Ernst Friedrich Adickes

Vun Wikipedia
Zur Navigation springen Zur Suche springen
Ernst Friedrich Adickes

Ernst Friedrich Adickes (* 7. März 1811 in Rosengoorn; † 26. Januar 1878 in Hannover) weer en düütschen Politiker.

Adickes is 1811 as Söhn von Erich Friederich Adickes (24. Juli 1778–3. Juni 1838) op’n Hoff Rosengoorn bi Millm (Land Wusten) boren. Wilhelm Diedrich Adickes weer sien Broder. He hett 1853 de Wuster Schippfohrtssellschop grünnt un weer Viezpräsident von de Geestmünner Dockkumpanie. Tosätzlich weer he Bevullmächtigten von de Bremer un Hambörger See-Assekuranz-Kumpanien. He weer Vörsitter von’n Verwaltungsraad von de Hannover-Allenbeikener Iesenbahnsellschop un Mitgrünner von de Fischereesellschop Werser. He weer Maat von de Hannelskamer Geestmünn un Viezpräsident von de landweertschopliche Sellschop för de Provinz Bremen.

Adickes weer Präsident von de Landsversammlung von Land Wusten un von 1842 af an Maat von de Landschop von de Hartogdömer Bremen un Veern. Von 1840 bet 1866 weer he Maat von de twete Kamer von de Stännversammlung von dat Königriek Hannover un hett dor den 3. Stand, de Landgemenen, vertreden. In’n Provinziallanddag Hannover weer he von 1867 bet 1878. Bi de Wahl 1867 hett he in’n Wahlkreis Hannover 33 (Leh, Geestmünn) 89,6 % von de Stimmen kregen un is bet 1870 Afornten in dat Prüüßsche Aforntenhuus ween.

Dör en Nawahl in’n Wahlkreis Hannover 6 (Heien-Veern) an’n 25. Januar 1869 is Adickes in’n Rieksdag von’n Noorddüütschen Bund wählt worrn un weer dormit ok Maat von dat Tollparlament. Bi de Wahl 1871 is he för den Wahlkreis Hannover 6 in’n Rieksdag von dat Düütsche Riek wählt worrn. Dor weer he bet 1874 Afornten för de Natschonalliberale Partei.[1]

Adickes hett Anna Dorothea (Doris) Caterina Müller (21. März 1816–13. Januar 1878) freet. De beiden harrn de Kinner Dorothea Veronica Erneste (14. Dezember 1841–1917; hett Carl Hugenberg freet) un Ernst (18. August 1845–17. Juli 1909).

Footnoten[ännern | Bornkood ännern]

  1. Fritz Specht, Paul Schwabe: Die Reichstagswahlen von 1867 bis 1903. Eine Statistik der Reichstagswahlen nebst den Programmen der Parteien und einem Verzeichnis der gewählten Abgeordneten. 2. Oplaag, Verlag Carl Heymann, Berlin 1904, Sied 119