Edward Arthur Laing

Edward Arthur Laing (* 27. Februar 1942 in Belize-Stadt; † 11. September 2001 vör Caye Caulker) weer en Jurist ut Belize.

Laing is 1942 as Söhn von Edward Arthur Laing Sr. in Belize-Stadt boren. He hett an de Universität Cambridge Juristeree studeert un 1968 en Master of Laws an de Columbia University maakt. Nadem he in Belize tolaten worrn is, hett he dor as Avkaat arbeidt. Von 1970 bet 1975 weer he Dozent an de University of the West Indies bevör he as wetenschoplichen Assistent an de University of Notre Dame gahn is. Von 1976 bet 1981 weer Laing Perfesser an de University of Maryland un von 1980 bet 1985 an de Howard University in Washington, D.C.

Laing is denn in’n diplomaatschen Deenst von Belize wesselt un weer von 1985 bet 1990 Baadschopper von sien Land in de USA, Hoochkommissar in Kanada un stännigen Vertreder bi de Organisatschoon von Amerikaansche Staten. Na en Tied an de New York Law School hett Laing von 1993 bet 1996 de Opgaav as Stännigen Vertreder von Belize bi de Vereenten Natschonen övernahmen. He is 1996 as Richter an’n Internatschonalen Seegerichtshoff wählt worrn un dat bet to sien Dood 2001 bleven.

Laing weer ünner annern Maat von de Amerikaansche Sellschop för internatschonaal Recht un de International Law Association.

Laing weer verheiraadt mit Margery Laing. He is an’n 11. September 2001 bi’t Snorkeln vör Caye Caulker doodbleven.