Günther Smend

Günther Smend (* 29. November 1912 in Trier; † 8. September 1944 in Berlin-Plötzensee) weer en düütsch Offizier un Wedderstandskämper vun den 20. Juli 1944.

Leben[ännern | Bornkood ännern]

Günther Smend wurr as Söhn vun den Hauptmann Julius Smend in Trier boren. Nah en Kriegsverletzung wurr de Vader in dat Riekswehrministerium nah Berlin versett. Dor hett Smend dat Gymnasium Berlin-Friedenau besöcht. 1924 truck de Familie nah Mülheim an der Ruhr, wo Smend 1932 an dat Staatlich Gymnasium sien Abitur makt hett.

In dat sülvig Johr is Smend ass Offizieranwärter in de Riekswehr intreden. Als Oberleutnant un Chef vun de 8. (MG) Kompanie in dat Infanterie-Regiment 18 wurr he in‘ Tweeten Weltkrieges in Frankriek un an de Oostfront insett. In‘ März 1939 hett he Renate von Cossel in Düsseldörp heiraadt.

An‘ 1. April 1943 wurr Smend to‘n Generalstaff versett un an‘ 12. Juni 1943 to‘n Adjutanten vun den Generalstabschefs des Heeres, Generaloberst Kurt Zeitzler, ernannt. He keem in Kontakt mit Wedderstandskreisen binnerhalv vun den Generalstaff un kreeg mit, dat dat Attentatsplään tegen Hitler geev. He hett vergevens versöcht, sien Vörgesetzten Zeitzler an de Deelnahm an de Verswöörung to bewegen, aber de Generaloberst hull doch to Hitler. Nah den Anslag vun'n 20. Juli 1944 wurr Smend de Dag drup verhaft, nah en körten Tiet freelaaten un nochmals an‘ 1. August verhaft. Man harr rutfunnen, dat he dorvan wuss un dat he versöcht harr, Zeitzler to’n Mitmaaken to överreden. An‘ 30. August 1944 wurr he vun den Volksgerichtshoff ünner de sien Präsident Roland Freisler as Mitweeter to’n Dood veroordeelt un an‘ 8. September 1944 in Plötzensee uphangt.

Smend harr dree Kinner: Henriette, Rudolf un Axel. He weer Oberstleutnant in‘ Generalstaff; Dräger vun dat Iesern Krüüz 1. un 2. Klass. An‘ 22. November 1941 wurr hüm todem dat Düütsch Krüüz in Gold verlehnt.

In Lümborg, wo de Familie siet Januar 1943 wahnen dee, hangt hüüd in de St. Nicolai Kark en Gedenktafel för Günther Smend.