Erich Hasse

Vun Wikipedia
Zur Navigation springen Zur Suche springen

Erich Hasse (* 31. Oktober 1897 in Koberwitz, Landkreis Breslau; † 3. Mai 1945 in München[1]) weer en düütschen Beamten un Politiker von de NSDAP.

Hasse is 1897 in Koberwitz boren. Na de Volksschool un dat Abitur an dat humanistische Gymnasium in Oels is Hasse 1916 in’n prüüßschen Staatsdeenst gahn. 1917/1918 weer he in’n Eersten Weltkrieg Soldaat an de Westfront in’t Reserve-Feldartillerie-Regiment Nr. 62. Na’n Krieg weer he bet Juli 1919 in dat slesische Freikorps, ünner annern bi’n Grenzschutz Ost. He hett dat Ieserne Krüüz II. Klass kregen un den Slesischen Adler II. Klass.

He weer denn ok in’n Düütschvölkischen Schutz- un Trutzbund.

1924 is he Kreisinspekter bi dat Landraadsamt von’n Landkreis Reichenbach worrn un weer dor von 1929 af an Maat von’n Kreisdag un von de Stadtverordnetenversammlung. In’t sülve Johr is he denn aver noch na Stood versett worrn. 1929 is he ok in de Natschonalsozialistische Düütsche Arbeiderpartei (NSDAP) rin.

1930 is Hasse Regerungsinspekter in Bookholt in’n Regerungsbezirk Stood worrn un denn in Ebstörp. In dat sülve Johr is he Kreisleiter för den NSDAP-Kreis Ünnerelv un SA-Brigadeföhrer von’n Gausturm Oost-Hannover worrn. 1930/1931 hett he von de Regerung en Disziplinarstraaf kregen un se hebbt em ut’n Deenst nahmen, vonwegen sien Aktivität in de NSDAP.

Bi de Rieksdagswahl in’n September 1930 is Hasse in’n Wahlkreis 15 (Oosthannover) för de NSDAP Afornten in’n Rieksdag worrn. In’n Juli 1932 is he noch maal wedderwählt worrn. 1932 hebbt se em bi de Regerung in Lümborg anstellt.

1933 is Hasse Regerungsamtmann in Stood worrn, later dat Johr denn Landraad in’n Landkreis Land Hadeln. In dit Amt is he bet 1939 bleven. Dor is he in Rohstand gahn.

Literatur[ännern | Bornkood ännern]

  • Henning Müller: Erich Hasse. In: Jan Lokers, Heike Schlichting (Hrsg.): Lebensbilder zwischen Elbe und Weser. Ein biographisches Lexikon, Bd. II, Stade 2010, ISBN 978-3-931879-46-4, S. 124-128

Footnoten[ännern | Bornkood ännern]

  1. Doodsdag na Wilhelm Heinz Schröder: BIORAB-Online