1933 is he noch wedder in’n Rieksdag wählt worrn.

Na de natschonalsozialistische „Machtergreifung“ is Weidenhöfer in’n November 1933 nich wedder för den Rieksdag vörslahn worrn. Üm 1936 hett he dat Recht kregen, de Uniform von en Viez-Goleiter mit dat Afteken för Utschedene to dragen. Von 1933 bet 1945 weer Weidenhöfer Verbandsvörsteher von’n Elektrizitätsverband Stood un Generaldirekter von dat Överlandwark Noord-Hannover.Von 1933 bet 1945 weer he ok Präsident von de Industrie- un Hannelskamer Veern un Vörstandsmaat von de Goweertschopskamer Veern. In dat Johr 1944 weer he Maat von’n Volksgerichtshoff.

As de Twete Weltkrieg toenn güng, is Weidenhöfer fungennahmen worrn un weer bet Enn 1947 interneert. Toeerst in Oerbke, later in Rodenborg. Bi de Entnazifizerung is he an’n 19. September 1949 in de Kategorie III („Minderbelastete“) indeelt worrn.

Literatur[ännern | Bornkood ännern]

  • Joachim Lilla (Bearbeiter): Statisten in Uniform. Die Mitglieder des Reichstags 1933-1945. Droste Verlag, Düsseldörp 2004, ISBN 3-7700-5254-4
  • Henning Müller: Georg Weidenhöfer. In: Jan Lokers, Heike Schlichting (Hrsg.): Lebensläufe zwischen Elbe und Weser. Ein biographisches Lexikon, Bd. II, Landschaftsverband der Ehemaligen Herzogtümer Bremen und Verden, Stood 2010, ISBN 978-3-931879-46-4, S. 333–338

Footnoten[ännern | Bornkood ännern]

  1. a b c Daniela Münkel: Nationalsozialistische Agrarpolitik und Bauernalltag. Frankfurt a.M. und New York 1996, ISBN 3-593-35602-3, S. 72.