Eadweard Muybridge

Vun Wikipedia
Zur Navigation springen Zur Suche springen
Eadweard Muybridge

Eadweard Muybridge (* 9. April 1830 in Kingston upon Thames; † 8. Mai 1904 ok dor; börgerlich Edward James Muggeridge) weer en britischen Fotograf un Pioneer vun de Fototechnik un de Filmkunst. Blangen Étienne-Jules Marey un Ottomar Anschütz gellt he wegen sien Regenbiller un -opnahmen mit Studien to’n Afloop vun Bewegungen bi Minsch un Deerten as een vun de fröhen Vertreders vun de Chronofotografie.

Leven un Wark[ännern | Bornkood ännern]

Lopen Peerd ut enkelte Biller tohopensett

Muybridge hett de Latienschool in Kingston upon Thames besöcht un fünn en eerste Arbeit bi de London Printing and Publishing Co., för de he 1852 as Vertreder in de USA gahn is. Wanneer un wooneem he sien fotograafsch Utbillen kregen hett, is nich kloor. Dorna weer he bi den Landschopsfotograf Carleton E. Watkins anstellt. Later hett he sik sülvststännig maakt un för Thomas Houseworth un för’t Kriegsministerium vun de USA arbeit.

In’t Johr 1867 hett Muybridge en achtbore Fotoreeg ut den Yosemite-Natschonalpark maakt un weer as Dokumentarfotograf in Alsaka beschäftigt.

Fief Johren later weer Muybridge vun den kalifornischen Gouverneur un Iesenbahn-Tycoon Leland Stanford anstellt, üm nipp un nau de Beenpositschonen vun en Peerd in’n Galopp to bestimmen. Dormit hett he de Regenfotografie mit kumplexen Opbo grünnt, bi de he 12, 24 un opletzt 36 Fotokameras bruukt hett, de na’nanner utlööst weern. Muybridge hett mit sien Opnahmen to’n eersten mol nawiest, dat in’n Galopp tietwies all veer Benen vun’t Peerd in de Luft sünd. Bi sien Regenopnahmen vun Peer in’n Draff oder Galopp harr he Togdrööd spannt, de vun de Peerd anröhrt weern und denn de elektrisch andreven Hoochsnelligkeitsverslüss vun de Kameras na’nanner korttietig utlösen deen. 1879 hett Muybridge denn dat Zoopraxiskop utklamüstert, mit dat he sien Regenopnahmen wiesen künn – jüst so as en Kinofilm, de ok ut enkelte Biller besteiht. Sien beropenen Regenopnahmen hett he 1881 ünner den Titel The attitudes of animals in motion in Form vun Albuminpapeeraftöög publizeert.

1874 hett Muybridge den Leefsten vun sien Fro, den Theaterkritiker Harry Larkins, ümbröcht, weer aver nich veroordeelt, vunwegen dat de „Moord intosehn weer“ (Larkins-Affär). He güng dorna op en Foto-Expeditschoon na Middelamerika, woneem he den Isthmus vun Panama dokumenteer un Experimenten mit de Chemie un mit de Verslusstechnik maken de. Twee Johren later keem he torüch na San Francisco. An’n 8. Mai 1904 i he mit 74 Johren in sien Geboortsoort doodbleven.

Muybridge sien Inwirken op de Billen Kunst[ännern | Bornkood ännern]

Vör de Biller vun Muybridge harrn Künstlers deelwies verkehrte Ansichten dorvun woans sik Minschen un Deerten bewegen doot. Muybridge sien groot Teel weer, mit sien Regenbiller Künstler as ok Wetenschopplers nauert Weten to vermiddeln.

1890 hett de Fotoreeg Annie G. galloping ut Animal Locomotion Frederic Remington to Cowboy inspireert. In de Johren dorna künn de Technik, enkelte Biller in Bewegung to wiesen, so wiet entwickelt warrn, dat jümmer mehr (sünners US-amerikaansche) Künstlers jemehrn Tekenstil vun Grund op ännern deen.

De Künstlersche Caren Canier ut New York hett sik Anfang vun’t 21. Johrhunnert ut en postmodern-allegorischen Sichtwies mit Muybridge sien Fotoregen befaat. Se hett sik in ehr Biller mit de Kunstanten vun de Tiet un mit de Ästhetik vun’n Frame ut’neensett.

Tim MacMillan, de Trickeffekten för’t Kino utfunnen hett (bekannt is he sünners dör de Matrix-Filmen), betekent Muybridge blangen den Kubismus as en Vörlöper vun sien Bullet-Time-Technik. De schienbor unmöögliche Effekt vun en Bewegung üm en Figur, de „in de Tiet infroren is“, weer Enn vun de 1990er Johren in Popvideos un Warffilmen teemlich verbreedt.

Bispelen för Animatschonen[ännern | Bornkood ännern]

Woman Walking Downstairs ut The Human Figure in Motion.
De bövere Reeg as Animatschoon
16 Kameras hebbt jeed een Bild maakt …
… un so sütt de Animatschoon dorvun ut
24 Biller …
… animeert


Publikatschonen[ännern | Bornkood ännern]

  • 1887: Animal Locomotion; An Electro-Photographic Investigation of Consecutive Phases of Animal Movement, Philadelphia – Ölven Bännen mit mehr as 100.000 Opnahmen op 781 Platen ut de Johren 1872 bit 1885
  • 1901: The Human Figure in Motion, Philadelphia

Literatur[ännern | Bornkood ännern]

  • Hans Christian Adam (Rutgever): Eadweard Muybridge. The Human and Animal Locomotion Photographs. Taschen, Köln 2010, ISBN 978-3-8365-0941-1 (hoochdüütsch / engelsch / franzöössch).
  • Philip Brookman (Rutgever): Eadweard Muybridge. Tate Britain, London 2010, ISBN 978-3-86521-926-8.
  • Robert Bartlett Haas: Muybridge: Man in Motion. University of California Press, 1976, ISBN 978-0-520-02464-9.
  • Kevin MacDonnell (Hrsg.): Der Mann, der die Bilder laufen liess oder Eadweard Muybridge und die 25 000$-Wette (Originaltitel: The Man Who Invented the Moving Picture, översett vun Fritz J. Oberli), Bucher, Luzern / Frankfort an’n Main 1973, ISBN 3-7658-0166-6. (hoochdüütsch)

Kiek[ännern | Bornkood ännern]

Weblenken[ännern | Bornkood ännern]

Commons-logo.svg Eadweard Muybridge. Mehr Biller, Videos oder Audiodateien to’t Thema gifft dat bi Wikimedia Commons.