Friedrich von Loebell

Vun Wikipedia
von Loebell 1931
Arvgräffnis von de Familie von Loebell op’n Karkhoff Wilmersdörp

Friedrich Wilhelm von Loebell (* 17. September 1855 in Lehnin; † 21. November 1931 in Brannenborg an de Havel) weer en düütschen Politiker.

Von Loebell is 1855 as dat föffte un jüngste Kind von Lilla, borene von Thümen (16. März 1825-18. Dezember 1917), un Robert von Loebell (28. April 1815–15. März 1905) op dat Riddergood Lehnin boren. He hett de Dörpschool in Lehnin besöcht, harr aver ok noch extra Privatünnerricht. Later güng he na de Ridderakademie in Brannenborg un hett dor dat Abitur maakt.

He hett an de Universitäten Straßburg un Leipzig Juristeree studeert un is denn in’n prüüßschen Verwaltungsdeenst gahn. Nadem he 1884 för korte Tied dat Amt as Kreishauptmann von’n Kreis Neehuus övernahmen harr, is he an’n 1. April 1885 de eerste Landraad von’n ne’en Kreis Neehuus worrn un dat bet 1889 bleven. In disse Tied weer he bi de Wahlen 1885 un 1888 to dat Prüüßsche Aforntenhuus Kannedaat in’n Wahlkreis Stood 3 (Neehuus-Hadeln). He hett 1885 aver blots 5,1 % von de Stimmen kregen un 1888 3,8 %. Wunnen hett Christian Pfaff. Von 1889 bet 1900 weer he Landraad von’n Kreis Westhavelland. Dor hett he sik ünner annern för de Brannenborgsche Städtebahn insett, mit de fiev Bahnlienen verbunnen worrn sünd, de ut verscheden Richten op Berlin tolopen deen. To sien Ehren hett de eerste Lok, de an’n 25. März 1904 op de Bahnlien föhrt is, den Naam „Landrat von Loebell“ kregen. He weer von 1901 bet 1912 Vörsitter un von 1919 bet 1929 Tweet Liddmaat von’n Vörstand von de Iesenbahnsellschop.

1898 is Loebell as Afornten för den Wahlkreis Brannenborg-Westhavelland in’n Düütschen Rieksdag wählt worrn. He is bet 1903 Afornten bleven. 1900 is he Generaldirekter von de Landsfüürsozietät in Brannenborg worrn.

Nadem de Afornte in dat Prüüßsche Aforntenhuus, Rudolph von Stülpnagel, an’n 8. Dezember 1900 doodbleven is, hett dat an’n 16. Februar 1901 en Nawahl in’n Wahlkreis Potsdam 7 (Westhavelland-Zauch-Bells) geven, bi de von Loebell ahn Gegenkannedaten mit 100 % von de Stimmen as Afornten wählt worrn is.

1904 is he Vortragender Raad in de Riekskanzlie worrn un 1907 ünner Riekskanzler Bernhard von Bülow Ünnerstaatssekretär. 1909 is he denn Oberpräsident von de Provinz Brannenborg worrn, hett sik 1910 aver op sien Riddergood Benken bi Wiesenburg trüggtagen, dat he 1903 köfft hett.

Von 1911 bet Mai 1914 weer he Maat in’n Opsichtsraad von de Düütsche Bank. Den Posten hett he opgeven, as he Binnenminister von Prüßen worrn is. Dat weer Deel von de Borgfredenspolitik, dat von Loebell an’n 6. Januar 1915 en Erlass verkünnt hett, de de Praxis en Enn sett hett, dat Sozialdemokraten nich in’n öffentlichen Deenst övernahmen warrn kunnen. 1917 is he aver in Kunflikt mit de Regerung un den Kaiser kamen un hett sien Amt afgeven. He weer denn von 1917 bet Januar 1919 wedder Oberpräsident von de Provinz Brannenborg. In de Tied na de Novemberrevolutschoon hett he dit Amt denn aver ok opgeven. As Vörsitter von’n Rieksbörgerraad hett he von 1919 af an versöcht, en kunservative, börgerliche Sammlungspolitik to organiseren. Dat hett lückt, as sik bi de Riekspräsidentenwahl 1925 de Kannedaat för Loebell sien „Rieksblock“ (de sik gegen de Weimarer Republik wennen dee), Paul von Hindenburg, de Wahl wunnen hett. Ok de Volksentscheid över de Fürstenenteignung is för de Kunservativen good utgahn.

De letzten Johren hett he in’n Stadtdeel Dom von Brannenborg leevt. Dor is he 1931 doodbleven. Begraven is he op’n Karkhoff in Wilmersdörp.

Von Loebell hett an’n 27. November 1884 in Danzig Margarete von Flottwell (16. Januar 1862-2. August 1919) freet. De beiden hebbt den Söhn Kurt Ulrich von Loebell (16. September 1892-24. Mai 1959) hatt.

Warken (Utwahl)[ännern | Bornkood ännern]