Anslag vun’n 20. Juli 1944

Vun Wikipedia
(wiederwiest vun Anslag vun'n 20. Juli 1944)

De Anslag vun’n 20. Juli 1944 un de Greep na den Staat, de dor achter stünn, wiest an’n düütlichsten, dat dat in de Tiet vun den Natschonalsozialismus in Düütschland en Wedderstand gegen den Natschonalsozialismus un gegen de Regeern vun Adolf Hitler geven hett.

Achter düssen Anslag steken Lüde ut ganz verscheden Krinken vun dat düütsche Volk. Veel vun jem harrn wat mit den Kreisauer Kreis üm Helmuth James Graf von Moltke ümto to kriegen. Mank de 200 Lüde, de later vunwegen düssen Upstand dootschaten wurrn sünd, weern een Generalfeldmarschall (Erwin von Witzleben), 19 Generalen, 26 Obersten, twee Ambassadören, seven Diplomaten, een Minister, dree Staatssekretären un de Baas vun de Riekskriminalpolizei. Dor kemen noch verscheden Böverpräsidenten, Polizeipräsidenten un Präsidenten vun de Regeern hento. Grundlaag för den Greep na de Macht weer, dat de Anslag up Hitler sien Leven slumpen dö. Man de Bomb, de Claus Schenk Graf von Stauffenberg an den Diktater sien Siet afstellt harr, hett em nich an’e Siet bröcht. Dorüm, un ok, vunwegen dat dat mit den Anfang vun de „Operatschoon Walküre“ to lange duert hett, is dat nix wurrn mit den Greep na den Staat.

Kiek ok bi[ännern | Bornkood ännern]