Zoopraxiskop

Vun Wikipedia
Zoopraxiskop vun Eadweard Muybridge mit en buckig Muli (1893)

Dat Zoopraxiskop is en Projekschoonsreedschopp to’n Wiesen vun chronofotograafsche Biller, dat 1878 (oder 1879) vun Eadweard Muybridge utklamüstert weer.

Muybridge hett to’n eersten mol enkelte Phasen vun Bewegungsafloop vun en Peerd in’n Galopp opnahmen. He harr den Opdrag kregen rutofinnen, wat dat een Phaas geev, woneem dat Peerd den Bodden mit keen Been mehr beröhren deit. Üm dat beobachten to künnen hett he twölf Kameras an en Reenbahn opstellt un Kuntaktdrööd spannt, de dör’t Bewegen vun’t Peerd to Kameras utlösen deen.

Üm sik de Biller in gaue Reeg ankieken to künnen, hett de dat Zoopraxiskop entwickelt. Dorbi hannelt sik dat üm en Stroboskop mit de Form vun en Glasschiev, woneem de enkelten Opnahmen opmaalt weern. Mit Hülp vun en Gleihlamp künn he de Biller op en Lienwand projizeren. Dormit stellt dat Zoopraxiskop en fröhen Schritt in de Historie vun de Filmkunst dor un kann as eersten Filmprojekter ansehn warrn.